Ш.Солонго, Г.Баясгалан нар санал хувааж, О.Мөнхсайхан найзаараа дэмжлэг эрүүлснээр ҮХЦ-ийн даргын томилгоо гацжээ

Голч агуулга: ҮХЦ-ийн даргад Ш.Солонго, Г.Баясгалан нар дээр санал хуваагдаж, О.Мөнхсайхан найзаараа дамжуулан Ерөнхийлөгчийн дэмжлэг авахаар хөөцөлдөж байна.

Уг нь Үндсэн хуулийн цэцийн тухай хуулийн 6.1-д “Цэцийн даргаар сонгох хүний нэрийг Цэцийн гишүүд дотроосоо дэвшүүлэн хуралдаанаараа хэлэлцэж, саналыг нууцаар хурааж, нийт гишүүний олонхын санал авсан хүнийг сонгоно” гэж заасан. Гэтэл Н.Чинбатыг явсан 2023.11.26-ны өдрөөс хойш Үндсэн хуулийн цэц даргагүй 126 хонов. Бараг дөрвөн сар. Өөрөөр хэлбэл даргад хэнийг нэр дэвшүүлэх вэ гэдэг асуудал энэ байгууллагад шийдлээ олоогүй хэвээр байна гэсэн үг.

Ерөнхийлөгч, УИХ-ын дарга, Ерөнхий сайд гэсэн төрийн гурван өндөрлөгийн дараа ҮХЦ-ийн даргын албан тушаал эрэмбэлэгддэг. Дөрөв дэх даргаа томилж чадахгүй байгаад улстөрийн чухам ямар нюансууд үүсэв гэдгийг хүргэе.

-О.Мөнхсайхан ҮХЦ-ийн дарга болох хүслээ А.Бямбажаргалаар дамжуулж байна-

Нэг талаас Үндсэн хуулийн нэмэлт өөрчлөлтөд гар бие оролцож батлалцсан гэж авторлогддог О.Мөнхсайхан ҮХЦ-ийн даргад “амбицлаж” байгаа тухай мэдээлэл бий.

Тэрбээр, Ерөнхийлөгчийн хуулийн зөвлөхөөр ажиллаж байгаад оны өмнөхөн ҮАБЗ-ийн дарга болсон А.Бямбажаргалтай найзууд. Тэдний хэн хэн нь МУИС-ийн Хууль зүйн сургуулиар овоглодог, салшгүй намтартай. О.Мөнхсайхан дарга болох санаархлаа А.Бямбажаргал нараар дамжуулан илэрхийлж, энэ чиглэлээрх уулзалтууд хийж буй гэх. Ялангуяа Ерөнхийлөгч У.Хүрэлсүхийн дэмжлэгээр ҮХЦ-ийн дарга болох магадлалтай ч гэгдэв.

Гэвч Ерөнхийлөгчийн нөлөө цэц дээр өндөр байх авч, улсын дөрөв дэх дарга болоход О.Мөнхсайханы нас хэтэрхий “залуудна” гэж үзэж буй бололтой.

-ҮХЦ-ийн гишүүдийнх нь санал Ш.Солонго, Г.Баясгалан нар дээр хуваагдаж, зөрөлджээ-

Нөгөө талаас Ш.Солонго, Г.Баясгалан нар горилж, ҮХЦ-ийн гишүүдийнх нь санал хуваагдаад байна. Тэдний аль аль нь УИХ-ын санал болгосноор ҮХЦ-ийн гишүүн болж байсан түүхтэй.

Ш.Солонгын хувьд: Москвагийн их сургуулийг хуульч мэргэжлээр дүүргэсэн бөгөөд ЗГХЭГ-т 26 жил ажиллахдаа сүүлийн 10 жил нь тус газрын тэргүүн дэд даргын албан тушаалыг хашсан. Энэ хугацаанд 20 гаруй Ерөнхий сайдтай хамтран ажиллаж гал тогоог нь барьж явсан хүн. Тэрбээр, М.Энхболдыг спикер байх үед УИХ-аас санал болгуулж байгаад ҮХЦ-д очсон ойрын хүн нь гэгддэг. Мөн У.Хүрэлсүхийн фракц дэвшүүлэх, "холдуулах" замаар цэц рүү илгээх тохироог хийсэн ч гэгддэг. Аль ч бай, өнөөдрийн нөхцөлд Ерөнхий сайд Л.Оюун-Эрдэнийн нөлөөгөөр ҮХЦ-ийн даргад дэмжлэг авч чадахгүй байж мэдэх дүр юм.

Г.Баясгалангийн хувьд: Саяхан ажлын байран дээрээ согтуурхаж буй бичлэг нь цацагдаж, даргын төлөөх марафоноосоо чамгүй хойш татуулав. Баянхонгорын гаралтай, хууль талдаа харьцангуй сайн мэргэшсэн нэгэн тул Н.Чинбатыг дарга болдог жилийн өрсөлдөөнд Г.Занданшатарт дэмжигдэж явсан. Энэ удаад хэний дэмжлэгээр зүтгэж байгаа нь төдийлөн тодорхой бус ч, согтуу бичлэг нь цацагдахаас өмнө ритинг нь харьцангуй өндөр байв.

-Бүрэн эрх: Ш.Солонгынх хэдхэн сар, Г.Баясгалангийнх жилийн дараа дуусна-

Үндсэн хуулийн цэцийн тухай хуулиар цэцийн даргад гурав хүртэл гишүүн нь нэр дэвших боломжтой. Ямартай ч О.Мөнхсайхан хүслээрээ зүтгэж, гол санал нь Ш.Солонго, Г.Баясгалан нар дээр хуваагдсан нөхцөл байдалтай байна.

Энэ гурав нэр дэвшсэн ч, нэг асуудал бийг онцлъё. Тодруулбал,

• Цэцийн гишүүн Ш.Солонго нь 2018.05.24-ний өдөр томилогдсон. 2024 оны тавдугаар сард бүрэн эрхийн хугацаа дуусна.
• Цэцийн гишүүн Г.Баясгалан нь 2019.06.06-ны өдөр томилогдсон. Бүрэн эрхийн хугацаа нь 2025 оны зургаадугаар сард дуусна.

ҮХЦ-ийн дарга гурван жилийн хугацаатайгаар томилогдож, нэг удаа улирч болдог. Тэгэхээр Ш.Солонгын бүрэн эрхийн асуудал цэцийн даргаар суухад хараахан хүрэлцэхгүй болчхоод буй гэж харагдахаар. Харин Г.Баясгалан сонгогдлоо гэхэд мөн л давчуухан хугацаатай байхаар нөхцөл байдал үүссэн байж болзошгүй.

Эцэст нь төрийн гурван өндөрлөгийн саналаас үл хамаарч, ҮХЦ-ийн 9 гишүүний саналаар цэцийн даргыг сонгох учиртай билээ.

Энэ мэдээнд өгөх таны үнэлгээ

Хуваалцаарай Жиргээрэй