ПРОГНОЗ: Д.Амарбаясгалан, Н.Энхбаяр, С.Батболд, М.Энхболдын хүмүүст сайдын суудал өгөх ШИНЭ БҮТЭЦ

МАН-ын бодож олсон мэргэн аргын дагуу ҮХЦ ирэх даваа гарагт давхар дээлтэй сайд нарыг олшруулах боломж гаргаж өгөхөөр дунд суудлаараа хуралдана. Энэ өдрүүдэд танхимаасаа явах сайд нарын нэрс үндсэндээ тодорч, үлдэх цөөн хэд нь аз эзэндээ найдаж буй. Бид өмнөх прогнозоороо Х.Нямбаатар, Б.Жавхлан, Л.Энх-Амгалан нарын давхар дээлтэй сайд нар ҮЛДЭЖ, дан дээлтэйгээс З.Мэндсайхан, Н.Тавинбэх нар ХОЦОРЧ мэдэхээр байна гэх агуулгыг хөндсөн.  

Өмнө нь бичсэнчлэн эдүгээ У.Хүрэлсүхийн найз нарын орон зайд Н.Энхбаяр, С.Батболд, М.Энхболд нар хүмүүсээ сайдаар томилуулах чигтэй буй. Мөн МАН-ын генсек Д.Амарбаясгалангийн хувьд Б.Мөнхбаатар, А.Ариунзаяа, С.Амарсайхан нарын заримынх нь оронд шинэ багаа зүтгүүлнэ гэх хүлээлттэй байна. Түүнчлэн ЗГХЭГ-ын дарга Ц.Нямдоржийг огцруулж, МАН-ын фракциудыг тэнцвэржүүлэх дүрд албан тушаалыг нь өгөх чигтэй байгааг оншлууштай. Ингээд энэ удаагийн прогнозоороо шинэ Засгийн газрын бүрэлдэхүүнд хэн хэн орж ажилахаар лоббидож буйг тоймлов.  

Д.АМАРБАЯСГАЛАН ШАДАР САЙДЫН КВОТОО ХАСЧ, ХОЁР САЙД ШИНЭЭР ТОМИЛУУЛАХ УУ

Шинэ танхимын сайд нарын бүрэлдэхүүнд Л.Оюун-Эрдэнийн дараах том эрх мэдлийг хэрэгжүүлэх хүн бол МАН-ын генсек Д.Амарбаясгалан. Тэрбээр энэ удаагийн танхимд А.Ариунзаяа, Б.Мөнхбаатар, С.Амарсайхан, Н.Тавинбэх нарыг томилуулсан. Тэднээс А.Ариунзаяа, Н.Тавинбэх нарыг авч үлдэх амбицаа илэрхийлсэн гэх. Сүүлийн өдрүүдэд Б.Мөнхбаатар, С.Амарсайхан нар жигтэйхэн их ажилтай хүмүүс болж, танхимын шийдвэр гараагүй агуулгаар хүртэл ярин, ганцаарчилсан тоглолт хийх болов.

МАН-ын генсек Д.Амарбаясгалангийн хувьд Цахим хөгжлийн яамны хөгжлийг чиглүүлэх өндөр амбицтай. Ирэх оны эхнээс эмхлэн байгуулагдахаар хуульчлагдсан уг яамыг Н.Учрал гишүүнд өгөх тохироо үндсэндээ хийгдсэн. Тэрбээр Б.Энх-Амгаланг сайдад дэмжсэн ч Ерөнхий сайд “сул” гэж дүгнэсэн гэх мэдээлэл байна.

Н.ЭНХБАЯР ШАДАР САЙД, БАЙГАЛЬ ОРЧНЫ САЛБАРЫГ “АВНА”

Намаа татан буулгаж, У.Хүрэлсүхийн саналыг хуваалцах эрсдэлээс түдгэлзсний хариуд Н.Энхбаярт МАН нэлээд олон албан тушаал өгөх учиртай. Тэрбээр Б.Тулгыг БОАЖ-ын сайдаар томилуулахаар зүтгүүлээд нэлээд удаж буй. Энэ удаа ч байр сууриа хэвээр хадгалж байгаа аж. Улмаар генсект С.Амарсайханы суудлыг өөрийн талдаа өгөх тулгалт хийж, тэр нь нааштайгаар шийдэгдэх хүлээлттэй байна.  Уг суудлууд дээр Ж.Мөнхбат сонгогдох өндөр амбицтай. Тэрбээр Н.Энхбаяртай нэг аймаг гэдэг утгаараа түүний квотод орж тоологдох боломжтой юм. Мөн хэсэгтээ урваж үзсэн М.Энхболдын талаас ч гэж харж болох юм. Мөн энэ талаас Б.Чойжилсүрэнд Барилга хот эсвэл Эдийн засгийн хөгжлийн яамны аль нэгийг өгөхөөр байна. Түүнийг давхар хотын дарга Д.Сумьяабазар дэмжих юм. Б.Чойжилсүрэнтэй зэрэгцэн Ж.Ганбаатар сайдын суудалд ил цагаанаар улайрч байгаа ч эцэслэн шийд гараагүй байна.

 У.ХҮРЭЛСҮХИЙН НАЙЗУУДЫН КВОТЫГ ЗАДАЛЖ ТАРААНА

Ерөнхийлөгч У.Хүрэлсүхийн найзууд болох Л.Халтар, Г.Ёндон, Б.Сайханбаяр нарыг явуулах нь тодорхой болсон. Уг суудлуудыг Л.Оюун-Эрдэнэ жижиглэж, бүлэг дотроо нөлөөтэй хэд хэдэн гишүүнд өгөх чигтэй буй. Тухайлбал, С.Бямбацогт, Б.Бат-Эрдэнэ нарын гишүүд сайдад горилох амбицаа илэрхийлсэн. Ц.Нямдоржийн суудлыг С.Бямбацогтод өгөх хувилбар яригдаж буй. Б.Бат-Эрдэнэ гишүүн БХ-ын сайдаар очих нь бараг тодорхой болжээ. С.Бямбацогтын од гийвэл Ц.Нямдоржийн суудлыг авч мэднэ гэх.

Мөнхүү Оюутолгойн тогтоолын төслийг УИХ-аар хэлэлцүүлэх дэмжлэгийн хариуд Ц.Даваасүрэн, Х.Болорчулуун нарт нэг сайдын албан тушаал өгөх тохироонд хүрсэн гэх. Үүнд ХХААХҮЯ, Эрчим хүчний яамд нэрлэгдэж байна. Ихээхэн мөнгө эргэлддэг эл хоёр яамыг тэд хараандаа аваад нэлээд удаж буй.

ЭМЭГТЭЙ ГИШҮҮДЭЭС М.ОЮУНЧИМЭГ, Б.САРАНЧИМЭГ НАРТ САЙД ӨГӨХ ҮҮ

Сайд нарын жендерийн байдлыг хангах үүднээс УИХ-ын эмэгтэй гишүүдэд сайд өгөх шаардлагатай тулгарч буй. Одоогоор сайд болох амбицаа М.Оюунчимэг, Б.Саранчимэг нар илэрхийлээд байгаа гэх. Тэгвэл энэ удаагийн прогнозоороо шинэ Засгийн газрын бүрэлдэхүүнд хэн хэн орж ажилахаар лоббидож буйг тоймлож байна. Шинээр томилогдсон гишүүдэд сайд өгөхгүй гэх шалтгаанаар Х.Булгантуяа, н.Мөнхцэцэг нарын нухацтай, ажилсаг гишүүд эрэмбээс хасагдаж буй аж.

С.БАТБОЛДЫН ФРАКЦАД САНГИЙН ЯАМ, ГАДААД ХАРИЛЦААНЫ САЛБАРЫГ ӨГӨХ ХУВИЛБАР

Л.Оюун-Эрдэнийн Засгийн газар байгуулагдахад хамгийн чимээгүй байсан хүн бол С.Батболд. Шинэ Засгийн газрынхан “С.Батболдын төр дэх гар хөлийг багасгана” зэрэг дэврүүн мөрөөдөлтэй ажилдаа орцгоосон. Гэвч тэдний энэ байр суурь өнөөдрөөс харахад тэгсхийгээд замхарсан дүр зурагтай харагдаж байгаа нь нууц биш.

Одоогийн байгуулагдах шинэ бүтцэд С.Батболд хоёр сайдын суудал авахаар тохиролцсон бөгөөд Сангийн сайд Б.Жавхлан уг квотод багтаж буй гэх. Ч.Хүрэлбаатар сайд болох гүн амбицтай яваа ч Б.Жавхлан дээр тохирсон гэх мэдээлэл байна. Үүн дээр Ц.Мөнх-Оргилд Гадаад харилцааны салбарыг өгөх тохироо хийгдсэн гэх мэдээлэл бий. Ц.Мөнх-Оргилын хувьд өмнө нь эл салбарыг удирдаж явсан түүхтэй нэгэн юм.

СЭТГҮҮЛЧИЙН ТЭМДЭГЛЭЛ: Ерөнхий сайд Л.Оюун-Эрдэнийн хувьд энэ удаа намын даргаа авсан гэдэг утгаараа өмнөхөө бодвол байр сууриа хамгаалсан томилгоо хийх боломжтой. Их хурлын өмнө хэд хэдэн фракцдаа сайд нараа аман байдлаар өмчлүүлчихсэн гэгдэж буй. Хэдий тийм ч тэр бодож байгаад, бодсноороо л хийх нь тодорхой. Сая Их хурал дээр гол хань болсон Х.Нямбаатар, Д.Амарбаясгалан, Д.Сумьяабазар нараа тэр гомдоохгүйг чухалчилна. Бусад дээр нь яг таг лобби хийгээд, салбараа урагшлуулах сайд нар сонгох нигуртай. Учир нь тэр 2024 онд намаа удирдаж сонгуульд орохын тулд одоо л чадалтай сайд нар сонгох учиртай билээ.

Энэ агуулгаарх өмнөх контент:

ПРОГНОЗ: Давхар дээлтэйгээс гурвыг, танхимын гаднах хоёр сайд үлдээж, БУСДЫГ НЬ ЯВУУЛНА нийтлэлийг ЭНД ДАРЖ уншина уу.

Энэ мэдээнд өгөх таны үнэлгээ

Хуваалцаарай Жиргээрэй