ФОТО: Энхийг сахиулагч эмэгтэйчүүд чуулж байна

Эмэгтэй энхийг сахиулагчдын чуулга уулзалт Соёлын төв ордонд үргэлжилж байна. Чуулга уулзалтад Монгол Улсын Ерөнхийлөгч У.Хүрэлсүх, Батлан хамгаалах яам, ЗХЖШ-ын удирдлага, энхийг сахиулагч эмэгтэй албан хаагчид оролцож байна.

НҮБ-ын Аюулгүйн зөвлөлөөс 1948 оны тавдугаар сарын 29-ний өдөр баталсан мандатын үндсэн дээр Израйл Арабын хоорондын зэвсэгт мөргөлдөөнийг түр зогсоох, гэрээний хэрэгжилтийг хангах зорилготойгоор анхны энхийг сахиулах ажиллагааг эхлүүлсэн түүхтэй.

Монгол Улсын Засгийн газрын 2012 оны 140 дүгээр тогтоолын дагуу энэхүү түүхэн өдрийг жил бүр тэмдэглэсээр ирсэн юм.

Монгол Улсад олон түүхт ойн баяр тохиож буйн дотор даян дэлхийн энх амгалангийн төлөөх ариун үйл хэргийн эхлэлийг тавьсан төр, цэргийн зүтгэлтнүүд, дипломат ажилтнууд, төрийн цэргийн болон хууль сахиулах байгууллагын алба хаагчид, хилийн чанадад эх орныхоо нэр хүндийг өндөрт өргөн үүргээ нэр төртэй гүйцэтгэсэн болон өдгөө гүйцэтгэж буй энхийг сахиулагчдын хувьд түүхт 20 жилийн ойн баяр энэ жил тохиож байна.

Монгол Улсын Засгийн газар НҮБ-тай байгуулсан “Харилцан ойлголцлын санамж бичиг”-ийн дагуу олон улсын өмнө хүлээсэн үүргээ биелүүлж, 2002 оноос өнөөг хүртэл давхардсан тоогоор 20346 цэргийн алба хаагч, түүний дотор 900 орчим эмэгтэй цэргийн алба хаагч энхийг дэмжих ажиллагаанд үүрэг гүйцэтгэсэн.

Ингэхдээ ажиллагааны онцлогоос шалтгаалж дараах 3 хэлбэрээр оролцож байгаа юм. Үүнд:  

1. Цэргийн ажиглагч болон холбогч офицер;
2. Штабын офицер;
3. Цэргийн баг.

ГЭРЭЛ ЗУРГИЙГ Б.ЭРДЭНЭБАЯР

Энэ мэдээнд өгөх таны үнэлгээ

Хуваалцаарай Жиргээрэй