Н.Энхболд Л.Оюун-Эрдэнийн даалгавраар давхар дээлний маргааныг түр “УХРУУЛЖЭЭ”

Оноос өмнө юу юугүй л давхар дээлтэй сайд нартай болох хууль эрхзүйн орчин бүрдүүлэх гэснээ гэнэт болив, эрх баригчид. Чухам яагаад энэ агуулгаарх өчигдрийн /2021.12.27/ ҮХЦ-ийн хуралдааныг хойшлуулав. Ингэж хойшлуулснаар оноос өмнө ҮХЦ хуралдахгүй нь үндсэндээ тодорхой болов.

- ХОЙШЛУУЛАХ САНАЛЫГ Н.ЭНХБОЛД ГИШҮҮН ГАРГАЖЭЭ-

Үндсэн хуулийн цэцийн хуралдаан өчигдөр 10:00 цагаас товлогдоод байв. Гэвч УИХ-аас оролцож буй итгэмжлэгдсэн төлөөлөгчийн саналаар хойшлуулжээ. Тэрхүү төлөөлөгч нь Н.Энхболд гишүүн аж. Гэвч яагаад хойшлуулсан шатгаанаа хэн ч тайлбарлахыг хүссэнгүй. Угаас гаргах гэж буй шийдвэр нь нийгэмд хэт сөрөг мессижээр ойлгогдох нь тодорхой учир чимээгүйхэн шиг л байхыг талууд эрхэмлэж буй.

Мэдээж Н.Энхболд гишүүн өөрийн хүслээр хуралдааныг хойшлуулах санал гаргаагүй нь тодорхой.  Түүний саналыг цэцийн дунд суудлын бүрэлдэхүүн ч бас өөрсдийн саналаар зөвшөөрчихсөн хэрэг биш. Ерөнхий сайд Л.Оюун-Эрдэнэ, генсек нарын тархи сайтар ажиллаад, “Цаг нь биш байна” гэж нийгмийн уур амьсгалаа тооцсон байж болох. Яг Д.Эрдэнэбилэгтэй хэлцэл хийхгүйгээр “Эрдэнэт үйлдвэр”-ийг төрд авах тогтоолын төслөө гэнэт татсан шиг үйлдэл гаргав.

-ЦЭЦ Ч БАС АМЬД “АМЬТАД”-

Эрхэм Д.Одбаяр БНСУ-ын онгоцны үйлчлэгчийн өгзөгийг базаж, үүнээс өмнө Жастын Ш.Батхүүгийн хэрэгт Эрүүгийн хариуцлага хүлээх ёстой ч Д.Сугар цэцэд очиж нуугдсан зэрэг кэйсүүдээс үүдэж, ер нь зайсан дахь саарал байшингийнхан баахан нэр хүнд муутай болсон. Тэднийг Үндсэн хуулийн манаач биш эрх баригчдад үйлчилдэг ТАЗ шиг нэг агентлаг гэдгээр нь өнгөрөгч хаврын Ерөнхийлөгчийн сонгуулийн өмнөх түүхээр олон нийт хардаг болсон.

Нөхцөл байдал ийм байхад МАН-ын томчууд ёсчлоод удаагүй Үндсэн хуулиа хүчээр засуулна гэж тулгахаар цэцийнхэн яаж дуртай хүлээж авах вэ. “Үндсэн хууль зөрчсөн байна” гэж нүдээ аниад алх цохилоо гэхэд хэдэн жилдээ цэцийнхний нэр хүнд сэргэхгүй. Улам л уруугаа явах нигуртай. Тэд ч бас хүн л юм хойно, ийм хүчээр тулгасан агуулгаас ихээхэн болгоомжилж, маргаан авсан гишүүнээ ч хэлэхгүй нууцалж буй.

-Ш.АДЬШАА, Н.ГАНИБАЛ НАРЫГ НАМ ШАХСАН Ч Т.ДОРЖХАНД БУЦАХГҮЙ ГЭЖ ЗҮТГЭЖЭЭ-

Энэ хугацаанд ихэд муу нэр хүлээж, шүүмжлүүлж байгаа жагсаалтад Н.Ганибал, Ш.Адьшаа нар багтаж байгаа. МАН-ын зүгээс Д.Ганбат, Т.Доржханд нараар ҮХНӨ-ийг өргөн бариулахаар үзсэн боловч бүтэлтэй юм болоогүй. Эцэстээ Х.Баттулгын талын хоёр гишүүнийг “худалдан авч”, Д.Доржханд тэдний хүсэлтийг далдаас дэглэсэн юм. Энэ хугацаанд О.Цогтгэрэл нарын зүгээс “Л.Оюун-Эрдэнэд  урт удаан улс төр хийх боломжийг АН өгөх ёсгүй. Гомдлоо тат” гэсэн тулгалтыг намын хоёртоо хийж байсан.

Гэвч өнөөх хоёр нь хүлээж аваагүй. Тэд “Төр засаг тогтвортой байх ёстой” гэх өгүүлбэрээр гөжүүд залгасан ч ард нь Т.Доржханд ухруулахгүй байх бүх алхмыг хийсэн гэх. Мэдээж засаг төр солигдох, цаашид өрнөх улс төрийн процесс дунд тэднийг сайн ажиглавал ихээхэн хожилтой харагдах нь тодорхой юм.

СЭТГҮҮЛЧИЙН ТЭМДЭГЛЭЛ: ҮХНӨ-ийг хоёр дахь удаагаа хийх замаар нэг дэхээ засах санаа явсаар цэцэд гомдол  мэргэн арга болж хувирсан. Нэг нам олонх үед төрт хуулиндаа хүчээр халдаж буй энэ үйлдэл эвгүйтвэл нийгмийн замбараагүй байдал руу ч хөтөлж мэдэхээр. Энэ агуулгаар МАН-ын ихэнх гишүүд болгоомжилж байгаа ч томчуудынхаа бэлчиж буй зүг рүү эврээ сэжлэн алхах үхэр лүгээ чимээгүй яваа нь үнэн юм.

Магадгүй давхар дээлний агуулгыг өөр хэд хэдэн санаатай хамтатган гомдол гаргаж, тэднээс нэгийг нь шүүж авсан бол ирээдүйд өөрсдийгөө өмөөрч үг хэлэх арай том орон зай үлдэх байсан буй заа. Энэ цагийн хийрхлээ тэд гэвч барьж чадсангүй. Юманд яаран шунаж, нүд нь гэрэлтсэн тачаангуй байдлаа ч нууц чадсангүй. Цэцийг тэд хэсэг бодоод, дахин хөдөлгөх нь ч тодорхой юм. Чухам иймээс л Л.Оюун-Эрдэнэ Н.Энхболдод тодорхойгүй хугацаагаар маргааныг хойшлуулах чиглэл өгч, Зайсан дахь саарал байшин руу гүйлгэсэн логик эндээс уншигдана.

Энэ мэдээнд өгөх таны үнэлгээ

Хуваалцаарай Жиргээрэй