ХӨШИГНИЙ АРД: Х.Баттулгад Л.Оюун-Эрдэнэ хамтрах санал тавьж, генсек нь ч дэмжжээ

Ерөнхий сайд Л.Оюун-Эрдэнийн ахалдаг олимпизмыг дэлгэрүүлэх чиглэл бүхий үндэсний хорооны гишүүн, орон тооны бус зөвлөхөөр Ерөнхийлөгч асан Х.Баттулга ажиллахаар болсон гэх. Тэр Л.Оюун-Эрдэнэд ойр ажиллана гэдгээ ингэж ил зарлалаа. Яг яагаад, хөшигний ард юу болов. Хэн нь санал тавьсан бэ. Шийдвэр гаргахад хэн хэн оролцов агуулгаар хөшигний ар дахь нюансуудыг хүргэж байна.

ХАМТРАН АЖИЛЛАХ САНАЛЫГ Л.ОЮУН-ЭРДЭНЭ ТАВЬЖЭЭ

Нам, улстөрийн үзэл баримтлал, томчуудын бизнесийн эрх ашгийг үл хамаарч хэн бүхэнтэй гар барьдаг нэг ширхэг хүн гарч ирэв. Тэр бол Ерөнхий сайд Л.Оюун-Эрдэнэ. Гэхдээ өчигдрийн Ерөнхийлөгч асан Х.Баттулгыг дэргэдээ авах шийдвэр хүртэл олон нийт тэгтлээ их гайхшираагүй. Учир нь, тэр намаа авахын тулд нам дотроо бол хэнтэй ч эвсэж болох. Гэтэл Ерөнхийлөгч асан Х.Баттулгыг дэргэдээ татсан нь МАН-ын жирийн гишүүдийг жинхэнэ алмайруулав.

Эх сурвалжуудын мэдээллээр бол, Ерөнхий сайд Л.Оюун-Эрдэнэ Ерөнхийлөгч асан Х.Баттулгатай ажиллах саналыг эхлээд тавьжээ. Харин Х.Баттулгын зөвшөөрсөн гол учрыг төмөр замын асуудал гэж харж болохуйц. Тэднийг ойртоход голлох зөвлөгөөг Л.Оюун-Эрдэнийн ах Херо Б.Баатар, зөвлөх А.Амундра нар өгсөн гэх хувилбар. Гэвч тэдэнтэй, тэдэнгүй томчууд нь ярьчих боломжтой.

Гэхдээ энд А.Амундрагаар дамжуулж, Голомтын Б.Баясгалангийн холбоос ба эрх ашиг яваа гэх логик харагдаж буй. Тэрбээр Ерөнхий сайд Л.Оюун-Эрдэнийн идэвхийлэн ярих болсон Богдхан төмөр замын ажилд оролцохоор яригдаж байгаа. Том утгаараа Б.Баясгалангийн барилцаж, А.Амундрагийн удирдаж байсан Зүүнбаян-Хангийн төмөр замыг ч Ерөнхийлөгч асан Х.Баттулга туйлаас чухалчилж үзсэн билээ. Төмөр замыг зогсоохгүй бас ухуулж шалгуулахгүй нь түүнд ихээхэн чухал юм.

Д. АМАРБАЯСГАЛАН ӨЧИГДӨР ЕРӨНХИЙ САЙДЫН ӨРӨӨНД ӨНЖЖЭЭ

МАН-ын генсек Д.Амарбаясгалан бүр 2020 оны УИХ-ын сонгуулийн өмнө Ерөнхийлөгч Х.Баттулгыг налсан гэх мэдээлэл ойр тойрноос нь гарч байв. Итгэхэд бэрхтэй ч Ерөнхийлөгчийн сонгуулийн өмнө ч бас бус саналуудаа тавьсаар байсан гэгдэв. Тэрбээр өчигдөр Ерөнхий сайд Л.Оюун-Эрдэнийн өрөөнд бүтэн өдөр суусных нь дараа Х.Баттулга, Б.Долгион нарт хамаарах шийдвэр гарч таарав.

Ерөнхийлөгч асан Х.Баттулгыг Сонгинохайрхан дүүргийн нөхөн сонгуульд оролцоно гэж эртнээс бичигдсэн. Гэвч ойрын өдрүүдэд энэ чимээ баахан хүчгүй болсон нь эл орон тоотой ч хамаатай байж болох. Л.Оюун-Эрдэнэ, Д.Амарбаясгалан нар эл тоглолтоороо У.Хүрэлсүхээ хөшигний гадна үлдээж, шинэ цөм үүсгэхийг зорьсон нь анхаарал татна. Цаашид ч түүнийг аньсан, гол тоглогчоос хассан үйлдлүүд явагдана гэх мессижийг өгч, бэлгэдлийн утга руу нь дөхүүлсэн гэлтэй.

Х.Баттулга Засгийн газарт нөлөөтэй хэвээр гэдгээ ингэж зарлалаа. Цагтаа Л.Оюун-Эрдэнийн томилгоог ч дэмнэж, Х.Нямбаатар, Д.Сумъяабазар, С.Амарсайхан гэхчлэн толгой дараалан, сайд нарын нэр өгсөөр, томилуулсаар ирсэн. Өнөөгийн толгойгүй сайд нараас Ч.Номин, Г.Ёндон, Л.Халтар тэргүүтнийг зүгээр л хумиад дарчих хэмжээнд нөлөөлж байсан. Тэр энэ бүхнээ зүгээр нэг орхиод явчихгүй юм.

Х.БАТТУЛГА БА Л.ОЮУН-ЭРДЭНЭ

Засаг дотроо Д.Сумъяабазар, Л.Оюун-Эрдэнэ нар Ерөнхийлөгч рүү гүйдэг гэх баахан муу нэртэй явсан түрүүчийн танхимын түүх мартагдаагүй. Тэд одоо нэгдэх нь хоёуланд нь ашигтай. Угаас ил далдаар ойрын хүмүүс гэж яригдсаар байдаг харилцааг олон нийтэд бүр нээлттэй болгож байгаад, улс төрийн тоглолтоо хийе. Үүндээ МАН-ын генсекийг ч орхихгүй дагуулъя гэж тохирсон логик харагдана.

Хамгийн гол нь, тэд ингэж нэгдэж чадвал МАН-ын далд эзэн С.Батболдын эсрэг хүчээ нэгтгэнэ гэсэн үг. Цаашлаад Г.Занданшатарыг тойрсон, түүнийг хөөргөдөг хүчүүдийг Л.Оюун-Эрдэнэ дээр цуглуулж чадна. Хотын асуудал дээр сайхан эв найртайгаар тохироонд орно гэхчлэн ойр зуурын, хол ойрын эрх ашгууд нэлээд нийлэх юм.

Олон нийтийн хүлээж болох сэдвүүд нь, Оюутолгой дээр яг ямар зарчим баримтлах асуудалд Х.Баттулгын нөлөөлөл орж чадах уу. Говийн агуа их цөлжилтийг яаж сааруулах, Аж үйлдвэрийн чиглэлд яг бодтой өөрчлөлтүүд хийгдэх үү, оффшороо хэрхэх юм зэрэг төрийн тэргүүний хувьд санаагаа чилээж явсан том асуудлууд. Гэвчиг яг бодит үр дүн гарахыг хүлээх нь бас хэт романтик төсөөлөл юм. Ямар ч байсан МАН төрийн тэргүүн аснаа ухаж шалгахааргүй л болов.

Энэ мэдээнд өгөх таны үнэлгээ

Хуваалцаарай Жиргээрэй