Г.Дугаржаваар дамжуулан Т.Доржхандад өгсөн МАН-ын бэлэг нь "Дарханы төмөрлөгийн үйлдвэр"

ЛОГИК: ҮХЦ-ийн хоёр маргааны ялалтаар Т.Доржхандад ирсэн Г.Дугархүүгийн томилгоо

ТӨХК-иудыг сайд, УИХ-ын гишүүд булаацалдаж, сонгуулийн менежерээр ажилласан залуусаа тэнд шигтгэх, худалдан авалт, захиргаа хүний нөөцийн албыг нь "базах" өндөр сонирхолтой. Гол зорилго нь, ерөөсөө л мөнгө хийх. Сонгуулиар зарцуулсан мөнгөө тэндээс олж авахыг хүснэ. Сонгуульд зориулж мөнгө хийхийг бас их чухалчилна.

Ингэж мөнгө хийхийн тулд Гүйцэтгэх захирлыг нь их дуулгавартай, үгэнд нь ордог нэг ёсондоо "ширээ дэрлүүлэх" маркийн хүнээр тавиад, даалгавраа зайнаас өгдөг технологитой. Эдгээрийн нэг бодит жишээ нь, "Дарханы төмөрлөгийн үйлдвэр"-ийн Гүйцэтгэх захирал Г.Дугаржав байна.

МАН сүр дуулиантайгаар "Дарханы төмөрлөгийн үйлдвэр"-ийг яг хоёр жилийн өмнө сахал Д.Эрдэнэбилэгээс авч байв. Бөөн өр зээлтэй гэгдэж байсан ч үнэндээ уурхайн олборлолт нь хэвийн, арматураа зах зээлд нийлүүлдэг, олборлосон түүхий эдийн хэмжээ нь ч их байв.

Үүнийг МАН-ынхан зарж үрж, бөөн бөөнөөр нь үгүй хийх ажилд ханцуй шамлан орохдоо үнэндээ мөнгийг нь нам руугаа бус, баахан өөр зүг рүү урсах зохицуулалтыг Г.Дугаржавын томилгоогоор хийчихсэн. Энэ нь ч бас аргагүй байв. Яагаад аргагүй байсныг улс төрийн үйл явцуудаар нь тайлбарлаж өгье.

Эрх баригчид анхнаасаа 2022.04.14-нд "Дарханы төмөрлөгийн үйлдвэр"-ийг төрд авахдаа сонгуулийн зардал босгох боломжтой нэг багана гэдгийг мэдэлгүй л яахав. Гэвчиг Л.Оюун-Эрдэнийн тэргүүлсэн Засгийн газар гаднаас томилогдсон, нэг их сул сайд нартай. Парламентаар голлох хуулийн төслүүдээ зангидаж оруулж чадахгүй байв. Гол реформууд дандаа УИХ-аар шийдэгдэх тул танхимаа давхар дээлтэй болгох шаардлагатай нүүр тулгарсан.

Тиймээс Ерөнхийлөгч асан Х.Баттулгыг дахин нэр дэвших боломжгүй болгох гомдлыг цэц рүү гаргуулахдаа ашигласан ХҮН-ын дарга Т.Доржхандаар дахин давхар дээлний асуудлаар гомдол өгүүлээд байв. Т.Доржхандын ҮХЦ-д гаргасан гомдол "Дарханы төмөрлөгийн үйлдвэр" төрд шилжсэнээс хойш дөрвөн сарын |2022.08.15| дараа ялалт байгуулсан юм.

Т.Доржхандын гомдол цэц дээр ялангуут УИХ-ын ээлжит бус чуулган зарлаж, давхар дээлтэй сайд нараа томилсон. Т.Доржханд ингэж У.Хүрэлсүхийг Х.Баттулга гэх өрсөлдөгчгүй Ерөнхийлөгчийн сонгуульд ялах, Л.Оюун-Эрдэнийг сул сайд нараа явуулах ХОЁР том хожлыг цэцээр дамжуулан эрх баригчдад өгсөн. ХҮН өнгөрсөн хугацаанд үүнийхээ хариуд МАН-ын хармаан дахь "угжны ишиг" нь байсаар ирэв.

Гэхдээ жижигхэн савтай угжаар өл залгуулаад, ийм том ялалтуудаа Т.Доржхандаар хийлгэчих боломжгүй. Угаас олон улсад санхүүгийн байгууллага, Сангийн яам дамжчихсан, хуучин ХҮН намын жагсаалтыг 5 тэрбумд хүргэж наймаалцах хэлцлийг хийж явсан Т.Доржханд мөнгөгүй хөдлөхгүй нь ч энгийн логик юм.

Давхар дээлтэй сайд нар томилогдсоноос хоёр сарын дараа |2022.10.25| тэр Г.Дугаржавыг Дарханы төмөрлөгийн үйлдвэрийн захирлаар томилуулсан.

Г.Дугаржав МАХН-ын нарийн бичгээр Н.Энхбаяртай ажиллаж байсан түүхтэй. Тиймээс ч Үндсэн хуулийг шинэчлэн бичсэн их эго дүр, намаа нэгтгэх замаар Ерөнхийлөгч У.Хүрэлсүхэд тусалсан зэрэг шалтгаанаар Г.Дугаржавын томилгоог хийлээ гэж харагдаж байв. Өнгөн талаасаа бол ийм.

Гэвчиг хөшигний ард үнэндээ "Дарханы төмөрлөгийн үйлдвэр"-т нөлөөлж чадах хамгийн том хүч нь МАН-ын генсек Д.Амарбаясгалан байв. Түүний хамгийн ойрын өрөө төлөх нь хүн Т.Доржханд байлаа.

Ингэж Г.Дугаржав өнгөн талаас харахад Н.Энхбаярын хүн юм шиг мөртлөө мөнгөний жимд мөрөө үл үлдээх овтой Т.Доржхандын лоббигоор томилогдсон байдаг.

ДАТА: Г.Дугаржавын компани Т.Доржхандын ахтай холбогдож, нэг байранд ААН-үүд нь байршдаг

Т.Доржханд ер их овтой, сүйхээтэйгээрээ хөшигний ард алдартай. Тиймдээ ч аль тархи нь гүйдэг, түүнийхээ төлөө схем зурдаг залуустай ажилласаар ирсэн Д.Амарбаясгаланд тэр "таалагдсан" гэх.

Нөгөө талд "Дарханы төмөрлөгийн үйлдвэр"-т шуудхан өөрийн дардастай хүнээ томилуулчихвал Т.Доржханд муухай харагдах нигуртай. Энэ ч учраас ил тод Н.Энхбаярын тамгатай Г.Дугаржавыг томилуулсан гэх.

Дата хөөмжөөр бол, Г.Дугаржав Н.Энхбаяртай биш, Т.Доржхандтай ихэд ойр нэгэн гэдэг нь харагдана. Тухайлахад,

Нэг. Сингапурын “Saker resources” компанид Т.Доржхандын төрсөн ах Т.Лувсандорж зөвлөх, дэд захирал зэрэг албан тушаалуудад сэлгэн ажиллаж буй. Т.Доржханд хамаг л мөнгөний далд ажлуудаа төрсөн ахаараа дамжуулан зохицуулдаг гэгддэг.

Хоёр. Т.Доржхандын хувийн бизнесүүд байршдаг “AutoHub” төвд “Дарханы төмөрлөгийн үйлдвэр” ТӨХК-ийн Гүйцэтгэх захирал Г.Дугаржавын хүүхдүүдийн “Торгоны зам” академи, “Ананд биотехнологи” компаниуд байршдаг.

Нэг ёсондоо тэд хамтарсан бизнес эрхлэнгээ нэгнийхээ байр саванд нүүж иртлээ "зузаарсан" хүмүүс юм. Нэгэн үес тэд нийтэд "ЖДҮ" акцийг хамт хийж, танигдах ажлаа ч хамтатгасан түүхтэй. Тэдний энэ харилцаа бүр 2019 оных юм.

Бөөн хэл ам, маргаан зарга дагуулан байж, "Дарханы төмөрлөгийн үйлдвэр"-ийг төрд авсан гавьяа нь яах аргагүй Л.Оюун-Эрдэнийн Засгийн газрынх. "Хөтөл цемент шохойн үйлдвэр"-ийг ч төрд авсан. Гэхдээ МАН авангуутаа төрд ашигтай менеж хийхээсээ илүү тодорхой улс төрчдөд л ашиглагдахаар муу менежерүүдэд ч дээрх үйлдвэрүүдийг өгсөн нь үнэн юм.

Өнөөдрөөс харахад, "Хөтөл цемент шохойн үйлдвэр"-ийг удирдсан Л.Наранбаатар хэдийн мөнгөө хийж аваад, нэр дэвшихээр ажиллаж байна. Харин "Дарханы төмөрлөгийн үйлдвэр"-ийн Гүйцэтгэх захирал Г.Дугаржав ХҮН намын даргаас бүрэн хамааралтай явна.

Бас нэг туйлын үнэн нь, Ерөнхийлөгч, Засгийн газар, Парламент гэсэн гурван инститүцид МАН хүчтэй байх тохиргоог ҮХЦ дээр хийж өгсөн хүн бол Т.Доржханд. Тиймээс ч намынхаа сонгуулийн зардлыг Г.Дугаржаваар дамжуулан, "Дарханы төмөрлөгийн үйлдвэр"-ээс гаргуулахыг эрх баригчид мэдэж байгаа ч, мэдээгүй л царайлах юм.

Энэ мэдээнд өгөх таны үнэлгээ

Хуваалцаарай Жиргээрэй