Малчдад шагнал тарааж гүйсэн ерөнхийлөгчийн дүү энэ долоо хоногт гар сунгана

Ерөнхийлөгч У.Хүрэлсүхийн дүү У.Отгонбаяр, ХХААХҮ-ийн сайд Х.Болорчулууныг дагаад Хэнтийн хоёр, Сүхбаатарын гурав, Дорнодын дөрвөн сумаар явсан. Есөн сумаар явж, "Улсын аварга малчин", "Улсын аварга тариаланч" шагнал тараасан байдаг.

Хэнтий аймагт:

1. Хэрлэн сумын иргэн Ч.Эрдэнэцэцэгт “Улсын аварга тариаланч" шагнал,
2. Баянхутаг сумын Цантын хоолой багийн малчин Б.Эрдэнэбатад “Улсын аварга малчин” шагнал

Сүхбаатар аймагт:

1. Онгон сумын анхны "Улсын хошой аварга малчин"-аар тодорсон Ё.Төгсмандах,
2. Онгон сумын Эхбулаг багийн "Улсын Аварга малчин"-аар тодорсон Ц.Энхсайхан
3. Наран сумын "Улсын Аварга малчин"-аар тодорсон Б.Бат-Өлзий
4. Дарьганга сумын "Улсын Аварга малчин"-аар тодорсон Давхайн Ренчиндорж, гэргий А.Адъяасүрэн.

Дорнод аймагт:

1. Цагаан-Овоо,
2. Баян-Уул
3. Чойбалсан,
4. Чулуунхороот "Улсын аварга малчин", “Улсын аварга тариаланч хамт олон” шагналыг гардуулсан.

Гэтэл Хэнтий аймгийн хоёр, Сүхбаатар аймгийн 11, Дорнод аймгийн хоёр суманд шилэн буюу төмөр зуд нүүрлээд байгаа билээ. Энэ утгаараа Ерөнхийлөгч У.Хүрэлсүхийн дүү У.Отгонбаярыг "Шагнал тараачхаад таг чиг, Сүхбаатар аймгийн Нутгийн зөвлөлийн даргын хувиар малчдад тусалсангүй" гэх шүүмжлэл хөвөрсөн юм.

Тэгвэл тэрбээр өөрийн цахим хуудаснаа "Өнөөдрөөс эхлэн улс, аймгийн онцгой комиссын хамтарсан ажлын хэсэг өвөлжилт хүндэрсэн сумдад ажиллана. Улаанбаатар хот дахь нутгийн зөвлөл зохион байгуулалтад ороод энэ долоо хоногт сум бүрд 15 тонн хивэг өгөхөөр ажиллаж байгаа. (нийт 200 тонн) Дараа нь хандивын урлагийн тоглолт, төл малын нэмнээ цуглуулах гэх мэт ажил төлөвлөж байна" хэмээжээ.

Түүний хувьд, 7 мандат бүхий Дорнод, Сүхбаатар, Хэнтий аймгуудын VI тойрогт нэр дэвшихээр горилж байгаа билээ.  

АН-аас Ж.Батсуурь гишүүн уг бүсийг ахлаж ажиллахаар бэлтгэлээ базааж эхэлсэн бол МАН-аас Ерөнхий сайд Л.Оюун-Эрдэнэ бүсээ тэргүүлэх хувилбар эцэслэгдээгүй байна. Б.Бат-Эрдэнэ гишүүн МАН-аас нэр дэвших эсвэл залуу дүр М.Ганхүлэгийг нэрлэж болохоор байна. Харин ХХААХҮ-ийн сайд Х.Болорчулуун ирэх дөрөвдүгээр сард илүү тодорхой болох хүлээлттэй. Гэхдээ нэр дэвшихээр горилж байгаа нь шагнал идэвхийлэн тарааснаас тодорхой болсон. Хэнтий аймаг АН-аас газрын асуудлаар шалгагдаж байсан Т.Пүрэвхатан ганцаар нэрлэгдэж, сайд асан М.Зоригт Дорнод аймгийг ахлах хувилбар яригдаж буй.

У.УЯН

Энэ мэдээнд өгөх таны үнэлгээ

Хуваалцаарай Жиргээрэй