Романсын залилан үйлдэж 1 сая ам.доллар завшсан Япон эмэгтэй 9 жилийн хорих ял сонсжээ

Японы сошиал орчинд “Riri the sugar baby” нэрээр танигдсан Май Ватанабэ залилангийн хэргээр есөн жилийн хорих ял сонссон байна.

Тэрбээр ахмад насны эрэгтэйчүүдээс хэрхэн мөнгө салгаж, романсын залилан хийх зааварчилгаа хүртэл зардаг байсан юм. Даваа гарагт /2024.04.22/ Нагояа хотын дүүргийн шүүх 25 настай Ватанабэг 2021 оны гуравдугаар сараас 2023 оны наймдугаар сар хүртэл гурван эрэгтэйгээс 150 сая иен (970 сая ам.доллар, 3.2 тэрбум төгрөг) залилсан гэж үзжээ.

Ватанабэ тэднээс “Эцэг эхтэйгээ холбоогоо тасалсан болохоор мөнгө хэрэгтэй байна” гэх мэтээр худал ярьж мөнгө салгадаг байсан юм.

Шүүх дүгнэлтдээ түүнийг хохирогчдоо өөртөө дурлуулах замаар удаа дараа залилсан нь "хүмүүсийн сайн санааг ашигласан зальтай гэмт хэрэг байсан" гэж бичжээ.

Зарим хохирогч бараг бүх хөрөнгөө алдсан тул хүндхэн ял оноосон гэж тус дүгнэлтэд бичсэн байна. Есөн жилийн хорих ялаас гадна Ватанабэг 8 сая иений нөхөн төлбөр төлөхийг шүүх тушаажээ.

Прокурорууд түүнд 13 жилийн хорих, 12 сая иений торгууль оногдуулахаар зорьж байсан юм.

Түүний ялыг хүндрүүлсэн өөр нэг зүйл бол эрчүүдээс хэрхэн мөнгө салгах зааварчилгаа худалдсан явдал байжээ. Ватанабэгийн зааварчилгааг худалдаж авсан нэг эмэгтэй 10 сая иений залилан хийсэн хэрэг гарсан аж.

Шүүх “Ватанабэ гарын авлага зарч, бусдыг ч мөн адил гэмт хэрэг үйлдэхэд уриалсан нь хорлонтой үйлдэл” гэж дүгнэсэн байна.

Эх сурвалж: Asahi Shimbun

Энэ мэдээнд өгөх таны үнэлгээ

Хуваалцаарай Жиргээрэй