Хэргийн мөрөөр: Авлигын хэрэг нь царцсан Д.Тэмүүжин Дорноговьт ТӨҮГ-ын дарга болжээ

Одоогоос есөн сарын өмнө буюу 2021 оны арваннэгдүгээр сарын 22-ны өдөр Улаанбаатар хот дахь АТҮТ-ийн харьяа дөрвөн газарт мөрдөн шалгах ажиллагаа явуулсан байдаг. Улмаар Б тэргүүтэй нэр бүхий хэд хэдэн албан тушаалтан, мэргэжилтнүүдийг баривчилсан. Тэднийг мэргэшсэн жолоочийн үнэмлэх олгохдоо эрх мэдэл, албан тушаалаа урвуулан ашиглаж, бусдаас авлига авдаг байж болзошгүй гэх шалтгаанаар ажиллагаа явуулж, шалгасан билээ.

Хамгийн хачирхалтай нь тухайн үед АТҮТ-ийн Мэргэшсэн жолоочийн төвийн мэргэжилтэн Б-гийн хамт С, М, Т гэх хүмүүсийг хамт шалгасан боловч ганцхан Б гэх нэр хэвлэлүүдэд илээр мэдээлэгдээд өнгөрсөн.

Мэдээлэгдэх ч гэж АТГ-аас зарласан ганц нэр гэсэн үг.

Гэвч өдгөө дээрх нэр бүхий албан тушаалтан, мэргэжилтнүүдийн заримынх нь хэрэг прокурорт шилжиж, зарим нь албан тушаалаа одоо хүртэл хэвийн хашиж, зарим нь бүр өөр албан тушаалд дахин томилогдсон байгаа юм. Албан тушаалд томилогдсон нь Д.Тэмүүжин.

-ДООД АЛБАН ТУШААЛТНААРАА ДАМЖУУЛАН ДҮҮГИЙНХЭЭ ДАНСААР АВЛИГА АВСАН УУ-

Яг тухайн үеэс анхаарал татах нэг ньюанс бий.

Тодруулбал, "Б нь АТҮТ-ийн харьяа дүүргийн салбарын удирдах албан тушаалтанд нийт долоон удаагийн үйлдлээр хахуульд зуучилсан үйлдлийг илрүүлэн шалгаж байна" гэх өгүүлбэр АТГ-ын ажилтны амнаас унаж байв.

Эдгээрт дээр дурдсан “Автотээврийн Үндэсний төвийн Баянгол техникийн хяналтын үзлэгийн төвийн дарга Доржготовын Тэмүүжин" тэргүүтэй албан тушаалтнууд багтаж буй гэгдэж байв.

Д.Тэмүүжин нарыг бага насны хүүхдийн болон найзуудынхаа дансаар дамжуулан их хэмжээний авлига авсан гэх мэдээлэл хөшигний ард нэлээн өндөр аван яригдсан.

Гэвч бага насны хүүхдийн биш дүүгийнхээ дансаар 100 гаруй сая төгрөг авсан нь батлагдсан гэх мэдээлэл байдаг. Улмаар хуулийн байгууллагынхан найзуудынх нь дансыг шалгана гэгдэж байв.

-АТГ-ААС Д.ТЭМҮҮЖИНГИЙН ХЭРГИЙГ ХААХ САНАЛТАЙГААР ПРОКУРОРЫН БАЙГУУЛЛАГА РУУ ШИЛЖҮҮЛЭЭД ЗАМХАРЧЭЭ-

Ямартай ч түүний авлигын хэргийг АТГ шалгасан байгаа юм. Энэ талаар мэдээлэл хийхдээ Б гэх нэрийг л ил зарлаж, бусдыг нь нэрлээгүй нь анхаарал татдаг.

Мөнхүү шалгалтын явцад байцаагч нь солигдсон үйл явдал ч дундуур нь өрнөсөн гэгддэг. Түүнээс хойш эл хэрэг чухам хэрхсэн нь тодорхойгүй царцаад байгаа нь энэ. Хэргийн материалаас арчигдсан ч гэгдэж байна.

-ХУУЛИЙН БАЙГУУЛЛАГЫНХАН ХЭРГИЙГ НУУН ДАЛДЛАВ-

АТҮТ-ийн дарга Б.Гүрсоронзонгоос тодруулахад: "Д.Тэмүүжинг АТГ-аас шалгасан. Шалгаж дуусаад "асуудалгүй" гэж үзсэн учир хурааж авсан эд зүйлсийг нь буцааж өгсөн гэж л дуулсан юм байна. Өөр мэдээлэл одоогоор алга" хэмээх товчхон хариултыг бидэнд өглөө.

АТГ-аас тодруулахад: "Энэ тухай мэдээллийг прокурорын зөвшөөрөлтэй өгнө. Прокуророос мэдээлэл ирээгүй байна" гэхээс өөр мэдээлэл өгсөнгүй.

Үргэлжлүүлэн УЕП-оос тодруулахад: "Нийслэлийн прокуророос мэдээлэл хүссэн. Гэвч тодорхой хариулт ирээгүй байна” гэх үгээр аргацааж, ам хаав.

-АВЛИГЫН АСУУДЛААР ШАЛГАГДАЖ БАЙСАН Д.ТЭМҮҮЖИН АТГ-ААС ХЭРХЭН БИЧИГ АВЧ, ДОРНОГОВЬД ДАРГА БОЛОВ-

АТҮТ-д ийм асуудалтай, хуулийн байгууллагад авлигын хэргээр шалгагдаж байсан хүн өдгөө Дорноговь аймагт албан тушаалд оччихсон яваа нь анхаарал татсан юм.

Тэрбээр, 2022 оны дөрөвдүгээр сард АТҮТ дэхь албан тушаалаа өгчээ. Улмаар Дорноговь аймаг дахь "Мэдээлэл холбооны сүлжээ" ХХК буюу төрийн үйлдвэрийн газрын даргаар томилогдсон байна.

Эл албан тушаалд томилогдох "ашиг сонирхлын зөрчилгүй" гэх албан бичгээ АТГ-аас тэр хэрхэн авав.

Нийслэл дэх "Мэдээлэл холбооны сүлжээ" ХХК-ийн Гүйцэтгэх захирал Г.Мөнхбат түүнийг албан тушаалд яагаад томилов гэдэг хоёр асуулт гарч ирж байна.

Эл асуултад хариулт авахын тулд бид "Мэдээлэл холбооны сүлжээ" ХХК Г.Мөнхбат болон ТӨБЗГ-ын дарга Б.Цэнгэл нартай холбогдож тодруулах гэсэн боловч тэдний аль аль нь утсаа авсангүй. Мөн мессежэнд хариулт өгөхөөс зайлсхийв.

-Д.ТЭМҮҮЖИН 43,2 САЯЫН ОРЛОГОТОЙ Ч, 15,5 САЯЫН ХАДГАЛАМЖ, 51 САЯЫН АВЛАГАТАЙ БАЙЖЭЭ-

Тэрбээр 2021 оны гуравдугаар сарын 18-нд Автотээврийн Үндэсний төвийн Баянгол техникийн хяналтын үзлэгийн төвийн даргаар томилогдон ажиллаж байхдаа АТГ-т 2021 оны хөрөнгө орлогоо мэдүүлж байжээ. Тухайн үедээ:

• Өөрийн орлого: 43,2 сая
• Гэр бүлийн орлого: 0
• Орон сууц: 160 төгрөгийн 3 орон сууцтай
• Автомашин: 65 сая
• Мал: 20 сая төгрөгийн 5 адуутай
• Үнэт эдлэл: 18 сая
• Хадгаламж: 15,5 сая
• Авлага: 51 сая
• Зээл: 65,2 сая
• Компани: "ЭС ТИ АР ХИШИГ" ХХК, "Эрдэнэс таван толгой" ХК

Тэмдэглэхэд: 2021 оны арваннэгдүгээр сард Б, Д.Тэмүүжин, С, М нарыг ангуучилсан хэргийн үргэлжлэл болгож , 2022 оны хоёрдугаар сарын 18-нд АТГ-аас бас нэгэн хойшлуулшгүй ажиллагаа явуулж АТҮТ-ийн дөрвөн ажилтныг саатуулсан байдаг. Тодруулбал, К.Айдос, С.Онон, Г.Мэндбаяр, Б.Анхтүвшин нарыг олон улсын ачаа тээврийн С зөвшөөрөл гаргаж, бусдаас хахууль авсан хэмээн буруутган шалгаж эхэлсэн юм. Улмаар өнгөрөгч наймдугаар сарын 31-нд АТГ-аас дээрх хүмүүсийн хэргийг шүүхэд шилжүүлэх саналтайгаар прокурорын байгууллагад шилжүүлсэн. Гэвч зарим нь өдгөө хүртэл ажил албан тушаалаа хэвийн үргэлжлүүлсээр явна.

Иймд бид энэ сэдвийг үргэлжлүүлэн хөндөх болно.

Энэ мэдээнд өгөх таны үнэлгээ

Хуваалцаарай Жиргээрэй