ХУРИМТЛАЛТАЙ ХҮҮХЭД ХӨТӨЛБӨР: Хадгалж л үзээрэй төр засаг минь

Монгол Улсын Засгийн газраас хүүхдийн мөнгө гэж сар бүр 20 мянган төгрөг өгдөг байсныг сонгууль угтаж 100 мянган төгрөг болгосон. Улмаар цар тахлын хүнд үеүүд үргэлжилж, улс орны эдийн засаг хүндэрсэн учир эл мөнгийг үргэлжлүүлж, хүүхэд бүрт өгөхийн тулд Азийн хөгжлийн банкны төслийн зээлийн мөнгийг хүртэл тараачихсан байдаг.

Тиймээс төсөвт асар их дарамт болж буй энэ мөнгийг хэрхэн яаж багасгах вэ, иргэдийг бухимдуулахгүй эвтэйхэн шийдчих вэ гэдэг арга бодож байгаад олсон санаа нь төр мөнгийг нь хадгалж байгаад насанд хүрэхээр нь хуримтлал байдлаар хүүхдэд өгөх “Хуримтлалтай хүүхэд” бодлого.

Тодруулбал ирэх долдугаар сар хүртэл хүүхдийн 100 мянгыг олгоод, долдугаар сараас олгодог арга зам болон дүнг өөрчлөхөөр болсон юм. Ингэхдээ 50 мянган төгрөгийг хуримтлуулах болон 50 мянган төгрөгийг бэлнээр хүлээж авах,  эсвэл 100 мянган төгрөгөө Төрийн санд хадгалах гэсэн сонголт үйлчилнэ. Эцэг эх, асран хамгаалагч нь сар бүр тухайн сонголтоо баталгаажуулах хуулийг ирэх долоо хоногт батлах нь.

Уг нь төсөвт үүсээд байгаа дарамт их байна гэж үнэнээ хэлээд буцаагаад 20 мянга болгох боломж байсан ч төр тэгсэнгүй. Хүүхдийн мөнгийг эцэг эхчүүд хадгалж чадахгүй байгаа учраас төр хадгалаад өгье гэх шийдвэр гаргав. Үүний цаана хүүхдийн мөнгийг энд тэндэхийн банканд хадгалуулж, хүү олж идэх гэж байна уу, тэгж байгаад хэдэн жилийн дараа хадгалж байсан банк дампуурчихлаа, юу ч байхгүй гээд зогсож байх вий гэх мэт болгоомжлолууд иргэдийн дунд үүсээд байна.

Жишээ нь тооцоолж үзвэл таван настай хүүхдийн хувьд сар бүр 50 мянгыг нь төр хадгалаад явбал жилд 600 мянга, 18 нас хүртэл нь 7.8 сая болж өсөх нь. Ингэхдээ хүүгүй гэсэн үг. Үнэхээр хадгалж чадаад, хүүхдийг насанд хүрэхэд нь өгдөг бол сайхан л санаа. Цаг хугацаа бүхнийг харуулна. Хадгалж л үзээрэй төр засаг минь.

Энэ мэдээнд өгөх таны үнэлгээ

Хуваалцаарай Жиргээрэй