Хоёр дархан аварга нэгнийхээ өмнө эрэмбэлэгдэхийн төлөө дахин маргах уу

Ардын хувьсгалын 100, 101 жилийн ойд дархан аварга А.Сүхбат, Г.Өсөхбаяр нар барилдахаар болжээ. “Алдар” спорт хорооны галын барилдаанаас сурвалжилга бэлтгэхэд А.Өсөхбаяр аварга “Түмэн олноо хүндэтгээд барилдана” гэсэн. А.Сүхбат наадмын бэлтгэлдээ гарч, өчигдөр “Дүнжингарав” дэвжээний галын барилдаанд зодоглосон.

Мэдээж хоёр дархан аварга наадмын дэвжээг чимвэл сайхан байлгүй яах вэ. Үүнийг дагаад нэгэн асуудал сөхөгдөх нь эрэмбийн маргаан. Хэн нь хэнийхээ өмнө эрэмбэлэгдэх вэ гэдэг асуудал.

Ц.Элбэгдорж Ерөнхийлөгч байхдаа зарлиг гарган, тэдэнд дархан аварга цол нөхөж олгосон, 2014 онд. Тэр жилийн наадмын өмнө Г.Өсөхбаяр аваргыг эхэнд эрэмбэлж, зүүн жигүүрийг манлайлуулсан. Гэтэл А.Сүхбат үүнийг хүлээн зөвшөөрөөгүй. “Би зүүнийг манлайлна. Би өмнө чинь эрэмбэлэгдэнэ” гээд бөөн маргаан дэгдээж, наадамчин олныг бухимдуулсан. Удтал маргалдсаны эцэст Г.Өсөхбаяр аварга буулт хийгээд “Төрөө, наадамчин олноо хүндэллээ” гэсэн.  

Улмаар А.Сүхбат зүүн жигүүрийн манлайлан, гурвын даваанд цолоо дуудуулсныхаа дараа Г.Өсөхбаярыг амлан авч, шуугиан тарьсан. Дараа нь А.Сүхбат барилдалгүйгээр шууд элэг, бүсээ тайлж өгсөн. Монгол наадмын түүхэнд дархан аварга цолтой бөх гурвын даваанд дархан аваргаа амласан тохиолдол үүнээс өөр үгүй.

Энэ нэг талаар хоёр бөхийн хоорондын асуудал мэт боловч төрт ёсны баяр цэнгэл наадмыг үймүүлсэн, наадамчин олныг бухимдуулсан үйлдэл байлаа. 2008 онд зодог тайлж буйгаа дуулиантайгаар зарлан, цолны найраа, допингтой тэмцэж буй илэрхийлсэн А.Сүхбат түүнээс хойш барилдаагүй.

Өнөө жил хоёр аварга хамтдаа барилдах нь. 2014 оных шиг дахиад маргавал яах вэ. Тэгэхгүй гэх баталгаа үгүй. Тиймээс төр, түмнээ хүндлээд гаргасан журмын дагуу нэгнийхээ эрэмбийг хүлээн зөвшөөрч, жудагтай барилдахыг хоёр аваргаас хүсье.

Энэ мэдээнд өгөх таны үнэлгээ

Хуваалцаарай Жиргээрэй