Ажилгүйдлийн нөхөн олговрын асуудал "Эрдэнэс Монгол"-ын дотоод зөрчлийг хурцдуулав

Засгийн газрын дөрөвдүгээр сарын 6-ны өдрийн хуралдаанаар "Эрдэнэс Монгол" ХХК-ийн дүрмийг шинэчлэн баталсан билээ. Энэ үеэр тус компанийн зарим охин компани болон ТУЗ-ийг татан буулгахыг гүйцэтгэх удирдлагуудад үүрэг болгосон байдаг. Тэгвэл үүнээс улбаатайгаар тус газарт дотооддоо зөрчилдөөн, асуудал ихээр үүсжээ.

НЭГТ. Хүний нөөцөө сонгон шалгаруулсан гэх явдал.

2007 онд байгуулсан "Эрдэнэс Монгол" ХХК 2022 оноос эхлэн шинэчлэгдэж, бүтцээ өөрчлөн, сонгон шалгаруулалтаар хүний нөөцөө бүрдүүлсэн хэмээн мэдээлж байсан билээ. Тодруулбал, 88 ажлын байранд давхардсан тоогоор 4000 орчим анкет ирүүлсэн хэмээн тус компанийн гүйцэтгэх захириал С.Наранцогт мэдээлж байв. Тэгвэл албан бус эх сурвалжийн дурдсанаар эцсийн сонгон шалгаруулалтад тэнцсэн хүнийг ажилд аваагүй гэх бөгөөд сонгон шалгаруулалтад оролцогчид хуулийн хүрээнд байсан эсэх нь тодорхойгүй байсан гэх мэдээллийг өгөв.

Шалтгаан нь төрийн өмчит компанийн ажилчид ямар хуулийн дагуу сонгон шалгаруулалтыг хийж байгаа нь тодорхойгүй байсан бөгөөд хэрэв төрийин албан хаагч мөн бол төрийн албаны хуулиар ажилд орох ёстой гэх агуулгыг ярьсан юм.

ХОЁРТ. Татан буулгах охин компаниудын ажилчдад нөхөн олговор олгох эсэх нь тодорхойгүй.

"Эрдэнэс Монгол" компани өөрийн харьяа дахь 39 охин компанийг нэгдсэн удирдлагаар хангаж, олон улсаас хөрөнгө оруулалт татах, менежмент, засаглалын зөв хэлбэр рүү шилжинэ хэмээж байв.

Тэгвэл тэд охин компаниудаа татан буулгаж эхэлсэн хэдий ч эргээд асуудлууд үүсэж эхэлсэн. Шалтгаан нь татан буулгах охин компаниудын ажилчдад нөхөн олговор олгох эсэх явдал.

Эх сурвалжийн мэдээлж буйгаар олон арван ажилчид компани нь татан буугдаж буйтай холбоотойгоор нөхөн олговор авах эсэх нь тодорхойгүй байдал үүсэж, С.Наранцогт ч тухайн ажилтнуудад энэ талаарх ямар нэгэн тайлбарыг өгөхгүй байгаа ажээ.

ГУРАВТ. Хөдөлмөрийн гэрээ хийхгүйгээр ажиллуулж байжээ.

"Эрдэнэс Ассет Менежмент ҮЦК" ХХК толгой компани болох "Эрдэнэс Монгол"-ыг шүүхэд өгсөн байна. Шалтгаан нь "Эрдэнэс Ассет Менежмент ҮЦК"-ийн захирлын орлогч, гүйцэтгэх захирал хоёртой "Эрдэнэс Монгол" ажиллаж байх үедээ хөдөлмөрийн гэрээ хийгээгүй ажээ. Тиймээс тухайн ажилчид толгой компаниа шүүхэд өгсөн байна.

ДӨРӨВТ. С.Наранцогтын "галзуурал".

"Эрдэнэс Монгол" одоо бол ёстой хөл толгойн олдохгүй нөхцөл байдалтай байгаа. Шалтгаан нь С.Наранцогтын "галзуурал"-тай холбоотой. "Эрдэнэс Ассет Менежмент ҮЦК"-ийн захирлыг С.Наранцогт тамгаа өгөхийг шаардсан гэх. Тус компанийн захирал нь хуулийн дагуу тамгаа өгөхөөр тэмцэлдэж байгаа бололтой.

Түүнчлэн "Монголын төмөр зам"-ын удирдлагаар Улаанбаатар хот дахь гаалийн газрын даргаар ажиллаж байсан Б.Отгонсүхийг долоодугаар сарын 17-ны өдрийн Зам, тээврийн хөгжлийн сайдын ээлжит шуурхай хуралдаанаар томилсон билээ. С.Наранцогт Б.Отгонсүхийг ч ажлаа хийж чадахгүй бол суудлаа өгөхийг шаардсан гэх эх сурвалжуудын мэдээлэл бий.

Зөвхөн охин компаниудын тамга тэмдгийн асуудал ч үүсээгүй байна. Эх сурвалжийн мэдээлж буйгаар ажилчид нь ээлжийн амралтаа авахаар болоход "Ээлжийн амралт өгөхгүй. Авмаар байвал ажлаа өгөөд яв" хэмээсэн гэх. Энэ мэт авираас нь болж ажлын байраа орхигсод нэмэгдэж буй бололтой.

ТАВ. "Тавантолгой төмөр зам" татан буугдаагүй.

Өнгөрсөн жилийн арваннэгдүгээр сарын 30-ны өдрийн Засгийн газрын ээлжит хуралдаанаар "Тавантолгой төмөр зам"-ын удирдлагын эрх мэдлийг "Монголын төмөр зам"-д өгсөн юм. Ингэснээр дээрх хоёр компани нэгдэж, "Тавантолгой төмөр зам"-ыг буулгахаар болсон. Харамсалтай нь мөн л дотоод зөрчил үүсэж, одоог хүртэл "Тавантолгой төмөр зам" татан буугдаагүй байна.

Харин "Эрдэнэс силвер ресурс" болон "Эрдэнэс монгол алт" компаниуд нэгджээ.

А.ДАВАА

Энэ мэдээнд өгөх таны үнэлгээ

Хуваалцаарай Жиргээрэй