"Парламентын гишүүдийн тоо иргэдэд таалагдахгүй байгаа ч хувьсгал хийх хэрэгтэй"

Долоо хоног бүрийн даваа гарагт УИХ дахь намын бүлгүүд хуралддаг билээ. Харин энэ долоо хоногт өнөөдөр буюу мягмар гарагт хуралдсан юм.

Намын бүлгийн хуралдаанаар ямар асуудлуудыг хөндсөн талаар ЗГХЭГ-ын дарга Д.Амарбаясгалангаас тодруулав.

Тэрбээр "Намын бүлгүүд өнөөдөр Үндсэн хуулийн гуравдугаар хэлэлцүүлгээ хийлээ. Парламентын гишүүдийн тоо ард иргэдэд шууд утгаараа таалагдахгүй байгаа нөхцөл байдал бий. Энэ өөрчлөлт хэрэгтэй гэдгийг ойлгосон бүлэг ч байгаа. Энгийнээр хэлбэл өнөөдрийн нөхцөл байдлыг эм ууж аргацаах уу, мэс засал хийж анагаах уу гэх сонголтын өмнө байна.

Өнгөрсөн 30 жилийн хугацаанд гарсан алдаа дутагдал бүрийг хараад суух уу, өөрчлөх үү гэдэг л сонголт юм. Эрх мэдлийн төвлөрөл их болсон. 76 гишүүн 76 Ерөнхий сайд, дарга болсон тул тогтолцоо, тоог өөрчилж байгаа юм" гэлээ.

Тэрбээр сэтгүүлчдийн асуултад дараах хариултыг өгөв.

-Танхимын бодлогод эсрэг байр суурь илэрхийлж буй парламентын гишүүд байгаа шүү дээ?

-Гишүүдийн хараат бусаар санал өгөх эрхэд халдаж болохгүй. Гэхдээ Засгийн газар гэдэг бол кабинет. Энэ кабинетийн гишүүд олонхын зарчмаар ажиллах ёстой. Цөөнхийн саналыг ч олонх нь харгалзан үзэх ёстой юм. Хараахан эцсийн байдлаар шийд гараагүй гэдгийг ойлгох хэрэгтэй.

Маргааш буюу тавдугаар сарын 31-ний өдөр УИХ-ын чуулган хуралдаж, ҮХӨ-ийн гуравдугаар хэлэлцүүлгийг хэлэлцэнэ. Эцсийн үр дүн гарсны дараа тухайн асуудлууд хэрхэх нь тодорхой болох болов уу.

-Сангуудын мэдээлэл ил болж буй энэ үед УИХ-ын гишүүд нэр холбогдсон нь олонх байна. 76 хүн сан тонодог байсан бол тэр тоо 126 болно гэсэн үг үү?

-Тоо нэмж буй явдлыг өнөөдрийн түвшнээр харж болохгүй. Тэгэх аваас ямар ч өөрчлөлт шинэчлэлт тухайн нийгэмд гарахгүй юм. Одоогийн үүссэн нөхцөлийг ч дээр дурдсан. Нийгмийг бухимдуулсан, ард иргэдэд итгэл төгс амьдрах эрх нь дутагдаж буй энэ үед зоригтой өөрчлөлт хийж, дараагийн түвшний хувьсгалыг хийгээд явах уу гэдэгт анхаарах хэрэгтэй юм.

Хэн нэгэн улстөрчийн, аль нэг намын эрх ашиг байж болохгүй. Үүнээс цааш бид 21-р зууны чиг хандлагатай, соёлтой, ухамсартай, улс төр нийгмийг бүтээхийн тулд ажиллах ёстой.

-Цалин тэтгэврийг нэмэх асуудлыг ч хөндөж байгаа шүү дээ?

-Бүлгийн хурлын дараа мэдээлэл өгье. Хурлаар эцэслэж шийдэх болохоор.

-Төрийн хэмнэлтийн тухай хуулиар ямар асуудал үүсээд байгаа вэ.Онцгой байдлын нэмэгдлийг олгож чадахгүй байгаа шүү дээ?

-Төрийн хэмнэлтийн хууль нь цар тахлын үед бий болсон ойлголт. Энэ хууль гарснаар өндөр ач холбогдол өгсөн. Тухайн хугацаанд гурав орчим их наяд төгрөгийг хэмнэж чадсан. Цаашид байх ёстой юу, үгүй юу гэдгийг бид хэлэлцэж байгаа. Учир нь шийдэх ёстой олон зүйлийг хааж байгаа талаар иргэд болон төрийн албаныхан ярьж байна. Засгийн газрын зүгээс энэ хаврын чуулганаар Төрийн хэмнэлтийн тухай хуульд зайлшгүй нэмэлт өөрчлөлт оруулъя гэх байр суурьтай байгаа. Хийх ёстой ажлуудаа "Хэмнэлтийн хууль"-аар хааж болохгүй шүү дээ.

Энэ мэдээнд өгөх таны үнэлгээ

Хуваалцаарай Жиргээрэй