Монголын хөлбөмбөгийн шигшээ баг ДАШТ-ий эхний шатны тоглолтоо маргааш хийнэ

Манай улсын хөлбөмбөгийн эрэгтэй шигшээ баг Тажикстан улсад очлоо. Улмаар маргааш буюу аравдугаар сарын 12-ны өдөр Афганистаны эсрэг ДАШТ-ий эхний тоглолтоо хийх юм. Тоглолт Монголын цагаар 22.00 цагаас эхэлнэ.

Монголын Үндэсний шигшээ багийн ахлах дасгалжуулагч Ичиро Оцүко 2026 онд АНУ, Канад, Мексик улсуудад болох ДАШТ-ий эхний шатанд өрсөлдөх шигшээ багийн бүрэлдэхүүнийг сонгохоор 28 тоглогчийг дуудсан билээ.

Үндэсний дээд лигийн ээлжит тойргийн тоглолтууд өндөрлөсний дараа буюу аравдугаар сарын 5-нд шигшээ багийн анхны бэлтгэл эхэлсэн. Харин аравдугаар сарын 7-ны өдөр болсон бэлтгэлийн үеэр ФС Улаанбаатар клуб болон Үндэсний шигшээ багийн үндсэн хаалгач Э.Мөнх-Эрдэнэ зүүн гуяндаа бэртэл авсны улмаас Афганистаны эсрэг хийх эхний тоглолтдоо оролцох боломжгүй болсон юм.

Тэгвэл Үндэсний шигшээ багт дуудагдсан 23 тамирчны нэрийг хүргэе. Үүнд,

Хаалгачаар,

• А.Сайханчулуун /ФС Ховд/
• Б.Ариунболд /Хангарьд/
• С.Батмагнай /Дэрэн/

Хамгаалагчаар,

• Н.Хашчулуун /Дэрэн/
• Г.Бат-Оргил /ФС Улаанбаатар/
• Б.Амгаланбат /ФС Улаанбаатар/
• Филип Андерсон Чинзориг /ФС Славия Карловы/
• О.Мөнх-Оргил /Дэрэн/
• П.Баярцэнгэл /Хангарьд/
• Б.Ууганбат /Дэрэн/
• Э.Өнөр-Эрдэнэ /ФС Улаанбаатар/

Хагас хамгаалагчаар,

• П.Ууганбаяр /ФС Улаанбаатар/
• Г.Буяннэмэх /ФС Ховд/
• А.Дөлгөөн /Дэрэн/
• Б.Цогтбаяр /Su Rebenland/
• Б.Батмөнх /Дэрэн/
• Ц.Баасанжав /Дэрэн/
• Х.Цэнд-Аюуш /Төв Азарганууд/

Довтлогчоор,

• У.Тэмүлэн /Sporting Ilch/
• Г.Ганбаяр /ФС Комарно/
• Б.Намсрай /SP Falcons/
• О.Мижиддорж /ФС Улаанбаатар/
• Б.Мөнх-Эрдэнэ /ФС Ховд/ нар багтжээ.

Маргааш буюу Афганистаны эсрэг хийх тоглолтыг Тажикистаны Душанбе хотод хийх бол аравдугаар сарын 17-нд Улаанбаатар хотод 15.00 цагт манай улсын тамирчид Афганистаны эсрэг дахин тоглох билээ.

Энэ удаагийн шигшээ багийн хамгийн залуу тамирчин нь довтлогч У.Тэмүлэн юм. Харин ахмад тамирчин нь ДАШТ-ий урьдчилсан шатны тоглолтод тав дахь удаагаа тоглохоор зэхэж буй Х.Цэнд-Аюуш билээ. Манай улсын шигшээ багийн 23 тоглогчийн дундаж нас 24 байна.

Энэ мэдээнд өгөх таны үнэлгээ

Хуваалцаарай Жиргээрэй