Цэргийн анги болон ар гэрийнхний мэдээлэл зөрж, хоёр цэрэг төмсгөндөө хүнд гэмтэл авчээ

Олон нийтийн сүлжээнд цацагдсан Сүхбаатар аймгийн Эрдэнэцагаан сумын 0146 дугаар хилийн цэргийн ангид дэглүүлсэн цэргийн биеийн байдал хүнд байгаа гэх мэдээллийн дагуу цагдаагийн байгууллагаас холбогдох шалгалтын ажиллагааг эхлүүлсэн талаар бид өмнө нь мэдээлсэн.

Тэгвэл энэ талаар хохирогч цэргийн ар гэрийнхэн болон албаныхан өөр өөр байр суурь илэрхийлээд байна. Тухайлбал, хохирогчийн ар гэрийнхэн хоёр цэргийн алба хаагч төмсгөндөө хүнд гэмтэл авч, Цэргийн төв эмнэлэгт өнөөдөр хагалгаанд орох гэж байгаа. Бид энэ талаар мэдээгүй байсан гэсэн бол Хилийн хамгаалах байгууллага цэргүүдийн ар гэрт өвчний оношийг мэдэгдэж, шилжүүлэхдээ зөвшөөрөл авсан гэж мэдэгдээд байгаа юм.

Тодруулбал, Хохирогч цэргийн ар гэрийнхэн цэрэгт явсан хүү маань өөр нэг цэргийн хамт яг ижилхэн оноштойгоор буюу төмөгөндөө хүнд гэмтэл авч, хагалгаанд орохоор хот руу хүргэгдсэн. Энэ талаарх мэдээллийг цэргийн ангиас нь тодруулахад, өвчтэй байгаа талаар нь бус “хэн тийм худал мэдээлэл тараасан” гэх байдлаар хандаж байсан. Өвчний талаар тодорхой мэдээлэл өгөөгүй” гэжээ. Мөн бид энэ талаар Эрдэнэцагаан сумын 0146 дугаар хилийн цэргийн ангиас тодруулахад, Энэ асуудалд Хил хамгаалах ерөнхий газраас албан ёсны тайлбар хийсэн. Өөр хэлэх зүйл байхгүй. Цэргүүд нэгдсэн биеийн үзлэгт орох үеэр хоёр цэргээс зовуурь илэрч бид эмчилгээ хийлгэж байгаа” гэлээ. Харин дээрх асуудалд Хил хамгаалах байгууллагаас дараах тайлбарыг өглөө “Цахим сүлжээнд цэрэг дэглүүлж хүн гэмтэл авсны улмаас хагалгаанд орох гэж байна гэх мэдээллийн дагуу бид тодруулахад, Сүхбаатар аймгийн Эрдэнэцагаан суман дахь хилийн цэргийн  0146 ангийн эрүүл мэндийн төвийн алба хаагчид хилийн салбаруудад үзлэг хийсэн. Энэ үеэр 2024 оны нэгдүгээр ээлжээр татагдсан хоёр хугацаат цэргийн алба хаагчаас өвчний шинж тэмдэг илрүүлж Сүхбаатар аймгийн Нэгдсэн эмнэлэгт үзүүлсэн байна. Улмаар цэргүүдийн ар гэртэй холбогдож, эцэг эхнийх нь зөвшөөрлөөр Төрийн тусгай алба хаагчдын нэгдсэн эмнэлэгт харьяаллын дагуу эмчилгээнд хамруулж байна. Хоёр цэргийн алба хаагчийн өвчний шинж тэмдэг гаднын нөлөөнөөс үүсээгүй. Өөр төрлийн өвчний шинж тэмдэг. Удахгүй төлөвлөгөөт хагалгаа хийгдэнэ. Хувь хүний өвчний талаар мэдээлэл хүний нууцтай холбоотой учир мэдээллийг нь өгөх боломжгүй” гэж мэдэгдсэн юм.