Базуудад “базуулсан” У.Хүрэлсүх, Х.Баттулга нар

Ерөнхийлөгчийн сонгуулийн товлолт өдөр, минут, секунтээр ойртоод л байдаг. Гол тоглогчид нь аль болох л нэр цэвэрхэн байдалтай энэ өдрүүдэд цэмциймээр байдаг. Гэтэл Х.Баттулга, У.Хүрэлсүх нар тус бүрдээ нэг нэг муухай харагдуулагчтай болов. У.Хүрэлсүхийнх нь С.Батболд, Х.Баттулгынх нь А.Гансүх. Хоржоонтой нь, С.Батболд, А.Гансүх нар базууд. Ямар үйл лайгаараа ийм баз улсуудад “базуулж”, эдүгээ эдгээрээсээ болж, хэмлүүлж суугаа юм гэлтэй, Х.Баттулга, У.Хүрэлсүх нар. Үнэндээ тэднийг мөнгө тойрсон эрх ашгууд л нэгтгэсэн харагддаг.

НЭГ: А.ГАНСҮХЭЭС ЕРӨНХИЙЛӨГЧ ЗАЛХСАН Ч ОРОЙТОВ

Б.Баасанцогтоор дамжиж, “Ариг” банкны мөнгөөр шүүгчдийг угжсан гэх баримтуудын учиг явсаар А.Гансүх дээр төвлөрч буй. Үүнээс хойш цацагдах олон баримтад түүний нэр дурдагдаж, Ерөнхийлөгчийг тойрсон их мөнгийг А.Гансүх өөр дээрээ татан төвлөрүүлж, эргээд тарааж байсан нь нотлогдоно гэх. Бүр ОХУ-аас орж ирсэн гэгдсэн мафийн шинжтэй мөнгөтэй хүртэл өнөөх А.Гансүх холбогдсон. Ядахад өөрөө гарч ирээд, тэнд тусгай үүрэг гүйцэтгэхээр хүмүүсээ явуулсан гэдгээ хүлээн зөвшөөрөөдхөв.

МАН-ынхан ч нэгэнт улайрч, түүнд хамаарч болох бүхнийг илчлэхээр захирч чаддаг хуулийн байгууллагуудаа сумлачхаад байна. Саяхан “УБТЗ” ХНН-т нэгжлэг хийсэн нь ч А.Гансүх рүү чиглэсэн операциудын нэг хэсэг байв. Ингэж ҮАБЗ-ийн Нарийн бичгийн даргын үүргээр “мөнгөний машин” хийж явсан А.Гансүхийг хэрэг бишдээд эхлэнгүүт Ерөнхийлөгч ч түлхэхэд бэлэн яваа гэх яриа хөшигний ард хөврөх болов. Гэвч эдүгээ Ерөнхийлөгч А.Гансүхийг өөрөөсөө түлхэхэд нэгэнт оройтсон билээ.

ХОЁР:  У.ХҮРЭЛСҮХ ОГЦРОХООСОО  Ч ӨМНӨ С.БАТБОЛДОД “ӨШИГЛҮҮЛЖЭЭ”

С.Батболдод хамаарах хуулийн маргаан хилийн чанадад өрнөөд эхлэнгүүт тэрбээр У.Хүрэлсүхийн хаалгыг шууд түлхэн орж, уурандаа хөлөн тус газар луу өшиглөсөн гэгдсэн. Бие махбодиор нэг удаа өшиглүүлээд өнгөрөх ч яахав, эр улсууд. Гэвч С.Батболд энэ хаврын турш У.Хүрэлсүхийн тамирын голын мөсийг хэлээрээ долоох шахам цуглуулсан улс төрчийн карьерийг нь өшиглөн устгагч болж хувирлаа. У.Хүрэлсүхэд түүнээс бултах ямар ч арга зам үлдсэнгүй.

Энэ хугацаанд НПГ-ын орлогч Ц.Насанбат “С.Батболд нарт хамаарах хөрөнгүүдийг царцаах ажиллагаа гадны зургаан улсын шүүх дээр зэрэг өрнөж байгаа” гэх агуулгыг маш тодорхой зарлав. Тэдний талаас гадаадад ямар ч хөрөнгө байхгүй, биднийг шалгасан онцын зүйл үгүй, Монголын талаас зориуд үнэтэй хуулийн фирм хөлсөлж, ийм операци хийж байгаа гэх тайлбар өгч байна. Гэвч С.Батболд нарт хамаарах баримтууд Ерөнхийлөгчийн гарт асар ихээр төвлөрсөн нь У.Хүрэлсүхийн толгойны өвчин болоод байна.

НЮАНС: ХӨХҮҮНЭЭР ИНЭЭЖ ЯВАА ХӨНДЛӨНГИЙН ДҮР НЬ З.ЭНХБОЛД

Ерөөс Ерөнхийлөгчийн багийнхан энэ хаврын турш С.Батболдыг У.Хүрэлсүхэд нааж, баримтуудыг нь тасралтгүй нүдэхээр төлөвлөсөн нь ил цагаан болсон. Зөрүүлээд  МАН-ынхан А.Гансүхийг Ерөнхийлөгч Х.Баттулгад сайтар нааж байгаад, нэг мөсөн гөвшиж өгөхөөр эргэлт буцалтгүй шийдсэн нь харагдана. Энд хөхүүнээр инээж яваа нэг хөндлөнгийн дүр нь З.Энхболд. С.Батболдтой баз гэдгийг нь мэдсээр байж, А.Гансүхийг тэр л Ерөнхийлөгчийн дэргэд авчирч уясан.

З.Энхболд ЕТГ-ын даргын суудал дээрээс С.Батболдтой маш ойрын харилцаатай, МАН-ын гишүүнчлэл бүхий эрхмүүдтэй хамтран эзэмшдэг “Старто” ХХК-ийнхаа эрх ашгийг бүрэн хангаад, гарч одсон. Нэгэн үес З.Энхболд, С.Батболд нар намын дотоод хөлөө базаах ажилд төвлөрч, шинэ МАНАН байгуулах бэлтгэлээ хангалаа гэх санааг ч нийтлэлчид дэвшүүлж байв. Энэ нь ч үнэн. Ерөнхийлөгчийн сонгуулийн дараа С.Батболд ч тэр, З.Энхболд ч тэр намдаа хачин их нөлөөтэй болох хүлээлт нэгэнт бэхэжчихлээ. Харин манай “гэнэн” хоёр л Ерөнхийлөгчийн сонгуульдаа хэрхэн оролцох юм бол доо.

Энэ мэдээнд таны өгөх үнэлгээ

Хуваалцах Жиргэх