Өнгөрсөн жил дэлхий даяар албан үүргээ гүйцэтгэж яваад амь үрэгдсэн сэтгүүлчдийн нас барсан тохиолдлын тоо сүүлийн гучин жилийн ихэнхтэй харьцуулахад бага байсан ч хэвлэл мэдээллийнхэнд үзүүлсэн дарамт, шахалт дээд амжилтыг эвдсэн хэмээн Олон Улсын Сэтгүүлчдийн Холбоо /IFJ/ лхагва гараг /2022.02.09/-т гаргасан тайландаа дурджээ.
Олон Улсын Сэтгүүлчдийн Холбооны 31 дэх жилийн тайланд, сэтгүүлчдийг гол бай болгон онилсон халдлага, бөмбөгдөлт, буудалцааны улмаас 47 сэтгүүлч амь насаа алдсан, мөн санамсаргүй байдлаар хоёр сэтгүүлч амь эрсэдсэн талаар дэлгэрэнгүй дурджээ. 2021 онд сэтгүүлчдийн амийг бүрэлгэсэн хүн амины хэрэг 2020 онтой харьцуулахад 18 хувиар буурсан ажээ.
“Хэдийгээр 2021 онд хүн амины хэрэг 18 хувиар буурсан ч сэтгүүлчид болон хэвлэл мэдээллийн эрх чөлөөнд заналхийлэх заналхийлэл эрс нэмэгдсэн” хэмээн тайланд онцолжээ.
“Олон Улсын Сэтгүүлчдийн Холбооны гишүүн сэтгүүлчдийг саатуулсан үзүүлэлт дээд амжилт тогтоосон. 365 сэтгүүлч сурвалжилга хийж, мэдээлэл хүргэснийхээ төлөө шоронд хоригдсон нь өмнөх 2020 оныхоос мэдэгдэхүйц өссөн үзүүлэлт. Тодруулбал, 2020 онд 235 сэтгүүлч хоригдсон. Хэвлэлийн эрх чөлөөнд ноцтойгоор халдсан эдгээр халдлагууд нь хэвлэл мэдээллийн хэрэгсэлд маш сөрөг нөлөө үзүүлсэн” гэжээ.
Олон Улсын Сэтгүүлчдийн Холбооны мэдээлснээр, сэтгүүлчдийг зүгээр л эсэргүүцлийн хөдөлгөөнийг сурвалжилсан эсхүл коронавирусийн хямралын талаар олон нийтийн ашиг сонирхлын талаар мэдээлэхийг оролдсоных нь төлөө баривчилж, гэмт хэрэг үйлдсэн хэмээн буруутгаж байгаа нь улс орнуудын эрх баригчдын хууль дүрэмд нийцэхгүй бусармаг үйлдэл гэж буруутгалаа.
“2021 онд сэтгүүлчдийн мэдээлэлд халдахдаа “Пегасус” /Pegasus/ гэх гар утасны тагнуулын програм ашиглаж, хэвлэлийн эрх чөлөөнд заналхийлсэнийг бид олж мэдсэн” хэмээн Олон Улсын Сэтгүүлчдийн Холбоо онцлон тэмдэглэжээ.
“Эх сурвалжийн нууцлал болон сэтгүүлчдийн хувийн мэдээлэлтэй холбоотой нууц гэх зүйл цаашид нууц гэж үзэх үндэслэлгүй боллоо” хэмээн дурджээ.
“Сүүлийн нэг жилийн хугацаанд хамгийн багадаа долоон эмэгтэй сэтгүүлч дэлхийн өнцөг булан бүрт ажиллаж, ажлаа хийж байгаад амь үрэгджээ. Ялангуяа, Афганистан бол хамгийн олон сэтгүүлчийн амийг авч одсон улс” хэмээн Олон Улсын Сэтгүүлдчийн Холбоо мэдэгдээд, дэлхийн өнцөг булан бүрт эмэгтэй сэтгүүлчдийг онлайнаар, сошиалаар ил, далд хэлбэрээр дарамталсан заналхийлэл байгааг буруутгаж, редакц болон Засгийн газрууд хэвлэлийн эрх чөлөөнд халдсан заналхийлэл, дарамтыг арилгахад дорвитой арга хэмжээ авахыг тус байгууллага уриаллаа.
(Эх сурвалж: The International Federation of Journalists)
АНХААРУУЛГА: Уншигчдын бичсэн сэтгэгдэлд Eguur.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.