Нэг ойтой хүүхдэд АНАЛЬГИН ДИМЕДРОЛ тарьснаас хөхрөлт үүсч, дотор эрхтнүүд нь гэмтжээ

НЭМЭЛТ: 14:52 цагт

Хүүхдийн гэр бүлээс, "Эмнэлгийн дарга нар болсон явдлын талаар битгий цахим орчинд нийтлээч” гэсэн утгатай зүйлийг хэлсэн талаар тодруулахад үгүйсгэв. Харин ЭХЭМҮТ-ийн хэвлэлийн алба, хүүхдэд эмчилгээ хийж эхэлсэн ба өөр тодорхой мэдээлэл өгөх боломжгүй байна гэсэн хариу өглөө. ХУД-ийн эмнэлгээс л ийм байдалтай хүргэгдэж ирсэн хэмээн тус эмнэлгийн зүгээс мэдэгдэж буй.

Хүүхдийн биеийн байдал хэвийн байгаа ч, ар гэрийн сэтгэл санааны байдал хүнд байна.

Өнөөдөр /2019.08.22/ цахим орчинд нэгэн иргэн "Ойтой дүү маань халуурахад Хан-Уул дүүргийн хүүхдийн эмнэлгийн эмч тариа хийсэн, уг газарт нь хөхрөлт үүсэж одоо таван цулд нь нөлөөлж, эх нялхсын эрчимт эмчилгээний тасагт эмчлүүлж байна” гэх мэдээллийг тавьсан юм. Тэрбээр,

2019 оны наймдугаар сарын 13-ний өдөр миний дүү халуурсны улмаас Хан-Уул дүүргийн хүүхдийн эмчид хандахад, халуун бууруулах тариа хийсэн. Гэтэл маргааш нь тариа хийсэн хэсэгт хөхрөлт үүссэн учир ЭХЭМҮТ-д үзүүлэхэд үмхий ногоон тос түрхэж өгөөд буцаасан. Одоогоор дотор эрхтнүүд нь гэмтсэн байна. Хариуцсан эмч нь, "Энэ хүүхдийн төлөө чадах бүхнээ хийж байна, битгий ойр ойрхон асуугаад бай” гэж хэлсээр өдий хүрсэн. Эхээсээ эрүүл саруул төрсөн хүүхдийг ийм болгож байдаг хэмээн өөрийн нүүр хуудсанд мэдээлсэн.

Үүний дагуу бид тухайн иргэн И.Булганаас тодруулга авахад,

Дүүгийн минь биеийн байдал тун муу одоо Эх нялхсын эрчимт эмчилгээний тасагт эмчлүүлж байна. Энэ сарын 20-ны 16 цагийн орчимд Хан-Уул дүүргийн Яармагт байрлах хүүхдийн эмнэлэгт үзүүлэхэд анальгин димедрол тарьж явуулсан гэсэн. Гэвч маргааш нь дүүгийн минь тариа хийсэн газарт хөхрөлт өгч, ийм байдалтай боллоо. Юуны учир ийм байдалд орж, бүх эрхтэнд нь нөлөөлөх болсон шалтгааныг тодруулахаар өчигдөр шинжилгээ авсан. Хариу 72 цагийн дараа гарна гэсэн учир бидэнд хүлээхээс өөр арга алга. Дүүгийнхээ биеийн байдлыг ажаад бүгд эрчимт эмчилгээний тасгийн гадаа хүлээж сууна. Эргэлтийн цаг нь 7:30-19:30 хүртэл л байна. Тааруу байна гэсэн учраас аргагүйн эрхэнд санаа зовж нийгмийн сүлжээнд энэ талаар нийтэлсэн.

Гомдол гаргасан 1111 төвөөс ямар ч хариу алга. Бяцхан амьтныг алдчих вий гэхээс л айж байна хэмээн ярилаа.

Бид энэ талаар эргэн мэдээлэх болно.

Д.ЖАРГАЛМАА

Энэ мэдээнд өгөх таны үнэлгээ

Хуваалцаарай Жиргээрэй