Ерөнхийлөгчийн зарлиг: Наадмын үеэр Г.Сайханбаяр, Д.Загджав, Р.Чингис нарт ГЕНЕРАЛ ЦОЛ олгожээ

Ерөнхийлөгчийн зарлигаар генерал цол олгох үйл ажиллагаа төрийн ордонд ил тод, нээлттэй болдог. Хэвлэл мэдээллийн хэрэгслээр дамжуулан олон нийтийн хараан дор, шинэхэн генералуудад Ерөнхийлөгч цол тэмдгийг нь гардуулдаг. Гэтэл Үндэсний их баяр наадмын уур амьсгал давамгайлсан эдгээр өдрүүдэд зургаан генерал “мэндэлжээ”.

Тодруулбал, долдугаар сарын 8-ны өдрийн Ерөнхийлөгчийн зарлигаар:

• Батлан хамгаалахын сайд Г.Сайханбаярт дэслэгч генерал цол,
• ШШГЕГ-ын дарга, хурандаа Д.Загджав
• Дотоодын цэргийн штабын дарга, хурандаа Р.Чингис
• ХХЕГ-ын Захиргааны удирдлага эрхэлсэн дэд дарга, хурандаа Д.Мөнгөнжин
• ЦЕГ-ын тэргүүн дэд дарга, хурандаа Ц.Ням-Очир
• Нийслэлийн Цагдаагийн удирдах газрын дарга, хурандаа Р.Отгонжаргал нарт бригадын генерал цол олгожээ.

Эл үйл явдал Ерөнхийлөгчийн албан ёсны вэб сайтад ч мэдээлэгдээгүй өнгөрсөн байна.

Г.САЙХАНБАЯР ЦОЛ АЛГАСЖЭЭ

Батлан хамгаалахын сайд Г.Сайханбаяр 2014 онд бригадын генерал болсон. Харин цэргийн цол олгох журмын дагуу, үүний дараа хошууч генерал болох ёстой ч ийн дэслэгч генерал цолыг алгасаж авчээ. Г.Сайханбаяр нь Ерөнхийлөгч У.Хүрэлсүхтэй багын найзууд гэгддэг. Засгийн газар бүрдэхэд Г.Сайханбаяр У.Хүрэлсүхийн санал болгосноор Батлан хамгаалахын сайд болж байв.

Д.ЗАГДЖАВ ШШГЕГ-Т ИРСЭН ХЭРГЭЭ БИЕЛҮҮЛЭВ

ШШГЕГ-ын дарга Д.Загджавын тухайд эл албан тушаалд очихдоо л генерал цол авах тохироо хийсэн гэгдэж байв. МАН-ын ахмад гишүүн, албан тушаалаас хоцорч үлдсэн удаа багатай ч нэр холбогдсон асуудал ихтэй Д.Загджав ШШГЕГ-ын дарга болоод  хурандаа цолоо сэргээлгэсэн. Мөн дуучин A-Cool нарын хүмүүст журам зөрчин хошууч цол олгож, шүүмжлүүлээд буй. Тэгвэл өдгөө бригадын генерал цолыг ийн наадмын өдрүүдэд хүртжээ.

ЦЕГ-ЫН ДАРГААС ЧӨЛӨӨЛӨГДСӨН Р.ЧИНГИС ЦОЛ ХҮРТЭВ

Хурандаа Р.Чингисийн улс төрийн хамаарлыг Ерөнхий сайд Л.Оюун-Эрдэнэ, УИХ-ын гишүүн Ц.Мөнх-Оргил нартай холбогдуулж, хэлэлцдэг. 2000 оноос л цагдаагийн албаны удирдах албан тушаалтны томилгоо болоход Р.Чингисийн нэр яригдаж ирсэн. Хамгийн сүүлд ЦЕГ-ын дарга болсон ч өөрийн хүсэлтээр ажлаа өгсөн. Харин өдгөө генерал цол хүртлээ.

ГЕНЕРАЛ ЦОЛ ОЛГОХ ЭСЭХИЙГ ЕРӨНХИЙЛӨГЧ САНАЛ ҮЛ ХАРГАЛЗАН ШИЙДДЭГ

Генерал цол нь Дээд офицерийн цолын ангилалд багтдаг. Цэргийн цол олгох журмын хавсралт хэсэгт дээд офицерийн шаардлага үзүүлэлтийг дурдаагүй байдаг.

Харин 2.7-д “Дээд офицерийн цолыг Монгол Улсын Ерөнхийлөгч олгоно” гэж л заасан байна. Харин уг хавсралтын дөрөв дэх хэсэг буюу “Цэргийн дээд цолыг бууруулах, хураан авах, сэргээх” зүйл заалтад зарим шаардлагууд бий.

Тодруулбал,

4.2-т, “Монгол Улсын Ерөнхийлөгч дээд офицерийн цол бүхий албан тушаалтныг цэргийн жинхэнэ албанаас чөлөөлөх,цэргийн жинхэнэ албанд эргүүлэн авах, тэдний цолыг бууруулах, хасах буюу сэргээн олгох шийдвэр гаргана.

Дээд офицерыг албан тушаалаас чөлөөлж, дээд офицерын цолны зэрэглэлгүй албан тушаалд бууруулан томилох, дээд офицерын цолыг хасах бол дээд офицерын цол олгох саналыг өргөн барих эрх бүхий байгууллага, албан тушаалтан дээд офицерын цол бууруулах, хасах тухай саналаа Монгол Улсын Ерөнхийлөгчид өргөн барина” гэж заасан.

Энэ утгаар цолыг бууруулах, сэргээх, сэргээх агуулгад л тодорхой санал Ерөнхийлөгчид өргөн баригддаг. Харин шинээр олгох нь Ерөнхийлөгчийн шууд зарлиг гарган шийдэх асуудал болж байна. Өмнө нь Засгийн газраас саналыг өргөн барьдаг байсан ч энэ заалтыг 2007 онд хассан юм.

Энэ мэдээнд өгөх таны үнэлгээ

Хуваалцаарай Жиргээрэй