Ж.Мөнхбат “Түүх мартахгүй” кинонд 1.3 тэрбумыг төрөөс авч, У.Хүрэлсүх ТӨХК-уудаас 1 тэрбумыг НЭМЖ ӨГҮҮЛСЭН үү

-Ж.МӨНХБАТЫН  ТӨРСӨН ДҮҮГИЙН  ТББ  “ТҮҮХ МАРТАХГҮЙ” КИНОНД ЗОРИУЛЖ ТӨРӨӨС 1.3 ТЭРБУМЫГ АВЧЭЭ

УИХ-ын гишүүн Ж.Мөнхбат, “Хүмүүн фильм” НҮТББ-тай хамтран Төр нийгмийн нэрт зүтгэлтэн маршал Ю.Цэдэнбалын туулж өнгөрүүлсэн амьдралыг харуулсан “Түүх мартахгүй” уран сайхны киног бүтээж буй.

Монгол Улсын 21 аймаг, ОХУ-ын нутаг  дэвсгэрт зураг авалт нь явагдаж, 1700 орчим хүнийг хамарсан уг бүтээл хоёр ангитайгаар бүтээгдэх юм. Кино зохиолч, продюссероор нь УИХ-ын гишүүн Ж.Мөнхбат ажиллаж байгаа юм.

Сонирхолтой нь, 2011 онд үүсэн байгуулагдсан түүхтэй “Хүмүүн Фильм” НҮТББ-ын хувьцаа эзэмшигчид дунд УИХ-ын гишүүн Ж.Мөнхбатын  төрсөн дүү Ж.Батсуурь багтдаг юм байна. Уг уран бүтээлийн нэгдэл өмнө нь “Долоон бурхан харвадаггүй” тэргүүтэй хоёр ч кино бүтээл дээр Ж.Мөнхбаттай хамтран ажилласан аж.

Тэд энэ удаа БСШУСЯ-ны Соёл урлагийг  дэмжих санд кино төслөө хүргүүлж, эхний удаад 800  сая төгрөгийн  санхүүжилт авчээ. Улмаар Засгийн газрын түвшинд асуудлыг ярьж байж, 500  сая төгрөгийн нэмэлт санхүүжилтээ шийдүүлсэн байна.

ЭХ СУРВАЛЖ: У.ХҮРЭЛСҮХ НЭР БҮХИЙ ТӨХК-УУДЫН ЗАХИРЛУУДЫГ ДУУДАЖ, ТУС БҮР 200 САЯ ТӨГРӨГ ГАРГУУЛАХ ҮҮРЭГ ӨГСӨН

 “Түүх мартахгүй” киног 2.3 тэрбум төгрөгт багтаан хийхээр төсөвлөсөн байдаг. Дэлхий дахинаа түүхэн кинонуудыг асар  өндөр өртгөөр хийж, энэ чиглэлд төрөөс нь дэмжлэг үзүүлдэг жишиг бий. “Түүх мартахгүй” кинонд нийслэл хотыг л гэхэд гурван цаг үеийн дүр төрхөөр нь харуулж буй. Мөнхүү ОХУ-аас  нэр хүндтэй жүжигчдийг нь хөлсөлж байгаа, Эрхүүд нэг сар орчмын зураг авалт хийсэн, уригдсан жүжигчдийн зураггүй өдөрт нь хүртэл цалин тооцдог гэхчлэн асар өндөр зардлаар бүтэж байгаагаа учирлав.

Тийм ч биз. Гэхдээ МАН-ын генсекийн албан тушаалыг хашиж явсан эрхэм эдүгээ цагийн УИХ-ын гишүүн Ж.Мөнхбат төрсөн дүүгийнхээ ТББ-д 2.3 тэрбумаар кино хийх ажил олж өгөөд, бүх зардлыг нь төрөөс даалгах лобби хийж байгаа нь буруу үзэгдэл юм.

Одоо нэг асуулт байна. “Түүх мартахгүй” кино уран бүтээлчид дээр бичсэнчлэн 1.3 тэрбум төгрөгийн санхүүжилтээ төрийн зүгээс амжилттай шийдүүлж чаджээ. Тэгвэл үлдсэн 1 тэрбум төгрөгөө хэрхэн босгосон бэ. Босгох ажил дууссан уу гэх асуулт.

ХАРИУЛТ НЬ, Ерөнхий сайдын дэргэд Соёл урлагийн  үндэсний зөвлөлийг байгуулах шийдвэр гарсан. Тус зөвлөлөөс олон нийтийг соён гэгээрүүлэх чиглэлд хийгдэхээр төлөвлөгдсөн ажлууд дунд “Түүх мартахгүй” кино хийх асуудал багтсан байдаг.

Улмаар эх сурвалж “Ерөнхий сайд У.Хүрэлсүх  нэр бүхий ТӨХК-иудын удирдлагуудыг дуудаж уулзан, тус бүр 200 сая төгрөг “Түүх мартахгүй” кино уран бүтээлийн багт гаргаж өгөхийг үүрэгдэж, ёсоор болгосон” гэх мэдээлэл өгөв.

Гэхдээ Засгийн газар талын эх сурвалж "ТӨХК-иуд мөнгө өгнө гэж амласан хэдий ч өгөөгүй юм билээ ” гэсэн юм.

Түүнчлэн "Түүх мартахгүй ” киног бүтээхэд дэмжлэг үзүүлэх чиглэл бүхий ажлын хэсгийг ЗГХЭГ-аас байгуулсан нь тус кинонд хичнээн их хүч хаясан нь харагдаж байгаа юм. Кино бүтээлтийн ажлыг эрчимжүүлэх ажлын хэсэгт Л.Оюун-Эрдэнэ, Ж.Мөнхбат, Ч.Хүрэлбаатар, Н.Энхболд, Ё.Баатарбилэг тэргүүтэй сайд, гишүүдээс гадна дэд сайд нар, Аймгийн засаг дарга хүртэл багтсан байна.

Ж.МӨНХБАТ: БИ 1 ТЭРБУМ ТӨГРӨГӨӨР КИНО ЗОХИОЛ БИЧЭЭГҮЙ

УИХ-ын гишүүн Ж.Мөнхбатыг “Түүх мартахгүй” кино зохиолыг 1 тэрбум төгрөгөөр бичсэн гэх мэдээлэл хөшигний ард идэвхтэй яригдсан. Энэ талаар Ж.Мөнхбат гишүүнээс тодруулахад “Би   кино зохиолчоор нь ажилласан. Гэхдээ 1 тэрбум төгрөг аваагүй. Миний дүү тэргүүтэй хүмүүсийн хамтран байгуулсан уран бүтээлийн нэгдэл түүхэн кинон дээр ажилладаг  туршлагатай хүмүүс. Миний хувьд түүхэн бүтээл гэдэг утгаар нь ач холбогдол өгч ажилласан. Ашиг хонжоо хайсан зүйл огт байхгүй. Олон хүмүүс үүн дээр сэтгэл зүрхээрээ нэгдсэн” гэх хариулт өглөө.

Харин нэр бүхий ТӨХК-диас тус бүр 200 сая төгрөгийн санхүүжилт авсан эсэх тухайд  “Бид дан ганц ТӨХК-ууд гэлтгүй Монголын татвар төлөгч топ-100 ААН-д хандив өгөхийг уриалан хандсан байгаа. Түүхэн кино ашиг олдоггүй. Асар өндөр зардлаар бүтдэг. Гадныхныг жишгээс харин ч бага өртгөөр бүтээхээр уран бүтээлчдийн баг шөнө өдөргүй ажиллаж байгаа. Асуудлыг дэвэргэж байж, уран бүтээлчдийн зоригийг мохоох вий” гэв.

Бидэнд олдсон баримтаар бол, “Эрдэнэс Монгол” компанийн захирал П.Ганхүү харьяа ТӨХК руугаа цохсон албан бичигтээ “Монгол Улсын Марша, Улсын баатар, Хөдөлмөрийн баатар Ю.Цэдэнбалын тухай “Түүх мартахгүй” баримтат, түүхэн уран сайхны бүтээхэд  компанийн төсөвт нийцүүлэн дэмжлэг өгөх” тухай чиглэлийг өгсөн байв.

Яг ийм байдлаар эрчим хүчний хоёр ч компани тус бүр 200 сая төгрөг өгсөн гэх мэдээллийг эх сурвалж өгөв.

Тиймээс ТӨХК-иудад "Түүх мартахгүй ” кино бүтээлийг санхүүгээр дэмжих чиглэл дээрээс нь ирж, тэд 1 тэрбум орчим төгрөгийг босгож өгсөн гэх бидний хардлага үндсэндээ нотлогдож байгааг онцолъё.

Ж.МЯДАГБАДАМ

Энэ мэдээнд өгөх таны үнэлгээ

Хуваалцаарай Жиргээрэй