Боксын холбоо: Хэргийн эзэн ажилдаа үлдэж, ерөнхийлөгч нь явсан ч тамирчдад ГАНЦХАН боломж үлдэв

Монголчууд 1964 оноос хойшхи зуны олимпын бүх наадамд оролцсон. Энэ түүхт 60 жилийн хугацаанд нийт хоёр алт, 11 мөнгө, 17 хүрэл буюу нийт 30 медалийг эх орондоо авчирчээ. Үүнээс жүдочид 11, чөлөөтийнхөн 10, буудлагаар хоёр, боксоор долоон медаль хүртсэн байна. Ингээд харвал монголчууд олимпод дээрх дөрвөн төрлөөр голлох амжилтыг тогтмол үзүүлж буй гэж харж болно.

Тэгвэл 2028 оноос эхэлж боксыг олимпын төрлөөс хасна гэгдэж буй. Хэрэв энэ шийдвэр эцэслэгдэн батлагдвал энэ зуны Парисын олимпоос өөр боломж босксынхонд үлдээгүй гэсэн үг. Гэсэн ч тэдэнд үлдсэн ганц боломжийн бараг тал хувийг холбоо нь үгүй хийж, нийтийн шүүмжлэлийг дагуулаад байна.

Учир нь боксчдыг гурав болон тавдугаар сард олимпын эрх олгох чухал хоёр тэмцээн хүлээж байв. Анхных нь өчигдөр буюу гуравдугаар сарын 06-нд Италийн Буста Ацизо хотод эхэлсэн ч манай баг тамирчид оролцож чадсангүй.

Монголын боксчид тус хотод газардсан ч яагаад тэмцээнд оролцоогүй вэ

Эх сурвалжийн хэлснээр Монголын боксын холбооны дээрх асуудал удирдлагуудтай нь шууд холбоотой гэв. Тодруулбал, уг холбооны ерөнхийлөгчөөр У.Баатар гэх эрхэм ажилладаг байсан бол ерөнхий нарийн бичгийн даргаар Ц.Батнасан ажилладаг. Гол будлианы эзэн бол холбооны генсек Ц.Батнасан. Түүний хувьд боксын үндэсний шигшээ багийн оролцох байсан олимпын эрх олгох анхны тэмцээний мэдүүлгийг нэгдүгээр сарын 19-нд багтааж зохион байгуулагчдад хүргэх байсан ч хариуцлага алдаж хүргүүлээгүй аж. Товчхондоо энэ шалтгаанаар манай боксчид тус тэмцээнд оролцсонгүй.

Эргэн хараад, цаг хугацааны хувьд тооцоолоод үзвэл одоогоос хоёр сарын өмнө манай тамирчид дээрх чухал тэмцээнд оролцох үгүй нь шийдэгдчихсэн байсныг анзаарч болно. Харин яагаад баг тамирчид огт мэдэлгүйгээр тэмцээнд оролцох улсдаа газардсаныхаа дараа ийм мэдээ сонсов гэдэг анхаарал татна. Тэгвэл тус холбооны генсек мэдүүлэг хүргүүлэх чухал үед ажилдаа хэд хоног ирэлгүй, архидан согтуурч, холбоо тогтоох боломжгүй нөхцөл байдал үүсгэжээ.

Ингээд түүнээс мэдүүлэг хоцроосон гэдгийг мэдсэн ч аль хэдийнэ оройтож, боломжгүй гэдэг хариу сонссон юм байна. Энд мөн л ийм нөхцөл байдал үүссэнийг холбооны удирдлага, дарга мэдсэн хэрнээ яагаад багтаа хэлээгүй вэ гэдэг анхаарал татна. Энэ асуудлаас үүдээд тус холбоо ч ерөнхийлөгчгүй болжээ. Өөрөөр хэлбэл, Монголын боксын холбооны ерөнхийлөгч У.Баатар ажлаа өгсөн байна. Харин хэргийн эзэн гэгдэж буй генсек Ц.Батнасан Италид тамирчидтайгаа уулзахаар очоод байгаа юм байна.

Монголын боксчдод олимпод оролцох боломж үлдсэн үү

Манай боксчдод одоо олимпод оролцох эрх авах нэг л тэмцээн үлдсэн. Тэрхүү тэмцээн ирэх тавдугаар сард Тайландад болно. Тиймээс тамирчин бүрийн халаасанд нэг л боломж бий. Муугаар төсөөлвөл энд эрх авч чадаагүй тамирчин ахиж олимпын дэвжээнд гаралгүйгээр замналаа дуусгана. Учир нь 2028 оноос боксыг олимпын төрлөөс хасах асуудал хүчтэй хөндөгдсөн хэвээр байгаа.

Мэдээж бүх боксчид ганцхан тэмцээнээс эрх авах боломжгүй. Харин сая болсон эрх олгох анхны тэмцээнд оролцсон бол олимпод тулалдах тамирчдын тоо харьцангуй нэмэгдэх байв. Учир нь тус тэмцээнд эхний гурван байрт шалгарсан бүх тамирчин олимпод оролцох эрхээ өвөртлөх байж.

Монголын боксын холбооны одоогийн нөхцөл байдал

Эх сурвалжийн хэлж буйгаар, Монголын боксын холбооны ерөнхийлөгч У.Баатар ажлаа өгсөн бөгөөд түүнийг дэд ерөнхийлөгч В.Ганзориг нь орлож байгаа бол генсек Ц.Батнасан ажлаа өгөөгүй хэвээр байна. Энэ асуудлаар шигшээ багийн дасгалжуулагчaaр ажиллаж буй МУГТ Д.Отгондалайгаас тодруулахад, "Одоогоор тодорхой мэдээлэл өгөх боломжгүй. Ерөнхий нарийн бичгийн дарга, удирдлагууд гадаадад байгаа. Ирээд удирдах зөвлөл хуралдаж, шийдвэр гаргаж мэдээлэл өгөх байх" гэсэн юм.

Италид албан бус тоогоор 32 гаруй хүний бүрэлдэхүүнтэй баг байрлаж байгаа бөгөөд тэд эрх олгох тэмцээнд оролцогчдын жагсаалтад багтаагүй тул тамирчдын хотхон руу ч нэвтэрч чадахгүй нөхцөл байдалд байгаа юм байна. Тэд нэгдүгээр сарын 13-нд Унгарыг зорьж, урт хугацааны хамтарсан бэлтгэлд хамрагдан зарим олон улсын тэмцээнд оролцож, бэлтгэлээ сайн хангаад байсан. Харин тэдний олон сарын хөдөлмөрийг холбоо нь үгүй хийж, ийнхүү олон арван залуусын хичээл зүтгэлийг үнэгүйдүүлжээ. Ташрамд дурдахад, олимпын наадам бүрээр энэ төрөлд медаль авах өндөр магадлалтай орнуудын тоонд зүй ёсоор багтдаг улсынхаа нэр хүндийг унагаж, цаашлаад нийт тамирчдын амжилтаас ч хойш татах таагүй нөхцөл байдал үүсгэсэн холбогдох хүмүүст ямар хариуцлага хүлээлгэх вэ гэдэг чухал байна.

Энэ мэдээнд өгөх таны үнэлгээ

Хуваалцаарай Жиргээрэй