Амь хохирсон 3 настай хүүгийн ээжид хилийн хориг тавиагүй, хамтран амьдрагчийнх нь ялын зүйл заалт нэмэгдэнэ

Ээжийнхээ хамтран амьдрагчид зодуулсан гурван настай Б хүү Турк улсад долоон сарын турш эмчилгээ хийлгэж байсан билээ. Улмаар биеийн байдал нь муудаж, амь насаа алдсан харамсалтай хэрэг гарсан байдаг.

Шалгалтын явцад хүүгийн ээжийн хамтран амьдрагч 34 настай Э нь хүүг зодсоныхоо дараагаар эмнэлэгт хүргэсэн даруйдаа зугтсан нь тогтоогдож байв. Хүүгийн ээж ч эл этгээдийг эрэн сурвалжилж байсан нэгэн гэдгийг хамтран амьдарч байх явцдаа мэдэж байсан гэх.

-Хүүгийн ээжид хилийн хориг тавиагүй тул гадаад руу гарах боломжтой-

Тэгвэл хүүгийн аав саяхан хэвлэл мэдээлэлд өгсөн ярилцлагадаа хүүгийн ээжийг Солонгос улс руу явахаар виз мэдүүлсэн хэмээжээ.

Хүүгийн ээжид цагдаагийн байгууллагаас энэ оны тавдугаар сард Эрүүгийн хуулийн 11.1 дүгээр зүйл анги буюу Хүний эрүүл мэндэд хүнд хохирол санаатай учруулах, 12.1.4-д Хүчиндэх гэмт хэргийг бага насны хүүхдийн эсрэг үйлдсэн гэх зүйл ангиар эрүүгийн хэрэг үүсгэн яллагдагчаар татах саналыг Баянгол дүүргийн прокурорын газарт хүргүүлсэн байдаг. Гэвч прокуророос ээжийг нь яллагдагчаар татахаас татгалзаж байв.

Харин түүнийг бага насны хүүхдийн дэргэд архидан согтуурсан хэмээн Зөрчлийн хуулиар 300 мянган төгрөгөөр торгож шийдвэрлэсэн байдаг.

Тэгвэл хүү амь насаа алдсанаас үүдэж, хүүгийн ээжид холбогдох хэрэг шинээр илэрсэн нөхцөл байдал гэх шалтгаанаар цагдаагийн байгууллагад шалгагдаж байгаа ажээ. Ингэснээр түүнд холбогдох эрүүгийн хэргийн зүйл ангийг хүндрүүлэх төлөвтэй байна. Гэсэн хэдий ч прокурорын байгууллагаас хүүгийн ээжийг цагдан хорих саналыг шүүхэд илгээгээгүй тул хүүгийн аавын хэлсэн үнэн бол хил гарч явахад ямарваа нэгэн асуудал үүсэхгүй болж таарах нь.

-Хүүгийн ээжийн хамтран амьдрагч Э-гийн ялын хэмжээ нэмэгдэнэ-

Хүүгийн ээжийн хамтран амьдрагч Э өмнө нь залилангийн хэргээр эрэн сурвалжлагдаж байсан нэгэн билээ. Тэгвэл тэрбээр залилангийн хэргээр хэдийн ялаа эдэлж буй аж.

Харин хүүгийн амь хохирсон тул Э-д холбогдох хэргийн зүйл анги өөрчлөгдөж, амь хохирсон гэх зүйлчлэл нэмэгдэж, шүүхээс хэргийг мөрдөн байцаалтын шат руу илгээжээ.

Ташрамд дурдахад, хүүгийн аав нь Туркийн эмнэлэгт 200 гаруй сая төгрөгийн өртэй үлдсэн бөгөөд хүүгийнхээ цогцсыг авахын тулд ахыгаа уг өрийг төлөх үүрэгтэйгээр бичиг баримт бүрдүүлж, үлдээсэн хэмээн ярьжээ. Хүүгийн ээжийн хувьд одоогоор уг зардлыг хуваалцаж төлөхгүй байгаа гэх. Шүүхээр ч эл асуудлыг эцэслээгүй, хүүгийн ээжийг эл зардлыг төлөх шийдвэрийг гаргаагүй юм.

А.ДАВАА

Энэ мэдээнд өгөх таны үнэлгээ

Хуваалцаарай Жиргээрэй