Израилын сайд Газад цөмийн бөмбөг ашиглах боломжтой гэжээ

Израил улсын Парламентын гишүүн Газын зурваст цөмийн бөмбөг ашиглах боломжтой гэж хэлсэн байна. Ням гарагт /2023.11.05/ Өв соёлын сайд Амихая Элияху радиод ярилцлага өгчээ. Түүнээс цөмийн зэвсэг ашиглах хувилбарын талаар асуухад тэрбээр “Бас нэг арга зам” гэж хариулсан байна.

Элияху ингэж хэлсний дараа Арабын орнуудын хэвлэл мэдээллүүд шуурсан юм. Хамас бүлгийн хэвлэлийн төлөөлөгч “Элияху бүс нутаг, дэлхий дахинд аюул учруулж буй урьд өмнө нь үзэгдээгүй Израилын терроризмыг төлөөллөө” гэж хэлсэн аж.

Мөн Саудын Арабын Гадаад хэргийн яам түүний хэлсэн үгийг маш хатуу буруушааж байна гэж мэдэгдэл хийсэн юм. Тус яам мэдэгдэлдээ “Сайдыг нэн даруй огцруулалгүй, гишүүнчлэлийг нь зүгээр л цараасан явдал бол Израилын засгийн газрын хүн төрөлхтөн, ёс суртахуун, шашин шүтлэг, хууль эрх зүйн хэм хэмжээ үнэт зүйлсийг үл тоомсорлож байгааг харуулж байна” хэмээжээ.

Тэгвэл Израилын Ерөнхий сайд Бенжамин Нетаньяху түүнд сахилгын арга хэмжээ авч, Парламентын уулзалтад оролцохоос тодорхойгүй хугацаанд хориглосон байна.

Нетаньяхугийн тамгын газраас мэдэгдэл хийхдээ “Элияхугийн хэлсэн үг бодит байдал тээр тулгуурлаагүй. Израил болон Израилын Зэвсэгт хүчин гэм зэмгүй хүмүүсийг хохироохгүйн тулд олон улсын хуулийг хамгийн өндөр стандартын дагуу дагаж мөрдөн ажиллаж байгаа. Бид ялалт байгуулах хүртлээ үүнийгээ үргэлжлүүлэх болно” гэжээ.

Элияху цахим хуудас дээрээ “Юмны учрыг ойлгодог хэнд ч бай цөмийн зэвсгийн талаар хэлсэн үг маань зүйрлэл байсан гэдэг нь ойлгомжтой. Терроризмын эсрэг хүчтэй, давуулсан цохилт өгөх нь шаардлагатай зүйл, ингэснээр нацистууд болон тэдний дэмжигчдэд терроризм нь оролдоод байх зүйл биш гэдгийг ойлгуулна” гэж бичсэн байна.

Одоогийн байдлаар дайны улмаас 9,500 гаруй Палестин хүмүүс амь үрэгдсэн байгаа юм.

Эх сурвалж: Reuters

Энэ мэдээнд өгөх таны үнэлгээ

Хуваалцаарай Жиргээрэй