Тодруулга: БНХАУ-аас шахмал түлш оруулж ирсэн гэх мэдээлэл худал

Сайжруулсан шахмал түлшийг БНХАУ-аас оруулж ирж байна гэх мэдээлэл гарсан. Тэгвэл энэ асуудалтай холбоотойгоор "Тавантолгой түлш" ХХК-ийн хэвлэлийн төлөөлөгч Г.Даваабаатараас тодрууллаа.

-Шахмал түлшний нөөц ямар байгаа вэ. БНХАУ-аас оруулж ирж байна гэх мэдээлэл гараад байна. Танайхаас тайлбар өгнө үү?

-Одоогоор шахмал түлшний 105 мянган тоннын нөөцтэй байна. Нийслэлийн зүгээс хадгалах байр савыг нь түрээсэлж тусалдаг. Өнөөдрийн байдлаар 97 байршилд дээр дурдсан хэмжээний нөөцтэй байна л гэсэн үг. Мөн гурван үйлдвэрийн 14 дамжлага ажиллаж байгаагаас хоногт 2300-2700 тонныг үйлдвэрлэдэг. Тиймээс БНХАУ-аас шахмал түлш оруулж ирэх ямар ч шаардлага байхгүй. Аль дөрөвдүгээр сараас нөөцөлж ирсэн. Маш олон хүмүүс ажиллаж байхад энэ хүмүүсийн хөдөлмөрийг үнэгүйдүүлж ийм мэдээлэл гарч байгаад гайхаж байна. БНХАУ-аас оруулж ирж байгаа гэх мэдээлэл ташаа гэдгийг дахин дахин хэлье.

-105 мянган тоннын нөөц гэдэг нь хэд хоногийн нөөц гэж ойлгох вэ?

-Ес эхэлж шахмал түлшний хэрэглээ дээд цэгтээ хүрлээ гэж бодоход өдөрт 3,500 тонныг хэрэглэдэг. Ингээд бодоод үзэхээр 30-40 хоногийн нөөц гэж ойлгож болно.

-Айл өрхүүдэд долоо хоногт зургаан шуудай шахмал түлш олгодог. Хүйтний эрч чангарсантай холбоотойгоор энэ тоог нэмэгдүүлэх үү. Зарим айл өрхөд хүрэлцдэггүй асуудал гараад байна?

-Одоогоор нэм гэсэн шийдвэр гараагүй. Манайх үйлдвэрлэгч гэдэг утгаараа үйлдвэрлээд, түгээгээд явж байна. Нэмэх асуудлыг нийслэлийн агаарын бохирдол хариуцсан газар шийдвэрлэнэ. Энэ тоо 2018 оны судалгаан дээр үндэслэсэн тоо болохоор энэ хэмжээнд л олгож байна.

-Мэдээлэл өгсөнд баярлалаа.

Энэ мэдээнд өгөх таны үнэлгээ

Хуваалцаарай Жиргээрэй