Танилц: Д.Тогтохсүрэнгийн хэлснээр сонгуульд нэр дэвших эрхгүй МАН-ын гишүүд

Өнгөрсөн бямба гарагт /2024.03.23/ МАН Бага хурлаа хуралдуулж, мөрийн хөтөлбөрөө хэлэлцэж эцэслэсэн. Энэ үеэр МАН-ын удирдлагууд гишүүддээ “Хэрэгт нэр холбогдсон л бол сонгуульд дэвшүүлэхгүй” гэж сануулсан.

Харин өчигдөр болсон МАН-ын бүлгийн хуралдааны үеэр, бүлгийн дарга Т.Тогтохсүрэн, "Авлига, албан тушаалын хэрэгт яллагдагчаар татагдсан, эсвэл шүүхээр ял шийтгэл авсан бол мандат олгохгүй зарчимтай" хэмээн дахин тодотгов.

Тэгвэл МАН-аас дээрх "хориг"-т орох хэд, хэдэн гишүүн бий. Учир нь тэд Хөгжлийн банк, ногоон автобус, нүүрсний хэргүүдэд, авлига албан тушаалын хэрэгт холбогдоод буй.

Нэгт: Ж.Мөнхбат

Тэрбээр нүүрсний хэрэгт холбогдсоныхоо дараа өөрийн хүсэлтээр УИХ-ын гишүүнээс буусан. Түүнийг Эрүүгийн хуулийн 22.1.3 дахь заалт буюу улс төрд нөлөө бүхий этгээд, албан тушаалын байдлаа урвуулан ашиглаж, бусдад давуу байдал бий болгож хохирол учруулсан, үндэслэлгүй хөрөнгөжсөн зүйл ангиар буруутгаж, шалгаж буй.

Хоёрт: Т.Аюурсайхан

Тэрбээр Авлигын эсрэг хуулийн 4 дүгээр зүйлийн 4.1.1-д хамаарах нийтийн албан тушаалтнаар ажиллаж байхдаа эрх мэдэл, албан тушаалын байдлаа урвуулан ашиглаж, өөртөө, бусдад давуу байдал бий болгосон байж болзошгүй, мөн үндэслэлгүйгээр хөрөнгөжөсн, мөнгө угаасан гэх хэрэгт яллагдагчаар татагдсан. Түүнд гурван жилийн хорих ял оноосон.

Гуравт: Б.Энх-Амгалан

Нийслэлийн прокурорын газраас УИХ-ын гишүүн Б.Энх-Амгаланд "Эрх мэдэл, албан тушаалын байдлаа урвуулан ашигласан" гэх үндэслэлээр яллах дүгнэлт үйлдэн Сүхбаатар дүүргийн Эрүүгийн хэргийн анхан шатны шүүхэд шилжүүлсэн байдаг. Шүүх хуралдаан дөрвөн өдөр үргэлжилсний эцэст Б.Энх-Амгаланг Эрүүгийн хуулийн 22.1 дүгээр зүйлийн гурав дахь хэсэгт заасан улс төрд нөлөө бүхий этгээд эрх мэдэл, албан тушаалын байдлаа урвуулан ашигласан гэмт хэрэг үйлдсэн гэм буруутайд тооцож, нийтийн албанд томилогдох эрхийг таван жилийн хугацаагаар хасаж, 40 сая төгрөгөөр торгох ял оногдуулсан.

Дөрөвт: Д.Сумъяабазар, Ж.Сүхбаатар

Нийтийн тээврийн парк шинэчлэлийн хүрээнд оруулж ирсэн 100 ширхэг ногоон автобус чанарын болоод худалдан авах ажиллагааны хувьд асуудал дагуулсан. Үүнтэй холбогдуулан хянан шалгах түр хорооны даргаар Ж.Бат-Эрдэнийг /2024.03.19/ томилсон. Тэрбээр сонгогдсоныхоо дараа "Энэ хэрэгтэй холбоотой бүх хүмүүсийг сонсголд дуудна. Гол зорилго нь ард, иргэдэд нээлттэй мэдээлэл өгөх юм" гэдгийг онцолсон. Тиймээс ногоон автобусны хэрэг болон сонсголоор дуудагдах учиртай эхний хоёр хүн бол хотын дарга асан Д.Сумъяабазар, түгжрэлийн сайд асан Ж.Сүхбаатар нар юм.

Тодруулбал, Ж.Сүхбаатарын хувьд, “Тэнүүн-Огоо” ХХК-ийг хууль бусаар шалгаруулсан нь хөдөлшгүй баримтаар тогтоогдсон гэх мэдээлэл бий. Түүнийг яллагдагчаар татаад буй.

Харин Д.Сумъяабазарын хувьд ногоон автобусны хууль бус худалдан авалтыг нийслэлийн харьяа агентлаг, газрын дарга нар зохион байгуулсан ч тэдэн зөвшөөрөл өгч, тамга дарсан хүн. Гэхдээ хуулийнхан түүнийг яллагдагчаар огт татаагүй байгаа юм.

Энэ мэдээнд өгөх таны үнэлгээ

Хуваалцаарай Жиргээрэй