Хөшигний ард: БТСУХ—ны дарга Д.Жаргалсайханы тендер будилуулж, хэмнэлтийн хууль зөрчсөн баримтууд

БТСУХ-ны дарга Д.Жаргалсайхан ажилчдынхаа өрөөнд хууль бусаар нэгжлэг хийж, хүний эрхийн зөрчил гаргасан талаарх мэдээллийг бид өнгөрсөн бямба гарагт “Хөшигний ард: БТСУХ-ны дарга Д.Жаргалсайхан ажилтнуудаа хоморголон халж, өрөөнүүдэд нь нэгжлэг хийжээ” нийтлэлээрээ хүргэсэн.

Өнөөдөр Д.Жаргалсайхан даргын тендертэй холбоотой зөрчил, төсвийн зүй бус зарцуулалт, хэмнэлтийн хууль зөрчсөн үйлдлийн талаарх мэдээллийг хүргэж байна.

-400 сая төгрөгийн төсөвтэй бүх ард түмний спортын наадмын тендер-

Монголын дотоодын спортод энэ онд өрнөсөн хамгийн том үйл явдал нь Монголын бүх ард түмний спортын XV наадам байсан билээ. Тэгвэл 400 гаруй сая төгрөгийн төсөвтэй энэ том арга хэмжээг Д.Жаргалсайхан будилуулжээ. Тэрбээр БТСУХ-ны даргаар томилогдож ирснийхээ дараа өмнөх дарга Ц.Шаравжамцын баталсан наадам зохион байгуулагчийг сонгон шалгаруулах Үнэлгээний хороо байгуулах тухай 2022 оны гуравдугаар сарын 21-ний А/44 тоот тушаалыг үгүйсгэж, 2022 оны долдугаар сарын 5-ны өдөр БТСУХ-ны хурлыг хуралдуулж, “Тендер зохион байгуулахгүй” гэсэн шийдвэр гаргуулжээ.

Ингэснээр төрөөс өндөр дүнтэй ажил гүйцэтгүүлэхэд тендер зарлах ёстой журмыг зөрчиж, наадмын төсөв дээр дураараа “ажиллах” нөхцлөө бүрдүүлсэн байна. 

Үүнээс гадна, нэгэнт “Тендер дахиж зохион байгуулахгүй” гэсэн шийдвэр гарсан байтал Үнэлгээний хороог дахин сар гаруй ажиллуулж, наймдугаар сарын 18-нд л татан буулгажээ.

Тендер зарлахгүй болсны дараа тэрбээр наадмын зардлын нэг болох тамирчдад олгогдох медалийг сонгон шалгаруулалт хийлгүйгээр, туслахдаа үүрэг өгч, “Алтан тун жор” ХХК-д захиалга өгч, БНХАУ-д хийлгүүлэн авчруулсан аж. Улмаар медалийн зардлыг спортын холбоо болгонд жижиглэн өгч, уг компаниас очиж мөнгөө төлөөд медалиа ав гэж үүрэгдсэн тул холбоод тэр ёсоор болгожээ. Энэ нь нэг наадмын медалийг бүхэлд нь нэг багц болгон зарлах ёстой журмыг зөрчсөн байна. Мөн бараа бүтээгдэхүүнийг хүлээж аваагүй байхдаа төлбөрийн 90 хувийг урьдчилан олгосон байна.

Тамирчдын мандат, мандатын оосрыг  мөн тендер зарлахгүйгээр тусад нь салгаж, мөнөөх “Алтан тун жор” ХХК-ийн захирал Н.Отгонцэцэгийн нөхөр болох Ц.Батбилэг “Ану энд Ти” ХХК-д захиалга өгч хийлгүүлжээ.

Наадмын өргөмжлөл, плакатыг мөн сонгон шалгаруулалтгүй өөрийн үзэмжээр хэвлүүлэх цохолт хийж, шууд хэвлүүлсэн. Дээрх үйлдлүүд нь “Төрийн болон орон нутгийн өмчийн хөрөнгөөр бараа, ажил, үйлчилгээ худалдан авах тухай хуулийн 8.5, “Энэ хуулийн 8.1 дэх хэсэгт заасан босго үнэд багтаах, эсхүл нээлттэй тендер шалгаруулалтын журмыг хэрэглэхээс зайлсхийх зорилгоор нийт төсөвт өртгийг хувааж хэд, хэдэн тендер шалгаруулалт явуулахыг хориглоно” гэж заасныг илт зөрчжээ.

Мөн Бүх ард түмний спортын наадмын нээлт хаалтын ажиллагааг өөрийн хамаарал бүхий спортын холбоотой хамтарч ажилладаг хувь хүмүүст шууд хариуцуулан гэрээгээр хийлгүүлж, мөнгийг олгосон байна.

-Хэмнэлтийн хуулийг зөрчсөн үйлдлүүд-

Тэрээр БТСУХ-ны даргаар томилогдож ирсэн даруйдаа даргын 114 дүгээр тушаал гаргаж, өрөөндөө засвар хийлгэжээ.

Мөн Үндэсний спортын болон бүх ард түмний наадмын зохион байгуулах хорооны ажилтны хувцас нэрээр 40 сая төгрөгийн спортын бэлтгэлийн хувцас авсан байна.

Түүнчлэн ОХУ руу явсан тамирчдад шууд гэрээ байгуулж бэлтгэлийн хувцас хийлгүүлэх зэргээр зардал гаргаж, Соёл, спортын яамнаас 2014 онд орчуулан гаргаж байсан спортын номыг өөрийн зураг, мэндчилгээг хавтсан дээр тавиулан дахин хэвлүүлж хүмүүст бэлгэнд өгч буй нь Хэмнэлтийн тухай хуулийн 8,1 дэх заалтыг зөрчжээ.

Аливаа спортын уралдаан тэмцээн зохион байгуулахад зардал гардаг. Гэхдээ Д.Жаргалсайхан даргын шийдвэрээр хийсэн худалдан авалтаар ирсэн бараа бүтээгдэхүүн чанарын шаардлага хангахгүй байдгаараа онцлогтой. Тухайлбал, МБАТСН-ын медаль жижигхэн, нимгэн, өмнөх наадмын медалиас чанаргүй бөгөөд үнийн дүнгээсээ илт хямд болох нь мэдэгдэж байгаа аж. Мөн Хэмнэлтийн хуулийн онцгой, цэрэг, цагдаагаас бусад байгууллага дүрэмт хувцсаар ижилсэхийг он дуустал тэвчих заалтыг зөрчин, Монголын үндэсний спортын наадмын хүрээнд  хийлгэсэн хантааз нь нэг бүр нь хагас сая төгрөгийн үнэтэй боловч амьдрал дээр 30 мянган төгрөг хүрэхгүй үнэтэй байхаар хальсан материалтай байжээ. Д.Жаргалсайхан дарга энэхүү Монголын үндэсний спортын долоодугаар наадмын санхүүжилтээс өөрийн найз Ч.Бат-Эрдэнэд “Ажил гаргаж өг” гэж Монголын үндэсний спортын хороонд шахалт үзүүлж, вэбсайт хийлгүүлэх нэрээр мөнгө өгүүлсэн аж. Наадмын төсөвт вэбсайт хийлгүүлэх төсөв тусгагдаагүй байжээ.

-Ашиг сонирхлын зөрчил-

Д.Жаргалсайхан нь төрийн албаны тухай хуулийн 23.2.1-д заасан шаардлагыг хангаагүй, 33 дугаар зүйлд заасан төрийн албаны ерөнхий шалгалт, удирдах ажилтны тусгай шалгалтын алийг ч өгөөгүй шаардлага шалгуурыг хангаагүй нэгэн аж. Өөрөөр хэлбэл, хууль ёсоороо явсан бол БТСУХ-г удирдах ямар ч боломжгүй нэгэн ажээ.  

Төрийн албаны шалгалт өгөөгүйгээс гадна, тэрбээр Монголын оюутны спортын холбооны эзэмшигч, МҮОХ-ны  ажиллаж байгаа нь Төрийн албаны болон ашиг сонирхлын зөрчлөөс урьдчилан сэргийлэх тухай хуулийн 18 дугаар зүйлийг ноцтой зөрчсөн байна.

Мөн БТСУХ-ны даргаар томилогдсон хойноо ч зорилго ижил, нэг салбарын байгууллага болох МҮОХ-ны Гүйцэтгэх зөвлөлд ажиллаж байгаа аж.  

Эх сурвалжийн хэлснээр, тэрбээр өөрөө Төрийн албаны шалгалт өгөөгүй нэгэн байтлаа ном журмаараа орж ирсэн ажилчдын жинхлэх тушаалыг гаргахгүй хясан боох, өөрийн хамаарал бүхий этгээдийг ямар нэг шалгуургүй шууд оруулж ирээд тушаал дэвшүүлэх зэргээр зоргоороо авирлаж байгаа аж.

Энэ мэдээнд өгөх таны үнэлгээ

Хуваалцаарай Жиргээрэй