Өвчтөнийг дараагийн шатны эмнэлэг рүү илгээх 13А маягтыг цахимаар олгодог болно гэж энэ оны эхээр Цахим хөгжил, харилцаа холбооны сайд мэдээлсэн. Улмаар энэ сарын 13-наас тус маягтыг цахимаар авах боломжтой болсныг дуулгасан.
ЭМДЕГ тус үйлчилгээ нэвтэрснээс хойш 3354 иргэн уг үйлчилгээг авсан тухай мэдээллээ. Тус үйлчилгээг иргэд эмнэлэг явах шаардлагагүйгээр E-Mongolia-д хандаж маягтаа илгээгээд өөрөө үзүүлэхдээ л 2, 3 шатлалын эмнэлэгтээ шууд очно гэж ойлгосон.
Гэвч e-mongolia-гийн үйлчилгээ хэсэгт хандаж Эмнэлэгт иргэнийг илгээх цахим бүртгэлийн маягтыг авах гэхэд маягтын мэдээлэл олдсонгүй гэсэн мэдээлэл гарч ирж байгаа юм.
Энэ талаар ЭМДЕГ-аас тодруулахад "ЭМЯ-наас илүү тодорхой мэдээллийг авах боломжтой. Иргэд заавал өрх, дүүргийн эмнэлэг орох шаардлагатай" гэлээ. Харин ЭМЯ-ны Эмнэлгийн тусламж үйлчилгээний газраас тодруулахад "Уг үйлчилгээ бүрэн цахимжаагүй байгаа гэж ойлгож болно. Дата мэдээлэл цуглуулах ажил хийгдэж байна. Өнөөдрийн нөхцөлд иргэн өөрөө өрх, дүүргийн эмнэлэгтээ очиж үзүүлэхэд 13А маягтыг цахимаар дараагийн шатны байгууллага рүү илгээнэ. Харин 13А маягт бүрэн 100 хувь цахимжихад иргэд E-Mongolia-гаас өөрсдөө илгээх боломжтой болно" гэлээ.
Эцэст нь дуулгахад 13А маягт арайхан цахимжаагүй байгаа аж.
Б.БАЯРТ
АНХААРУУЛГА: Уншигчдын бичсэн сэтгэгдэлд Eguur.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.