ХУУЛИЙН ЗААЛТ: У.Хүрэлсүх Ц.Анандбазарыг эгүүлэн татах боломжтой юу

Сүүлийн үес УИХ-ын гишүүн Ц.Анандбазарт холбогдох мэдээллүүд цахим орчинд эрчээ авч байна. Сүнээ нэрээр олны танил иргэн Б.Сүндэръяагийн бичвэрээс эхтэй уг үйл явдал Ц.Анандбазар гишүүнийг удаа дараа бэлгийн хүчирхийлэл үйлдэхээр завдаж байсан гэх асуудалд холбож байгаа юм.

Хэдийгээр хууль, хяналтын байгууллага эцэслэн тогтоогоогүй байгаа ч олон нийтийн зүгээс Ц.Анандбазар гишүүний гэм бурууг шалгахыг уриалж, цаашлаад хүчирхийлэлтэй тэмцэх "MeToo” хөдөлгөөнийг ч өрнүүлж эхлээд байна.

Тэгвэл МАН-ын Удирдах зөвлөл Ц.Анандбазарыг УИХ-ын гишүүээс эгүүлэн татахаар ярилцаж байна гэх мэдээлэл түглээ. Нюансын хувьд МАН-ын дарга У.Хүрэлсүх Ц.Анандбазарт УИХ-ын сонгуульд нэр дэвших мандат олгох дургүй байсан гэгддэг. Тэр ер Ц.Анандбазарыг хүлээн авч уулздаггүй байсан.

Харин УИХ-ын дарга Г.Занданшатар Ц.Анандбазарт мандат олгох лоббиг хийсэн гэх бөгөөд, сонгуулийн дараа шинэ гишүүдийг хүлээн авч уулзсанд нь У.Хүрэлсүх ихээхэн дургүйцсэн гэдэг мэдээлэл байдаг. Ерөнхий сайд Л.Оюун-Эрдэнийн хувьд ч Ц.Анандбазар гишүүнд хэд хэдэн удаа таагүй хандлага үзүүлж, ил үгээр загнаж байсан гэх.

Нэг үгээр МАН доторх уур амьсгал Ц.Анандбазарт тийм ч сайнгүй байгаа юм.

Тэгвэл Үндсэн хууль болоод УИХ-ын тухай хуулиудад УИХ-ын гишүүнийг эгүүлэн татах, бүрэн эрхийг нь түдгэлзүүлэхтэй холбоотой дараах заалтууд бий:

Үндсэн хуулийн 29.3-т: Улсын Их Хурлын гишүүн бүрэн эрхээ хэрэгжүүлэхдээ өргөсөн тангаргаасаа няцаж Үндсэн хууль зөрчсөн бол түүнийг Улсын Их Хурлын гишүүнээс эгүүлэн татах үндэслэл болно. Улсын Их Хурлын гишүүн гэмт хэрэгт холбогдсон тухай асуудлыг Улсын Их Хурлын чуулганаар хэлэлцэж, бүрэн эрхийг нь түдгэлзүүлэх эсэхийг шийдвэрлэнэ.  Уул гишүүн гэмт хэрэг үйлдсэн гэж шүүх тогтоовол Улсын Их Хурал түүнийг гишүүнээс нь эгүүлэн татна.

УИХ-ын тухай хуулийн 10-р зүйлд: Дараах тохиолдол гишүүний бүрэн эрх энэ хуулийн 7.3-т заасан хугацаанаас өмнө дуусгавар болох үндэслэл болно:

10.1.1.Ерөнхийлөгчөөр сонгогдсон;

10.1.2.хүндэтгэн үзэх шалтгаанаар чөлөөлөгдөх хүсэлтээ өөрөө гаргасныг Улсын Их Хурал хүлээн зөвшөөрсөн;

10.1.3.хүндээр өвчилсний улмаас бүрэн эрхээ хэрэгжүүлэх боломжгүй болсон тухай эмнэлгийн дүгнэлт гаргасныг үндэслэн цаашид гишүүний бүрэн эрхээ хэрэгжүүлэх боломжгүй гэж Улсын Их Хурал үзсэн;

10.1.4.Үндсэн хуулийн цэц Үндсэн хуулийн Жаран зургадугаар зүйлийн 2 дахь хэсгийн 4-т зааснаар гишүүнийг эгүүлэн татах үндэслэлтэй гэсэн дүгнэлт гаргасныг Улсын Их Хурал хүлээн зөвшөөрсөн;

10.1.5.Үндсэн хуулийн цэц гишүүнийг энэ хуулийн 7.2-т заасан тангаргаасаа няцаж Үндсэн хууль зөрчсөн гэсэн дүгнэлт гаргасныг Улсын Их Хурал хүлээн зөвшөөрсөн;

10.1.6.гишүүн гэмт хэрэг үйлдсэн болох нь шүүхийн хүчин төгөлдөр шийтгэх тогтоолоор тогтоогдсон;

10.1.7.нас барсан.

10.2.Энэ хуулийн 10.1.2, 10.1.3-т заасан тохиолдолд гишүүнийг чөлөөлөх, энэ хуулийн 10.1.4, 10.1.6-д заасан тохиолдолд эгүүлэн татах тогтоол гаргах бөгөөд энэ хуулийн 10.1.5-д заасан тохиолдолд гишүүнийг эгүүлэн татах эсэх асуудлыг Улсын Их Хурал хэлэлцэн шийдвэрлэнэ. Энэ хуулийн 10.1.1, 10.1.7-д заасан тохиолдолд орон гарсан гэж үзэж энэ тухай Улсын Их Хурлаас шийдвэр гаргахгүй.

10.3.Гишүүнийг чөлөөлөх, эгүүлэн татах асуудлыг Төрийн байгуулалтын байнгын хорооны санал, дүгнэлтийг үндэслэн нэгдсэн хуралдаанаар хэлэлцэж, энэ хуулийн 10.1.4, 10.1.5-д заасан асуудлаар гишүүн саналаа нууцаар, энэ хуулийн 10.1.2, 10.1.3, 10.1.6-д заасан асуудлаар гишүүн саналаа илээр гаргана. Хуралдаанд оролцсон гишүүдийн олонх гишүүнийг чөлөөлөх, эгүүлэн татахыг дэмжсэн бол энэ тухай тогтоол баталсанд тооцно.

Г.САНСАРМАА

Энэ мэдээнд өгөх таны үнэлгээ

Хуваалцаарай Жиргээрэй