ТООЦООЛОЛ: 25 саяынх 450 мянга, 3.3 саяынх 60 мянга. 60 мянгаар ГУРВАН САР яаж амьдрах вэ

Төрийн түшээдийн амьдрал жирийн иргэдийнхээс хэд дахин хол тасархай байдгийг баталсаар байна.

Өнгөрөгч долоо хоногт УИХ-ын чуулганы үеэр УИХ-ын дарга Г.Занданшатар "энэ хэцүү цаг үед хэмнэлтийн горимд шилжиж хэмнэж амьдар" хэмээн айлдаж онигоонд орсон. Энэ их үнийн өсөлтийн шуурган дунд өдөр тутамдаа л идэж уухаасаа хомсолж, хасаж танаж арай чүү амьдарч буй иргэдээ тавласан үйлдэл байв.

Харин өнгөрөгч амралтын өдрүүдэд МАН-ын харъяа НАМЗХ-ны ээлжит бус Их хурлын үеэр УИХ-ын гишүүн Н.Учрал НӨАТ-ын талаар үзэл бодлоо илэрхийлсэн нь олон нийтийн дүргүйцлийг хүргэв. Тэрбээр "НӨАТ-ын буцаан олголтоор амьдарч буй маш олон айл байна. Энэ мөнгөөр амьдрал ахуйгаа авч явдаг хүмүүс ч байгаа. Тэд НӨАТ-ын буцаан олголтыг хүлээж байдаг. Тиймээс нэмэгдүүлэх шаардлагатай" хэмээсэн байгаа юм.

Эгэл жирийн иргэд үнэхээр НӨАТ-ын буцаан олголтоороо амьдраад байгаа юм уу. УИХ-ын гишүүн Н.Учрал үнэн хэлсэн үү. Эрхэм гишүүний хэлсэн үгэн дээр үндэслэн бяцхан тооцоолол бодъё л доо.

ТООЦООЛОЛ: За, тансаг хэрэглээтэй айл 25 сая төгрөгийн худалдан авалт хийсэн гэж бодъё (25,000,000/1.1х0.1х0.2=454,545.45 төгрөг). Тэгэхээр баян айл 25 сая төгрөгийн худалдан авалт хийгээд буцаан авсан 450 мянган төгрөгөөрөө гурван сар амьдрах хэрэгтэй болох нь ээ. Харин дундаж хэрэглээтэй иргэд сард 1,100,000 мянган төгрөгийн худалдан авалт хийдэг гэж бодъё. Дундаж хэрэглээтэй айл гурван сарын турш (3,300,000/1.1x0.1x0.2=60,000) хийсэн худалдан авалтын буцаан олголт 60 мянган төгрөгөөрөө дараагийн НӨАТ-ийн буцаан олголт хүртэл амьдрах шаардлагатай болох нь.

Бодит амьдрал, бодит тооцоолол ийм байна.

НӨАТ-ын буцаан олголтыг сард биш улирал тутамд буюу гурван сардаа нэг удаа авдаг.

Н.Учрал гишүүний хэлснээр бол 60 мянган төгрөгөөр ГУРВАН САР амьдрах юм байна. Ингэж хэлснээрээ төрийн түшээд амьдралаас бүр хэт хол тасарчихсан гэдгээ баталж байна.

Энэ мэдээнд өгөх таны үнэлгээ

Хуваалцаарай Жиргээрэй