Ж.Бат-Эрдэнэ: Миний бие нүүрсний хулгайн хэрэгт огт холбогдолгүй

УИХ-ын гишүүдийг сонгосон сонгогчид нь "Нүүрсний хулгайн хэрэгт" холбогдолтой эсэхтээ тайлбар хийхийг шаардаж эхэлжээ. Тодруулбал, Булган аймгийн иргэд УИХ-ын гишүүддээ энэхүү шаардлагыг тавьсан бөгөөд Ж.Бат-Эрдэнэ дараах хариултыг өгсөн байна.

Тэрбээр, "Жадамба овогтой Бат-Эрдэнэ миний бие нүүрсний хулгайн хэрэгтэй огт холбогдолгүй гэдгээ албан ёсоор хариуцлагатайгаар мэдэгдэж байна. Миний бие эрх мэдэл, албан тушаалаа ашиглан улс эх орныхоо баялаг болон иргэдийнхээ боломжийг хулгайлахын эсрэг өдий хүртэл явж ирсэн. Цаашдаа ч энэ зарчмаасаа ухрахгүй. Дан ганц нүүрсний хулгай гэлтгүй ЖДҮ, Хөгжлийн банкны асуудалд орооцолдолгүй, хууль баримтлах, шударга байх тал дээр иргэд сонгогчдын дуу хоолой болон ажиллаж байна. Хөгжлийн банкны асуудлаар УИХ дээрх "Иргэдийн нээлттэй сонсгол"-ыг даргалсан,

Нүүрсний хулгайн асуудлаар нээлттэй сонсгол явуулж, иргэдэд мэдээлэл өгөх тухай албан шаардлагыг нэр бүхий гишүүдтэй хамтран санаачилж, УИХ-ын даргад өргөн барьснаар, ажлын хэсгийн гишүүнээр орсон,

ЖДҮ сангаас зээл авсан асуудлаар УИХ тарах ёстой гэдэг байр сууриа илэрхийлж, гарын үсгээ зурж явсныг иргэд, сонгогчид маань мартаагүй байх. Миний бие УИХ-ын гишүүний хувьд иргэд, ААН-үүдээ дэмжих, тэднийг баялаг бүтээгч болгох, улсын баялгаас хүртэх бүхий л боломжоор хангахын төлөө төсөл, хөтөлбөр санаачлан өнөөдрийг хүртэл ажиллаж байгаа гэдгээ хэлье. Дашрамд хэлэхэд таны өмнө нь асууж байсан ЖДҮ дэмжих хүрээнд Булган аймагт байгуулагдсан сүүний үйлдвэр гурван жил тасралтгүй ажиллаж, арван сумын малчдаас сүүгээ цуглуулан, үндэсний томоохон үйлдвэрлэгчдийн хагас боловсруулсан бүтээгдэхүүнийг бэлтгэн нийлүүлж байна" хэмээжээ.

Энэ мэдээнд өгөх таны үнэлгээ

Хуваалцаарай Жиргээрэй