Хэргийн мөрөөр: Өөрийгөө халах тушаал гаргаж, 2 саяын тэтгэмж авсан эмнэлгийн захирал

"Бүүвэй ээж" ХХК-ийн захирал Э.Н нь өөрөө өөрийгөө ажлаас халах тушаал гарган, улмаар Чингэлтэй дүүргийн нийгмийн даатгалын хэлтсээс 2.69 сая төгрөгийн ажилгүйдлийн тэтгэмж авчээ. Энэхүү хэргийг 2022 оны есдүгээр сарын 12-ны өдөр Чингэлтэй дүүргийн Эрүүгийн хэргийн анхан шатны шүүхээр шийдвэрлэсэн байна.

Хэргийн талаар дурдвал иргэн Э.Н нь 2018 оны есдүгээр сарын 19-ний өдрөөс "Бүүвэй ээж" ХХК-ийн захирлын "ажлаас чөлөөлөх тухай" хуурамч тушаалыг гаргажээ. Улмаар тус сарын 24-ний өдөр Чингэлтэй дүүргийн нийгмийн даатгалын хэлтэст "Ажилгүйдлийн тэтгэмж авах тухай" хүсэлт гаргасан байна. Зохимол байдлыг зориудаар бий болгож, хуурамч бичиг баримт ашиглан албан тушаалаа ашиглаж, 2018 оны арваннэгдүгээр сарын 23-ны өдөр 778,305, арванхоёрдугаар сарын 26-ны өдөр 778,305, 30-ны өпөр 353,775 төгрөгийн нийгмийн халамжийн тэтгэмжийн үйлчилгээ авсан юм. Улмаар 2,688,690 төгрөгийн хохирлыг улсад учруулжээ.

Мөрдөн шалгах ажиллагааны явцад иргэн Э.Н нь "Би тухайн үе буюу 2018 оны есдүгээр сард сурах боломж гарсан тул ажлаасаа гарч ажилгүйдлийн тэтгэмж авсан. Тэр үед би өөрөө захирал нь байсан тул өөрөө өөртөө тушаал гаргаж байлаа. Нийгмийн даатгалын байцаагч нь та өөрөө өөртөө тушаал гаргаж болохгүй гэсэн тул О эмчтэй ярилцаж, сурах гэж буй талаараа хэлээд түүний нэр дээр тушаал гаргаж, ажилгүйдлийн тэтгэмж авсан. О нь утсаар ярьж байх үедээ гэртээ байгаа тул өөрийнх нь өмнөөс гарын үсэг зурчих гэх хэлсэн юм. Би түүний өмнөөс тушаал гаргаж, гарын үсгийг нь О гэж зурсан" хэмээн мэдүүлжээ.

Эмч О нь түүнтэй хамтран ажиллагч бөгөөд Улсын бүртгэлийн ерөнхий газарт "Бүүвэй Ээж" ХХК-ийн хувь эзэмшигчээр бүртгэлтэй байгаа юм. Мөн эцсийн өмчлөгч хэмээн бүртгэгджээ.

Тус компанийн өмнөх эзэн болох П.Н тус хэргийн шүүх хуралд гэрчээр оролцсон байна. Тэрбээр 2006-2017 оны хооронд энэхүү компанийн захирлаар ажиллаж байхдаа иргэн Э.Н-д компанийнхаа 50 хувийг үнэ төлбөргүй бэлэглэлийн гэрээгээр шилжүүлэн өгч байжээ. П.Н нь гэрчийн мэдүүлэгтээ "Би компанийнхаа татварын тайлан болон Нийслэлийн эрүүл мэндийн газарт өгсөн үйл ажиллагааны тайланг интернэтээр орж үзсэн. Татварын албанд миний гарын үсгээр Нийслэлийн эрүүл мэндийн газарт үзлэгийн тоогоо худал тайлагнасан байна лээ. Тайлангуудаа миний тоон гарын үсгээр татварын албанд худлаа тайлан өгсөн байсан. Мэргэжлийн бус хүнийг хүүхдийн эмнэлгийн эмч хэмээн олон дуудлагад явуулсан байлаа. Энэ нь тугай зөвшөөрөлгүйгээр эмчилгээ хийсэн гэсэн үг. Мөн ажлаас халагдсан утга бүхий хуурамч бичиг баримт үйлдэхдээ миний өмнөөс бүрдүүлсэн байлаа" хэмээн мэдүүлсэн байна.

Товчхондоо гэрч П.Н нь иргэн Э.Н-д захирлын суудлаа хүлээлгэн өгсний дараа дээрх үйл явдал болсон байгаа юм. Иргэн Э.Н-ий үйлдсэн хэрэг нь нөхцөл байдал, учруулсан хохирол, гэм буруугаа хүлээсэн, хохирлоо нөхөн төлсөн, анх удаа гэмт хэрэг үйлдсэн болон хувийн байдыг нь харгалзан үзэж, Эрүүгийн хуулийн тусгай ангийн 18.12 дугаар зүйлийн 2 дахь хэсгийн 2.1 дэх заалтад зааснаар хуулийн этгээдийн удирдах албан тушаалд ажиллах эрхийг хоёр жилээр хасаж, 12 сая төгрөгөөр торгох ял оноохоор шүүх шийдвэрлэжээ. Ингэхдээ Чингэлтэй дүүргийн нийгмийн даатгалын хэлтэст 2.69 сая төгрөгийн хохирлыг барагдуулахаар тогтоосон аж.

Энэхүү компани нь Улсын бүртгэлийн ерөнхий газарт хүүхэд, хүүхдийн мэдрэлийн үзлэг, оношлогоо, эмчилгээний чиглэлээр үйл ажиллагаагаа явуулдаг хэмээн бүртгүүлсэн байна. Эмнэлгийн чиглэлээр үйл ажиллагаа явуулдаг компани гэсэн үг юм.

Энэ мэдээнд өгөх таны үнэлгээ

Хуваалцаарай Жиргээрэй