Газын зурвас дахь дайн олон сарын турш үргэлжилнэ гэж Израилын Зэвсэгт хүчний Жанжин штабын дарга Херзи Халеви лхагва гарагт /2023.12.27/ хэлсэн байна.
Тэрбээр “Шууд үйлчлэх ид шидийн шийдэл байхгүй, террорист бүлгийг устгах дөт зам гэж үгүй. Зөвхөн тууштай тэмцэх хэрэгтэй. Бид Хамасын удирдлагад хүрнэ, хэдэн долоо хоног, олон сарын хугацаа шаардсан ч гэсэн” хэмээсэн юм.
Зул сарын баяраас хойш Израилын арми байлдааны үйл ажиллагаагаа эрчимжүүлсэн. Ялангуяа Газын зурвасын урд хэсэгт тус улс цохилт өгөхөө нэмэгдүүлж, тэнд амьдарч буй энгийн иргэдийг нүүн суурьшихыг шаардсан байна.
НҮБ-ын Хүний эрхийн албаны хэвлэлийн төлөөлөгч Сейф Маганго “Газын зурвасын дунд хэсгийг Израилын арми үргэлжлүүлэн бөмбөгдөж байгаад санаа зовниж байна. Зул сарын баяраас хойш 100 гаруй палестинчууд үүний улмаас амь үрэгдсэн” гэж хэлсэн юм.
Палестины Эрүүл мэндийн яам мэдээлснээр аравдугаар сарын 7-нд дайн эхэлснээс хойш Израилын агаарын цохилтын улмаас 21 мянган хүн амь үрэгджээ. Мөн Газын зурваст оршин суудаг 2.3 сая хүний ихэнх нь оршин суугаа газраасаа хэд хэдэн удаа нүүн шилжсэн байна.
Эх сурвалж: Reuters
АНХААРУУЛГА: Уншигчдын бичсэн сэтгэгдэлд Eguur.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.