Л.Оюун-Эрдэнийн ЯВУУЛЖ, ТОХИРОЛЦОЖ, ЗӨВЛҮҮЛЭХ бодлоготой экс Ерөнхийлөгч нар

Ерөнхий сайд Л.Оюун-Эрдэнэ экс Ерөнхийлөгч нар дээр барьж буй бодлого их сонирхолтой. Нэгийг нь явуулж, нөгөөтэй нь хэлцэл тохироо хийж, үлдсэнийг нь зөвлөхөөрөө авч байгаа. Тодруулбал,

Н.Багабанди У.Хүрэлсүхийг найрч Оюутолгойн ТУЗ-д үлдэж чадсан.  Гэхдээ одоогийн Ерөнхий сайд Л.Оюун-Эрдэнэ явуулахаар зэхэж байгаа. Чөлөөлөх сануулгаа өгөөд удаж буй. Харагдах байдлаасаа бол жирвийсэн сахалтай, жимбийсэн царайтай, сүрхий “дипломатч” эрхэм. Бодит байдал Монголын төрийн тэргүүнээр ажиллаж байсан хүн монголын хамаг л өнгөтэй өөдтэй “Оюутолгой”, “Эрдэнэт үйлдвэр”, “Эрдэнэс тавантолгой” зэрэг компаниуд дээр сандайлаад суучихсан. Монголын баялгийн сан энэ хүний үед огтоос хөдлөөгүй билээ. Түүнийг явуулах бярыг Л.Оюун-Эрдэнэ гаргах буй за.

Харин Н.Энхбаяртай улстөрийн тохироог утгаар нь хийв. Түүний хүүд нөхөн сонгуулийн тойрог хаяж өгсөн явдал. Нэг талаараа бол МАН-тай эвсэлцсэн түүнийг засагтаа оруулахгүй, самруулахгүй гэх гол бодлого барьж байгаа гэж харагдахаар. Э.Батшугар нь уначихвал өөдөөс нь бүр хэлэх үгтэй.

Экс Ерөнхийлөгч Х.Баттулгыг харин зөвлөхөөрөө авсан гэдэг гэнэтийн мэдээлэл нүд бүлтийлгэж, чих дэлдийлгэсэн. Үүнд нь МАН-ын зарим гишүүд илт дургүйлхсэн. Гэвч ах нараасаа айж ичсэнгүй. Тэр танай, манай нам гэж ялгаварлахгүй байх улстөрийн бодлого барьж буйгаараа ах нараасаа ялгарч чадлаа. Намрын чуулганаар өрнөж болзошгүй сөрөг хүчний улс төрийн эсрэг зогсох хүч гэж харах үүднээс ч хажуудаа авсан байх. Х.Баттулгын хувьд ч зүгээр оччихоогүй нь лав.

Ерөнхийд нь харвал тэр залуу ч гэлээ бүхнийг бодлоготойгоор хийж, хөдөлгөж байгаа биз. Бугшсан Н.Багабандийг явуулж, өөдөөс нь өрвөлзөж мэдэх Н.Энхбаярыг хүүгээр нь дамжуулан намнаж, сөрөг хүчнээ өөртөө уусгав. Энэ утгаараа түүний экс Ерөнхийлөгч нар дээр баримталсан бодлого зэвүүн хэрнээ, гоё байв.

Энэ мэдээнд өгөх таны үнэлгээ

Хуваалцаарай Жиргээрэй