"Катар 2022" хөлбөмбөгийн Дэлхийн аварга шалгаруулах тэмцээн /ДАШТ/-ий хоёр дахь өдрийн эхний тоглолтыг В хэсгийн Английн шигшээ багийн эсрэг Ираны шигшээ баг тоглов. Улмаар Английн шигшээ баг 6:2 харьцаатайгаар хожлоо.
Англичуудын эхний довтолгоо Ираны хаалгачийг гэмтээсэн юм. Ираны шигшээ багийн хаалгач Алиреза Бейранванд өөрийн багийн хамгаалагчтай мөргөлдөж хамар, толгойгоо гэмтээн талбайгаас гарсан билээ. Түүнийг орыг сэлгээний хаалгач Сайед Хоссейн Хоссейни эзэлсэн юм.
Улмаар тоглолтын 35 дахь минутад Английн шигшээ багийн тоглогч 19 настай шинэхэн од Жюд Беллинхэм гоол орууллаа. Нэгдүгээр үеийн төгсгөлд Английн шигшээ багийн тоглогч Букайо Сака болон Рахим Стерлинг нар гоол оруулж тоглолтын эхний үеийг 3:0 харьцаатайгаар Английн шигшээ баг тэргүүлж дуусгасан юм.
Тоглолтын хоёрдугаар үед 62 дахь минутад Английн шигшээ багийн тоглогч Букайо Сака гоол оруулснаар дубль болов. Ираны шигшээ багийн тоглогч Мехди Тареми 4:0 байсан тоглолтын харьцааг 4:1 болгосон юм. Үүний дараа Английн шигшээ баг дөрвөн тоглогчоо сэлгэлээ. Сэлгээгээр орж ирсэн тоглогчид болох Маркус Рашфорд болон Жак Грилиш нар тоглолтын 71 болон 73 дахь минутад гоол оруулж, тоглолтын харьцааг 6:1 болгосон юм. Тоглолтын төгсгөлд Ираны шигшээ баг торгуулийн цохилтоор гоол оруулснаар В хэсгийн эхний тоглолт 6:2 харьцаатайгаар өндөрлөв.
Ингэснээр Английн шигшээ баг хэсгээ тэргүүлж байна. В хэсгийн хоёр дахь тоглолт 03.00 цагаас АНУ болон Уэльсийн шигшээ багийн хооронд өрнөх юм.
АНХААРУУЛГА: Уншигчдын бичсэн сэтгэгдэлд Eguur.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.