ХХЕГ-ын албаны дарга Б.Баярсайхан: Төмсөг нь өвдөөд ирсэн хоёр цэрэг маргааш хагалгаанд орно

Олон нийтийн сүлжээнд цацагдсан Сүхбаатар аймгийн Эрдэнэцагаан сумын 0146 дугаар хилийн цэргийн ангид дэглүүлсэн цэргийн биеийн байдал хүнд байгаа гэх мэдээллийн дагуу цагдаагийн байгууллагаас холбогдох шалгалтын ажиллагааг эхлүүлсэн. Мөн хоёр цэрэг Төрийн тусгай алба хаагчдын нэгдсэн эмнэлэгт хүргэгдэн ирсэн талаар бид өмнө нь мэдээлсэн.

Тэгвэл бид өнөөдөр /2024.09.05/цэргүүдийн биеийн байдал өвчний оношны талаар холбогдох албаныхнаас тодрууллаа.

Хил хамгаалах ерөнхий газрын Эрүүл мэндийн албаны дарга Б.Баярсайхан:

-Хилийн цэргийн 0146 дугаар ангийн хилийн заставд 2024 оны наймдугаар сарын 28-нд эрүүл мэндийн төвийн эмч нар үзлэг хийсэн. Энэ үеэр ...дугаар хоёр байлдагчийн өвчний шинж тэмдгийг нь илрүүлсэн. Улмаар Сүхбаатар аймгийн нэгдсэн эмнэлэгт наймдугаар сарын 29-нд үзүүлсэн. Үүний дагуу мэс заслын эмчилгээнд орох зөвлөмж өгсөн тул харьяаллын дагуу Төрийн тусгай алба хаагчдын эмнэлэгт есдүгээр сарын 3-ны өдөр шилжүүлэн авч ирсэн. Урьдчилан сэргийлэх эмчийн үзлэгээр дээрх шинж тэмдэг илэрсэн. Мөн ...дугаар цэргүүдийг шилжүүлэхдээ ар гэрт нь нөхцөл байдлыг танилцуулж, шилжүүлсэн. Сүхбаатар аймгийн нэгдсэн эмнэлэгт байхдаа эмчилгээ хийлгээгүй мэс заслын зөвлөмж өгсөн байсан тул Улаанбаатар луу шилжүүлэх бэлтгэл ажлыг хангаж байсан. Хоёр цэргийн оношны хувьд залуучуудад элбэг тохиолдож байгаа өвчлөл. Цэрэг татлагын үйл ажиллагаанд оролцож буй эрэгтэйчүүдийн 20-30 хувь нь төмсөгний өвчлөлийн шинж тэмдэгтэй байдаг.

-Цэргүүдийн ар гэрийнхэн ирсэн үү. Холбогдсон уу?

-Ар гэрт нь мэдэгдсэний дагуу хүмүүс ирсэн. Эмчлэгч эмчтэйн уулзаад явж байгаа.

-Хоёр цэрэг ижил төмсөгний өвчлөлтэй байгаа тул дэглэлт байсан байж болзошгүй гэх таамаг байна л даа?

-Дэглэлт харилцааны асуудлыг хууль хяналтын байгууллага шалгаж эхэлсэн. Бид цэргүүдийн эрүүл мэндийн талаарх мэдээллийг л өгөх үүрэгтэй.

0146 дугаар ангийн хоёр цэргийг эмчлэгч эмч:

-Есдүгээр сарын 3-ны 07:00 цагийн орчимд хилийн цэргийн 0146 ангийн хоёр байлдагч манай яаралтай тусламжийн тасагт ирсэн. Цэргүүдийг миний бие үзэж, холбогдох нарийн шинжилгээнүүдийг хийсэн. Улмаар зүүн төмсөгний хураагуур судасны өрөгсөл оношоор хэвтэн эмчлүүлж байгаа. Маргааш буюу есдүгээр сарын 6-нд төлөвлөгөөт мэс заслаар төмсөгний судасны өрөгсөлийг боох ажилбар хийх гэж байна. Уг мэс засал нь эрэгтэй хүнийг үргүйдлээс урьдчилан сэргийлдэг мэс засал. Үрийн шингэний шинжилгээнүүд өгөгдсөн. Одоогоор үргүйдлийн шинж тэмдэг байхгүй. Тэгэхээр үргүйдлийн асуудлыг хүндрүүлэхгүй, цаашдаа үргүй болгохгүй байх үүднээс хийдэг төлөвлөгөөт хагалгаа хийнэ.

-Олон нийтийн сүлжээнд тавигдсан мэдээллээр хоёр цэрэг хоёулаа ижил оноштой ирсэн гэсэн шүү дээ. Энэ талаар?

-Тийм. Хоёулаа зүүн төмсөгний хураагуур судас гэсэн ижил оноштой ирсэн.

-Энэ өвчин нь өмнө нь ямар нэг байдлаар өвдөлт илэрдэг үү. Цэргүүдэд үзлэг хийхээс өмнө шинж тэмдэг нь илэрч байсан уу?

-Энэ өвчин нь эмнэл зүйн дөрвөн үе шаттай. Цэргийн албанд татагдах хуулиар эл өвчний 1,2 дугаар үед нь цэргийн алба хааж болно гэж үздэг. Харин 3, 4 дүгээр үеэс эмчилгээ хийж эхэлдэг. Тус хоёр цэрэгт зовуурь илэрсэн өдрөөс нь эхлэн үзлэг оношилгоонд хамруулж манай эмнэлэгт ирсэн байгаа.

Энэ мэдээнд өгөх таны үнэлгээ

Хуваалцаарай Жиргээрэй