БТСУХ-ноос паралимпэд оролцох зардалд зориулж даргад 24, тамирчинд 13 сая төгрөг өгчээ

-БТСУХ-ны дарга Ц.Одонбаяр, Н.Оюунбат нарт улсын төсвөөс 48 сая төгрөг олгосон атлаа тамирчинд 13 саяыг өгчээ-

Төсвийн мөнгө “Ёо” гэхгүй ч төрийн албаныхны тансаглах, эрх мэдэл, давуу байдлаа ашиглан зувчуулах, халаасаа түнтийлгэх хэрэгсэл огт биш. Цар тахалтай, хаана хаана бүсээ чангалж буй өнөө цагт гэлтгүй бүхий л үед төсвийн мөнгийг гамнах, зардлаа хэмнэх чухлаас чухал.

Ерөнхий сайд Л.Оюун-Эрдэнэ цар тахалтай өнөө цагт төсвийн мөнгийг хэмнэх, үргүй зардал гаргахгүйн тулд гадаад томилолтыг хориглох ТОГТООЛ гаргаж, тодорхой чиглэл өгсөн.

Эл тогтоолын 5.4-т

"Бүх шатны төсвийн байгууллагын гадаад албан томилолт, зочин төлөөлөгч хүлээн авах, тавилга, эд хогшил, ном хэвлэл худалдан авах болон хэвлүүлэх, сурталчилгаа хийх, бэлэг дурсгалын зүйлс бэлтгэх, биеийн тамирын уралдаан тэмцээн, салбарын болон байгууллагын тэмдэглэлт ой, баяр ёслолын арга хэмжээ зохион байгуулах, салбартай холбоотой киноны уран бүтээл хийх, төрийн захиргааны төв байгууллагуудын тээвэр, шатахууны зардал, төрийн тусгай чиг үүргийн байгууллагаас бусад төрийн байгууллагууд шинээр автомашин худалдан авах зардал, захиргааны албан контор шинээр барих зардлыг тус тус 100 хувь, бүх шатны төрийн байгууллагын бичиг хэргийн зардлыг 50 хувь, коронавируст халдварын цар тахалтай тэмцэж байгаа эрүүл мэнд, онцгой байдал, цагдаа, мэргэжлийн хяналт, хил, гаалийн байгууллагаас бусад бүх шатны төрийн байгууллагын дотоод албан томилолтын зардлыг 50 хувь тус тус хэмнэх чиглэл баримтлах" гэж заасан байдаг.

Үнэндээ эл тогтоол бодит амьдрал дээр хэрэгжиж байгаа юу, төрийн албаныхны тансаглал багассан уу гэвэл үгүй. Үүний нэг нь “Бээжин-2022” паралимпийн наадамд оролцох Монголын багийн бүрэлдэхүүнд багтан Хятадад очсон, Засгийн газрын хэрэгжүүлэгч агентлаг, Биеийн тамир спортын улсын хорооны дэд дарга Ц.Одонбаяр, Гадаад харилцаа, мэдээлэл технологийн хэлтсийн дарга Н.Оюунбат нарын жишээ. Тэд Бээжингийн паралимпын наадамд оролцохын тулд зардалдаа зориулж улсын төсвөөс 48 сая 185 төгрөг гаргуулжээ.

Энэ талаар "Шилэн данс"-нд байршуулсныг ЭНД дарж харна уу.

БТСУХ-ны ДАРГА Ц.ШАРАВЖАМЦЫН ТУШААЛ

ЗАРДЛЫН ЗАДАРГАА

ХЭРВЭЭ ТАМИРЧДЫН ТОСГОНД БАЙРЛАВАЛ ТЭДНЭЭС БАРАГ ЗАРДАЛ ГАРАХГҮЙ

Ц.Одонбаяр, Н.Оюунбат нар БТСУХ-г бүр цаашлаад Монгол Улсыг төлөөлөн “Бээжин-2022” паралимпэд очсон тул улсынхаа багийн хамт тамирчдын тосгонд байрлах магадлал өндөр. Тамирчдын тосгонд байрлах албаны хүн, тамирчдын зардлыг олимп, паралимпын наадмыг зохион байгуулагч тал хариуцдаг учиртай, уг нь. Гэхдээ “Бээжин-2022” өвлийн олимпын үеэр тамирчдын тосгонд байрласан тамирчин, дасгалжуулагчдаас хоногт 50 ам.доллар авсан гэнэ.

Тэгэхээр Ц.Одонбаяр, Н.Оюунбат нар олимпын тосгонд дээрх зардлаар байрлах боломжтой. Тийм атал буудал, хоолны бас бус зардал гэсэн нэрийдлээр улсын төсвөөс 48 сая төгрөг гаргуулж авсан байгаа юм.

ТЭД ХОНОГТ 1.7 САЯ ТӨГРӨГӨӨР БУУДАЛД БАЙРЛАХААР ТООЦЖЭЭ

Дээрх зардлын задаргаанаас харахад, БНХАУ-д нэг нь 12, нөгөө нь 11 хонохоор төлөвлөж. Тэгэхдээ зөвхөн буудлын мөнгөнд л гэхэд ганцхан хоногт нэг нь 896 мянган төгрөг, хоёулаа нийлээд нэг сая, 792 мянган төгрөг зарцуулахаар тооцоолжээ. Тэгэхээр дээрх хоёр дарга Бээжингийн паралимпийн наадамд очоод ирэхийн тулд зөвхөн буудлын зардалд л гэхэд 20 сая төгрөг зарцуулах нь.

БТСУХ-НООС ПАРАЛИМПЭД ОРОЛЦОХ ЗАРДАЛД ЗОРИУЛЖ ДАРГАД 24, ТАМИРЧИНД 13 САЯ ТӨГРӨГ ОЛГОЖЭЭ

“Бээжин-2022” паралимпийн наадамд оролцохоор Монгол Улсаас гурван тамирчин (Б.Ганболд, Ц.Дашдорж, Б.Цэрэнпунцаг), гурван дасгалжуулагч (Ж.Дашдондог, Д.Очирсүх, Н.Ганбаатар), нэг эмч (М.Булган), нэг сэтгүүлч (Д.Батжаргал) БНХАУ-ыг зорьсон.

Агентлагийнхаа хоёр даргыг паралимпэд очиход зориулж 48 сая төгрөг баталсан атлаа хамгийн гол хүмүүс болох тамирчин, дасгалжуулагч, эмч, сэтгүүлч нийлсэн найман хүний зардалд 104 сая төгрөг төсөвлөжээ. Тэгэхээр нэгэнд нь 13 сая төгрөг оногдсон гэсэн үг.

Дарга болохоор паралимпын наадамд 24 саяар очдог, Бээжингийн дэвжээнд хурд сорих, улсынхаа нүүр царай, хамгийн гол хүмүүс болох тамирчинд 13 саяыг өгсөн нь шударга зүйл мөн үү. Хоёр дарга нь ийм зардал гаргуулах гээд ороод ирэхэд нь гарын үсэг зураад, зөвшөөрсөн БТСУХ-ны дарга, Гавьяат тамирчин Ц.Шаравжамц ч мөн үүнд буруутай. Хоёр даргынхаа зардлыг танаад паралимпэд оролцох тамирчин, дасгалжуулагчдаа нэмээд олгох сэтгэл, самбаа түүнд дутчих шиг боллоо.

Спортынхон тэмцээнээс тэмцээний хооронд, тэмцээн, бэлтгэлийн зардал гэсээр санхүүгийн хүнд нөхцөлд байдгийг бид сайн мэднэ. Хэрвээ хоёр даргын зардлаас танаад, эсвэл бүр болиулаад хэмнэсэн мөнгөө нэг тамирчинд олгосон 13 сая дээр нэмээд өгсөн бол их нэмэр, дэм болж, урам өгөх байсан нь мэдээж.

“Бээжин-2022” олимп, паралимпын наадамд улсаа төлөөлж заавал очих учиртай хүмүүс бол дарга нар бус тамирчид. Дарга нарыг бус тамирчдаа л дөмөгхөн тордож, улсын төсвийн мөнгийг улайлгаад ч болтугай дэмжих чухал байлтай, уг нь.

БТСУХ ЗАРДЛАА ХЭМНЭХИЙН ТУЛД БЭЭЖИНГИЙН ӨВЛИЙН ОЛИМПОД БНСУХ-НООС ТӨЛӨӨЛЛӨӨ ЯВУУЛААГҮЙ

Өнөөдөр Монголын эдийн засаг ямар хүнд байгаа билээ. Ард түмний амьдрал өдрөөс өдөрт сөхөрч, өнөөдрийн хоол, маргаашийн талхны мөнгөө яая гэж буй. Гэтэл захын нэг агентлагийн хоёр дарга паралимпын наадамд оролцохын тулд 48 сая төгрөг салхинд хийсгэх нь. 48 сая төгрөг гэдэг бага мөнгө биш. Үнэндээ Бээжингийн паралимпийн наадамд Ц.Одонбаяр, Н.Оюунбат хоёр явах зайлшгүй шаардлага байсан эсэх эргэлзээтэй.

Учир нь Монголын үндэсний паралимпийн хорооны удирдлага, албаны хүмүүс паралимпэд оролцох гурван тамирчин, дасгалжуулагчтай хамт явсан юм чинь. Тэгэхээр Ц.Одонбаяр, Н.Оюунбат хоёрыг үлдээн, иргэд бидний татварын мөнгө болох 48 сая төгрөгийг хэмнэж болох байсан уу гэвэл байсан.

Хэдхэн хоногийн өмнө болсон Бээжингийн өвлийн олимпод БТСУХ зардлаа хэмнэхийн тулд төлөөллөө илгээгээгүй. Энэ удаа ч мөн тэгж зардлаа хэмнэхэд хүмүүс гайхахгүй, шүүмжлэхгүй нь ойлгомжтой. Гэтэл чоно борооноор гэгчээр ийм юм болчихлоо. Нөгөө талаар гадаад томилолт, хэмнэж болох бүхий л зардлыг хэмнэнэ гэсэн Ерөнхий сайдын чиглэл, Засгийн газрын тогтоолыг БТСУХ-ны хоёр дарга үл тоолоо, 48 сая төгрөг тэдэнд юу ч биш бололтой.

Б.ОДОНБАЯР ГЭЖ ХЭН БЭ

Спортын салбарт, даргын ширээнд хамгийн олон жил тухалж суугаа хүмүүсийн нэг. 2000-аад оны дунд үеэс БТСУХ-нд ажилд орж, шат шатны албан тушаалд зүтгэсээр яваа. 2020 онд БТСУХ-ны дэд даргаар томилогдсон тэрбээр аль ч нам, Засгийн үед Спортын төв ордонд, БТСУХ-нд үлдчихдэг сүүхэйтэй эр.

Ц.Одонбаяр өнөө жил тэтгэвэртээ гарч буй. Спортын салбарт чанагдсан, салбараа 10 хуруу шигээ мэддэг, чадварлаг боловсон хүчин мөн үү гэвэл биш. Ямар ч Засгийн үед албан тушаалдаа үлдчихдэг, хөөрхөн хор найруулчихдаг, бусдын ая эвийг хялбархан олчихдог авьяас нь түүнийг даргын суудалд үлдээсээр өдий хүрсэн юм.

Н.ОЮУНБАТ ГЭЖ ХЭН БЭ?

Монголын спортын салбарын урдаа барьдаг  боловсролтой, гадаад хэлтэй хүн тэр мөн үү гэвэл мөн.

Н.Оюунбат паралимпын тамирчдад их элэгтэй. Монголын үндэсний паралимпийн хорооны генсек байсан удаатай.

Монголын үндэсний паралимпийн хорооны гадаад, тодоодын бүхий л үйл ажиллагаанд Н.Оюунбат оролцдог. Энэ удаа паралимпийн наадмыг өнжиж болох байсан уу гэвэл байсан.

БТСУХ бол Төрийн байгууллага. Төрийн болон төрийн бус байгууллагад албан тушаал давхар хашин хуулинд хориотой.

Гэтэл Н.Оюунбат БТСУХ-нд Хэлтсийн дарга хийхийн хажуугаар төрийн бус байгууллага болох Паралимпын хорооны ажилд тогтмол оролцож буй нь багагүй шүүмжлүүлдэг.

Түүний нөхөр нь БТСУХ-ын хорооны Бодлого төлөвлөлтийн газрын дарга О.Гэрэл. Эхнэр, нөхөр хоёр нэг байгууллагад даргаар ажиллах нь хууль зөрчөөгүй ч ашиг сонирхлын зөрчил үүсдэггүй гэх баталгаа үгүй.

ХОЁР ДАРГЫН ЗАРДЛААС ТАНААД ТАМИРЧИДДАА НЭМЧИХСЭН БОЛ...

Паралимпын наадамд улсынхаа нүүр царай болох тамирчдадаа зардал гэж 13 саяыг олгочихоод, агентлагийн хоёр даргад 48 саяыг өгсөн нь төсвийн мөнгө “Ёо” гэдэггүйн тод жишээ энэ. Эсрэгээрээ нэг тамирчинд 24 саяыг өгөөд, даргад 13 саяыг олгосон бол улсын төсвийн мөнгө эзнээ олох байлаа.

Төсвийн мөнгө хэмжээтэй, хязгаартай. Зарцуулахын хэрээр дундарна, дуусна. Цар тахалтай, эдийн засгийн хямралтай байгаа энэ цаг үед энэ мэт үргүй зардал гарган, улсын мөнгөөр туйлахгүй байхыг БТСУХ-ны дэд дарга Ц.Одонбаяраас, Хэлтсийн дарга Н.Оюунбат нарт анхааруулъя.

Төрийн албаны энэ мэт тансаглал, улсын төсвийн мөнгийг хамаагүй үрдэг, хүний сэтгэлээр ханддаг асуудалд ул суурьтай хандаж, төсвийн мөнгөөр Бээжингийн паралимпэд “туйлж яваа” хоёр даргадаа хариуцлага тооцохыг Ерөнхий сайд Л.Оюун-Эрдэнээс, БТСУХ-ын дарга Ц.Шаравжамцаас хүсье.

Л.САРУУЛ