Том хэргүүд явсаар Ц.Элбэгдорж, Х.Баттулга, Б.Хурц, Т.Бадамжунай, Д.Эрдэнэбилэг нартай "уулзах цаг"

Н.Багабандийн Ч.Энхтайваныг өршөөсөн кэйсийг Х.Баттулгын Б.Хурцыг өршөөсөнтэй "адилтгаж" харах нь

Нэг. "Ар халхын атаман" хэмээгдэж байсан "Цагаан шонхор"-ын Ч.Энхтайваныг Н.Багабанди Төрийн тэргүүний суудлаас буухаасаа өмнөхөн өршөөсөн байдаг. Тухайн үед бизнесүүд дундаа рекетчингээрээ алдартай байсан Ч.Энхтайваныг Ц.Нямдорж шоронд хийснээрээ хөшигний ард алга ташилт авч, зарим хэсэгтээ "нуруу тэнийсэн" гэх.

Хүний санаанд ормооргүй байдлаар аймшигтай рекет хийдэг байсан гэгддэг Ч.Энхтайваны үеийн түүхүүд эдүгээ МАН-ын бүлгийн хурал дээр яригдаж, орчин үеийн рекет нараа дарахаар ажиллагаа хүртэл явуулсан гэх. Энэ талаар Х.Нямбаатар сайд ил тод ярьж, рекетчингүүдийн зарим бичлэгүүд ч цацагдав. Одоо тэдний жинхэнэ эзэд болох томчууд асар их айдастай байгаа гэх.

Хоёр. Х.Баттулга Ерөнхийлөгчийн суудлаас буухынхаа өмнөхөн Б.Хурцад өршөөл үзүүлсэн нь дээрх кэйс шиг санагдана. Байнгын хорооны танхимд "Л.Болд гишүүнээс болж Солонгост хүн цаазаар авахуулсан. Цааш нь ярих уу, яах уу" хэмээсэн Б.Хурцаас улс төр, хуулийн хүрээнийхэн айдаг. Өрөөнд нь орж ирээд, заналхийлсэн асуудлаар Ж.Батзандан хүсэлт гаргаж, төрийн хамгаалалттай хэсэг явсан түүхтэй.

ТЕГ-ын дарга, АТГ-ын дэд даргаар ажиллаж, мэргэжлийн хүрээндээ гялалзсан карьертай явсан Б.Хурцыг рекет бүлэглэлтэй адилтгах гэсэнгүй. Гэхдээ айлгадаг арга нь өөр ч дээгүүр хүрээндээ үнэхээрийн айдас төрүүлдэг нэгэн бол яах аргагүй Б.Хурц мөн. Өөрийнх нь хэлснээр У.Хүрэлсүх /Ерөнхий сайд байхдаа.сурв/ түүнийг БНСУ-д элчингээр суунгаа тархиа амраах санал тавьсан байдаг. Харин дараа нь АН угшилтай Х.Баттулга хэргээс нь ингэж өршөөжээ.

Үе үеийн төрийн тэргүүнүүд суудлаасаа буухын өмнө чухалчлан өршөөсөн Ч.Энхтайванд ч, Б.Хурцад ч томчуудыг айлгадаг арга байсан хийгээд тэдний өршөөл ивгээлд багтах шалтгаан нөхцөлүүд ч бий гэх логик.

Зэрэгцэн өрнөх томоохон хэргүүд хэдхэн хүн дээр зангигдаж байна. Тэдгээр нь...

АН-ын хурал хуй дээр ирэнгээ Б.Хурц "Т.Бадамжунай бол сайн хүн" гэх агуулгаар яриа өгөв. Эдүгээ Т.Бадамжунайтай нэг бичвэрт нэр нь дурдагдах вий гэдгээс улс төрийн хүрээнийхэн айж байхад Б.Хурц түүнийг ил өмөөрч ярьсан нь энэ. Эдүгээ Т.Бадамжунайг,

1. Газрын наймаа /хотын дарга байх үе, хүргэн Б.Анартай нь холбогдох 2016 оноос хойших үе, бусад.../
2. Мөнгө угаасан /Уг нь 60 тэрбумын хэрэг шалгагдах ёстой, МАН-ынхан шударга байвал/
3. Авлига зуучилсан / Х.Нямбаатар сайдын ярьсан 6.3 сая ам.доллар тэргүүтэй хэргүүд.../зэрэг сэжүүрээр Эрүүгийн хуулийн гурван зүйл ангиар яллагдагчаар татан шалгаж буй.

Сонирхолтой гэмээр ч юм уу. Цаг үе нь ингэж таарсан уу.

Т.Бадамжунайн шалгагдаж буй хэргүүд Ерөнхийлөгч асан Ц.Элбэгдорж, Х.Баттулга нарын ойрын хүрээллүүдтэй холбогдож, эдгээр дээр эрхэм Б.Хурц хоёр талын чухал дүрээр хөшигний ард тодорч, зэрэгцээд С.Зориг агсныг хөнөөсөн гэх хэргийг хэрэгсэхгүй болгосон үйл явц давхцав.

Амьдралынх нь 20-иод жилийг мөрдлөг, шорон гяндангаар явуулж, гурван шатны шүүх дамнуулан шүүж, "С.Зоригийг эд нар алсан" хэмээн тогтоочхоод эдүгээ Т.Чимгээ, Б.Содномдаржаа нарт хамаарах хэргийг прокурор хэрэгсэхгүй болгочихлоо.

Бүр хоржоонтой нь, прокурор хэргийг хэрэгсэхгүй болгосон бол тэдний амьдралаар "тоглосон" гэх Б.Хурц нарыг одоо шүүх ёстой логик үүсэв. Гэтэл үүнээс жилийн өмнө Б.Хурцыг Ерөнхийлөгч нь өршөөчихсөн байв. Ингээд тэднийг эрүүдэн шүүсэн асуудал хариуцагчгүй үлджээ. Энэ маш сонин кэйс ингэж эзэнгүй болов.

Одоо дээрх эрхмүүдийг холбосон байдлаар зэрэгцэж өрнөх үйл явцууд нь,

Нэг. Дээр тайлбарласанчлан, нэгэнт дотооддоо Т.Чимгээ нарыг эрүүдэн шүүсэн асуудал "өршөөгдсөн" учир хуулийн мухардалтай. Тэр ч үүднээс Т.Чимгээ нарын өмгөөлөгч олон улсын шүүхэд хандаж, үүнд нь МУ-ын Засгийн газар дэмжлэг үзүүлэхээр болсон гэх мэдээлэл байна.

Хоёр. Т.Бадамжунайн мэдүүлгээр Ц.Элбэгдорж тэргүүтэй МАН+АН бүлэглэлийн томчуудыг намнах зорилготой зэрэгцэж, Х.Баттулгын арми руу чиглэх нь тодорхой болж ирэв. Эдний аль ч талд ТЕГ-ын дарга Б.Хурц нэрлэгдэх боломжтой. Гэхдээ тэрбээр хэргээ өршөөлгөхдөө Х.Баттулгад ямар амлалт өгөв гэдэг нь ихээхэн сонирхолтой, хаалттай сэдэв юм.

Гурав. "Эрдэнэт үйлдвэр"-ийн 49 хувийг ОХУ-аас оруулж ирсэн сахал Д.Эрдэнэбилэгтэй хамаарах хэргийг шүүх рүү очуулах шахалт давхар өрнөхөөр хүлээгдэж байна. Ерөөс "Эрдэнэт үйлдвэр"-ийг монголын талд шилжүүлэн авах асуудлаас үүдэж, С.Зориг агсан амиа алдсан гэх сэжүүр эргээд энэ цаг үед дээрх хэргүүдтэй зэрэгцэн сөхөгдөж байна.

Дөрөв. Б.Хурц, Ц.Элбэгдоржийн бүлэглэл, Т.Бадамжунай, сахал Д.Эрдэнэбилэг нартай ойрын харилцаатай байсан Ерөнхий сайд асан Ч.Сайханбилэг монголд ирж шалгагдах нь цаг хугацааны асуудал болов.

Сэтгүүлчийн тэмдэглэл: Мэр сэр бичигдээд л байдаг. Сэтгүүлчид үнэрлээд л байдаг. Гэхдээ эцсийн нотломжгүй. Тийн атлаа нүдэн дээр карьерь нь өсч, ерөөс хууль цааз үйлчилдэггүй мэт бүхэл бүтэн хүрээлэл үүсч, тэдний хусам, өвдөл цөвдлөөр нийт олон нь амьдардаг. Ийм жишиг монголд тогтоод удсан.

Баялгийн, нийгмийн тэгш хуваарлилт алга бол тэндэхийг ардчилсан орон гэж нэрлэхэд ихээхэн хэцүү гэдгийг либериал үзэл санааг тунхагласан өрнөдүүд өнөөдөр өөрсдөө ч хүлээн зөвшөөрөх болжээ. Яг дээрх загварыг үүсгэж байсан тодорхой хүрээлэлтэйгээ одоо л тэмцэж магадгүй салхи үнэртэж байгаа нь сайн хэрэг юм. Өмнө нь мэдсээр байсан ч эл алхмыг хийж байсан удаа байхгүй.

Цөөн хэдхэн хүн ил нэрлэгдэж буй ч яг задалбаас улс төрийн намууд дамнаж, төрийн алба, хууль хяналтын байгууллага дамнасан амь бөхтэй сүлжээнүүдэд ч баахан сэрэмжлүүлэг өгөх нюанс нэгэнт үүссэн байна.

Төрт ёстой улс атлаа үе үе илтэд асуудалтай хүмүүсээ шуудхан Ерөнхийлөгч нь өршөөчихдөг. Нөгөө талд эрүүдэн шүүгээд зогсож байдаг. Авлига авч л байдаг, өгч л байдаг. Ийм шударга бус тогтолцоо цаашаа жирийн л байдлаар үргэлжлэх үү гэдэг нь өнөөдрийн бидний асуудал болчхоод байна.

Сошиал дээрх хөнгөн зугаа дагаж давхихаас илүү олон нийт дээрх хэргүүд хэрхэн өрнөхийг маш анхааралтай ажиглаасай. Шударгаар шийдэхийг шүүхийн байгууллагуудаас нэхээсэй.

Гэхдээ эрх баригчдын хэт муйхарлал дунд хэлмэгдэж, хонгилд гацаж яваа олон залуус, эрүүл бизнесменүүд, хөлд нь үрэгдэж байгаа хохирогсод бий гэдгийг дандаа санаж, асуудалд хэт муйхраар "Алаад өг, дүүжлээд өг" гэж хандах учиргүйг эргэцүүлүүштэй билээ.

Энэ мэдээнд өгөх таны үнэлгээ

Хуваалцаарай Жиргээрэй