Хөндөх сэдэв: 14-35 насны залуус эм найруулж судсаараа тарьснаас мөчөө тайруулахад хүрч байна

Харамсалтайгаар даамжирч буй эл үйлдлийг сэрэмжлүүлэн нийтэлж өгөөч хэмээн манай редакцид иргэн хандсан юм. Хэдийгээр хэвлэл мэдээллийн хэрэгслээр үйлдлийн арга бүхий мэдээлэл бичих нь сэдэл өгөх эрсдэлтэй хэмээх ч сэрэмжлүүлж, болгоомжлуулахыг илүүд үзлээ. Учир нь зөвхөн 2023 он, 2024 оны эхний хагас жилд л гэхэд 18 хүн амаар уудаг эмийг судсаар найруулан тарьж мансуурсны улмаас мөчдөө тайруулахад хүрсэн байна.

Тодруулбал, уналт таталтын эсрэг, мэдрэлийн гаралтай өвчин намдаадаг Унгар улсад үйлдвэрлэсэн .... эмийг эмийн сангаас авч тарианы уусмалаар найруулан судсаараа тарих нэн аюултай энэ хэрэглээг 14-35 насны эрэгтэй, эмэгтэй залуус амь нас, эд эрхтнээрээ дэнчин тавих болжээ. Эх сурвалжийн мэдээлснээр уг үйлдэл ковидын үед хил гааль хаасан үеэс эхэлсэн гэв.

-25 настай залуу хоёр гараа тайруулчхаад хөлөндөө тарьсан-

Судсаар орох ёсгүй бодисыг ахуйн нөхцөлд найруулж судсаараа тарьснаас өнөөдөр маш олон залуус амьдрал, ирээдүйгээрээ "тогложээ". Хоёр жилийн өмнө 25 настай залуу эхлээд баруун гараа, дараа нь зүүн гараа тайруулчхаад хөл рүүгээ тарьж эхэлсэн тохиолдол ч гарчээ.

Бид нэр, хүйс, байршлыг нууцлахаар тохирч дараах залуусаас мэдээлэл авлаа.

Кейс 1: Анх найзынхаа ятгалгаар хэрэглэж байсан. ... эмийг ... шингэнтэй хольж байгаад судас руу минь хийсэн. Эхэндээ их эвгүй санагддаг байсан ч хэд хэдэн удаа хэрэглэсний дараа дасаад эхэлсэн. Нойргүй явахад ядрахгүй, залуучуудын хэлдгээр их "Chill" мэдрэмжтэй байсан учир хэрэглэсээр л байсан. Энэ мэтчилэн, нэмж хэрэглэсээр би донтогчийн түвшинд очсон. Би зөвхөн нэг гар лугаа тариулдаг байсан. Яваандаа нэг гараа даахаа болиод, өргөж дийлэхгүй болсон. Судас руугаа их тариулснаас болж, бөглөрч, битүүрч, үхэжснээс болоод гараа тайруулсан.

Кейс 2: 2020 оны хавар ... хэрэглэж үзэхээр найзуудаараа цугласан. Хэдий бидний тариур шинэ ч гэсэн орчин нь их бохир байсан. Гэхдээ орчин хамаагүй, ойр ойрхон цугладаг болсон. Хэт их тарьж, бохир оруулсан байсан. Хэд хэд тариулсны дараа гар лугшиж чинэрч мэдрэгдэнэ, дараад нь янгинаж өвдөөд, эмнэлэгт үзүүлсэн. Эцэст нь тайруулахаас өөр аргагүйд хүрсэн.

-Энэ оны эхний хагаст харамсалтай тохиолдол 9 болжээ-

Тухайн хэрэглээ нь сэтгэцэд нөлөөлдөг эм биш учраас эмийн сангуудаас авдаг байна. Ингээд тодорхой хугацаанд хэрэглэсний дараа цусанд бүлэн үүсч улмаар артерийн судас нь бөглөрсөнтэй холбоотойгоор гар нь үхжиж, тайруулдаг байна. Ийн эрсдэлд орж байгаа нь тэд маш их хүндэрсний дараа эмнэлэгт ханддаг. Жишээ нь, гар нь хөхөрсөн, улайсан, үзүүр хэсгээрээ харласан маш их өвдөлттэй ирнэ. Асуумж авахад 6 сараас 2 жил гаруй хэрэглэсэн тухайгаа хэлдэг байна. 2023 онд арав гаруй хүндэрсэн тохиолдол бүртгэгдсэн бол он гарсаар 9 залуу ийн хүндэрч эмнэлэг барааджээ.

Улсын томоохон эмнэлгүүд хүндэрсэн тохиолдлуудыг цагдаагийн байгууллагад мэдэгддэг. Хуулийн хүрээнд зөрчлийн тухай хуулийн 5.1.3 буюу "Мансуурсан нь эрүүгийн хариуцлага хүлээлгэхээргүй бол хүнийг нэг зуун нэгжтэй тэнцэх хэмжээний төгрөгөөр торгох, эсхүл албадан сургалтад хамруулж долоогоос гуч хоногийн хугацаагаар баривчлах шийтгэл оногдуулна" гэх шийтгэлтэй.

Тухайн эм нь мансууруулах, сэтгэцэд нөлөөлөх бодис биш учраас эрүүгийн хэрэг үүсгэх боломжгүй. Мөн жоргүй олгодог байсан учраас замбараагүй хэрэглэх нөхцөл үүссэн байна. Харин энэ жилээс эмийг эмчийн зөвшөөрлөөр жорын бичгээр өгөх зохицуулалт хийгдэж, тухайн эмийг жоргүйгээр худалдаж борлуулсан эмийн санг зөрчлийн хуулиар шийтгэх оногдуулах юм байна.

Онцлон сэрэмжлүүлэхэд,

Залуус дарвиж, нэгнээ даган дуурайж, бусдын ятгалгад орж ганц нэг удаагийн алхам хийдэг ч эцсийн үр дүн нь энэ. Зүгээр л сонирхоод гэдэг сонголт хэзээ ч байж болохгүйн бодит жишээ бол эдгээр харуусалтай зургууд. Эцэг эх, асран хамгаалагч та бүхэн ч гэсэн үр хүүхдээ хаана, хэнтэй юу хийж цагийг өнгөрүүлж байгааг анхаарч, хянамгай байгаарай.

Б.ХАШ-ИЛД

Энэ мэдээнд өгөх таны үнэлгээ

Хуваалцаарай Жиргээрэй