Ерөнхийлөгчийн хамааралтай “Бугат” ресортод тоггүй, уух усгүй хоёр хоносон сурагчид, жуулчид нисдэг тэргээр аврагджээ

Энэ сарын 20, 21, 22-нд үргэлжлэн орсон аадар борооны улмаас усны түвшин огцом нэмэгдэж, үерт автах, голын цаана боогдох хүндрэлүүд үүссэн байна.

Тухайлбал, Тэрэлжид байрлах “Бугат” ресорт жуулчны баазад арван жилийн 16 сурагч, зургаан жуулчин, нэг хөтөч болон дотоодын аялагчид гол үерлэсний улмаас усанд боогдож, гурав дахь хоног дээрээ аврагджээ.

Энэ тухай мэдээллийн дэлгэрэнгүйг хүргэе.

-Төгсөх ангийн 16 сурагч, зургаан жуулчинг ОБЕГ-ын онгоц очиж авчээ-

Тус ресорт нь Горхи Тэрэлжийн нутагт дэвсгэрт байрлах бөгөөд Улаанбаатар хотоос зүүн тийш 80 км-т Хан Хэнтийн дархан цаазат газартай хил залган оршдог. Тог цахилгаантай, гол гатлуулдаг машинтай хэдий ч аадар борооны улмаас тоггүй болж, машин нь усан дунд гацжээ. Хамгийн ноцтой нь амралтын баазаар үйлчлүүлж байсан хүмүүс нь ундны цэвэр усгүй хоёр хонож, бүр гурав дахь хоногтоо хүрч арайхийж нисдэг тэргээр аврагдсан байна.

ЕБС-ийн 12-р ангиа төгсөөд хонхны баяраа тэмдэглэж явсан “Орчлон” сургуулийн 16 сурагч эхлээд аврагджээ. Тэднийг эцэг эхчүүд нь нийлж төлбөр мөнгийг нь гаргаж байгаад ОБЕГ-т хандаж, нисдэг тэргээр авсан байна. Харин нэг хөтөчтэй, зургаан жуулчныг ОБЕГ-ын аврагчид өчигдөр орой дахин ирж аварсан аж.

ОБЕГ-тай холбогдож тодруулахад “Голын үерт боогдож, сурагчид болон гадаадын жуулчдыг авч ирсэн нь үнэн. Нисдэг тэрэг хүрэхээс өөр аргагүй, хүндэрсэн байсан” хэмээлээ.

“Орчлон” сургуулийн сурагчийн ээж “Гэмтэж бэртсэн хүүхэд байхгүй. Хүүхдүүд бүгд зүгээр. Усгүй, тоггүй нөхцөл байдалд хоёр хоног байсан тул бид санаа зовоод нэгдэж нийлж байгаад ОБЕГ-т хандаж, хүүхдүүдээ авсан. Тэгэхгүй бол бүр хэцүү байдалд орох байлаа” гэсэн юм.

-70-80 хүн хүлээн авах хүчин чадалтай ч, гамшгийг үед авах арга хэмжээний ямар ч бэлтгэлгүй-

Амралтын бааз нь, 10 гэр, 12 дүнзэн байшинтай. Нэг дор 70-80 хүн хүлээн авах хүлээн хүчин чадалтай, орчин үеийн өвөрмөц шийдэл бүхий интерьер дизайнтай. Эрхэм зорилгоо “Тав тух, сэтгэл ханамжийг дээдлэсэн жуулчлалын үйлчилгээг ёс төр хүндэтгэлтэйгээр чанартай үзүүлнэ” хэмээн бичжээ.

Байгалийн гамшгийн өмнө бүгд хүчин мөхөс. Энэ талаас нь буруутгах утгагүй хэрэг. Гэхдээ аялал жуулчлалын бааз гэх тодотголдоо таарсан стандарт гэж байхгүй байсныг илтгэнэ. Гамшигт авах наад захын арга хэмжээ, ямар ч бэлтгэл байгаагүй нь хачирхалтай. Хэн, хэрхэн, хэзээ ирж аврах тухай төлөвлөлтгүй гэдэг асуудал хөндөгдөх учиртай юм.

-“Бугат” ресортыг эзэмшдэг “Илт хан” ХХК-ийн 58 хувь нь өдгөө ч Ерөнхийлөгчийнх-

“Бугат” ресорт нь “Илт хан” ХХК-ийнх эзэмшлийнх. Тус компани анх 2016 онд үүсгэн байгуулагдсан бөгөөд цайны газар, гадаад худалдаа, аялал жуулчлалын чиглэлээр үйл ажиллагаа эрхлэн явуулдаг хэмээн бүртгүүлжээ. Хувь эзэмшигч, эцсийн өмчлөгчөөр Кимтэён Энхтуул, Лувсандоржийн Болорцэцэг нар 2020 онд бүртгүүлж байжээ. Гүйцэтгэх захирлаар Кимтэён Энхтуул ажилладаг.

Лувсандоржийн Болорцэцэг нь Монгол Улсын Ерөнхийлөгч У.Хүрэлсүхийн гэргий юм. У.Хүрэлсүх Ерөнхийлөгчийн сонгуульд нэр дэвшихдээ аялал жуулчлалын “Илт хан” ХХК-ийн 58 хувийг эзэмшдэг хэмээн ХОМ-тээ мэдүүлж байжээ. Өдгөө ч энэхүү хувиа эзэмшсэн хэвээр байгаа нь нээлттэй мэдээллээс харагдана.

Ерөнхийлөгчийг Ерөнхий сайд байх үес 2019 онд тус ресорт руу өндөр хүчдэлийн шугам татахдаа байгалийн үзэсгэлэнт газрын моддыг хайр найргүй хяргаж, хаяж буй тухай мэдээлэл гарч байсан билээ.

Өөрийн сэтгэгдлээ илэрхийл

Share Tweet