Иргэн Н: Сексцагаанбогд найзуудтайгаа нийлж намайг зодчихоод “ална” гэж сүрдүүлсэн

Өмнөх долоо хоногт Ерөнхий сайд Л.Оюун-Эрдэнийн залуучуудын асуудал хариуцсан зөвлөх болох сексцагаанбогд нэрээр нийгэмд танигдсан Б.Гантулгыг эмэгтэй хүнд гар хүрч байна гэх бичлэг цахим орчинд цацагдсан. Уг асуудал олон нийтийн анхаарлыг татаж, тэрбээр найз эмэгтэйнхээ хамт асуудлын гол болоод буй бичлэгийнхээ учир шалтгааныг ч тайлбарлахад хүрсэн.

Тэгвэл эл үйл явдалтай холбоотойгоор Ерөнхий сайдын зөвлөх Б.Гантулгад зодуулсан гэх 19 настай иргэн бидэнд хандсан юм. Бид түүний мэдээллийг нягталж, судалж үзээд зарим нотлох баримтын хамт яриаг нь ийн дэлгэж байна.

Товч: Энэ хэрэг өнгөрсөн долоодугаар сарын 27-28-нд шилжих шөнө болсон байна. Хохирогч залуугийн хэлж байгаагаар Б.Гантулга түүнийг 5-6 найзын хамт бүлэглэн зодсон бөгөөд тухайн үедээ согтууруулах ундааны зүйл хэрэглэсэн байжээ. Тэд хамрыг нь хоёр ч удаа хугалж, нүүр рүү нь мөн өшиглөж 7-8 минутын турш зодсон аж. Тэр шөнөөс хойш хохирогч биеийн байдлаасаа үүдэн ажлаа хийх боломжгүй болж гэртээ байх болсон, тэдний хэн нь ч эргэж уулзаагүй, уучлалт гуйж хүн ёсоор холбогдоогүй. Мөн хоёр хагалгаанд орохоор болсон ч хамар нь өмнөх шигээ болох боломжгүй гэж эмч хэлсэн гэдгийг тодотгоод гомдолтой байгаа гэдгээ илэрхийллээ.

Энэ үйл явдлаас хойш хэдхэн хоногийн дараа Б.Гантулга Ерөнхий сайдын зөвлөхөөр томилогдсон бөгөөд хохирогчийн аавтай уулзмаар байна гэж холбогдсон ч түүний аав зөвшөөрөлгүй өдийг хүрчээ.

Бид хохирогчийн аюулгүй байдлыг хангах үүднээс мөн түүний хүсэлтийг харгалзан үзээд нүүр царайг нь нууцалсан болно.

-Цустайгаа холилдчихсон яаж ч чадахгүй байхад хүртэл дайрч, цагдаа нар бараг болиулж дийлэхгүй нөхцөл байдал үүссэн-

• 

-Энэхүү үйл явдал хэзээ, хаана, хэдэн цагт болсон бэ гэдгээс яриагаа эхэлье?

-Долдугаар сарын 27-28-нд шилжих шөнийн хоёр цаг орчимд “Хүүхдийн зуу”-д болсон. 

-Таны хувьд тухайн үед ямар ажлаар явж байгаад Б.Гантулгатай таарсан бэ?

-Цаг орой болчихсон байсан учраас тэнд байдаг гудамжны хоолны газар орчхоод “CU” орохоор явж байгаад таарсан. Үүдэнд нь байсан тэр олон хүн дунд Гантулга байсан юм байна лээ.

-Бидэнд хэлээд байгаа өөрийг чинь зодсон гэх үйл явдал энэ газрын үүдэнд болсон гэсэн үг үү. Процессыг дэлгэрүүлээч?

-Олон залуучууд дунд алхаж явсан. Тэгтэл нэг хүн толгой руу цохихоор нь эргээд хартал сексцагаанбогд буюу Гантулга байсан. Тухайн үед гайхаад яаж байгаа юм бэ, яагаад намайг цохиж байгаа юм гэхэд чи намайг доромжиллоо гээд дахиад нүүр рүү цохисон. Би доромжлоогүй гэдгээ хэлээд яагаад намайг цохиж байгаа юм гээд барьж авсан. Гэтэл хажуугаас найз нь намайг цохичихсон. Мэдээж дахиад нүүр рүүгээ цохиулсан учраас би доош сууж таарсан. Үүний дараа бөөндөө нийлж намайг зодсон. Тийм учраас би үнэхээр больё, намайг зодож нүдэх гэж байгаа бол ганцаараа зод гэдэг агуулгатай зүйлийг хэлсэн. Ингэж хэлээд ч салж өгөхгүй сүүлдээ миний хамар хугараад дахиад больё гэж хэлэхэд би чамайг ална, би мөнгөтэй гэх зэргээр доромжилсон. 

Энэ процесс ойролцоогоор 7-8 минутад маш хурдан болоод өнгөрчихсөн. Удалгүй эргүүлийн хоёр цагдаа ирж биднийг салгасан. Энэ үед найзууд нь олуулаа ч байсан бүгдээрээ над руу дайрсан. Маш олон хүн тойроод зогсчихсон, би цустайгаа холилдчихсон яаж ч чадахгүй байхад над руу дайрч, цагдаа нар бараг болиулж дийлэхгүй тийм нөхцөл байдал үүссэн. 

-Цохисон шалтгаанааа хэрхэн тайлбарлав. Таны зүгээс буруутай үйлдэл хийсэн үү?

-Тухайн үед олон хүн дунд алхаж байсан болохоор тэр хэдийн дундуур би гараад явчихсан уу, тэр хэд голоороо намайг гаргачихсан уу гэдгийг ойлгоогүй. Цохисон шалтгааныг нь асуухад чи намайг доромжиллоо л гэсэн. Би өөрийг нь танихгүй, сайн мэдэхгүй. Ийм олон хүн байхад нэрийг нь дуудаагүй гэдгээ хэлсэн. Ингэхэд чи тэгээ биз дээ гээд дайраад байсан. 

-Түүнийг найзуудтайгаа явж байсан гэлээ. Хэдүүлээ явж байсан бэ?

-Тэр талбайд олон хүн байсан учраас яг тоог нь цохож хэлж чадахгүй байна. Ямартай ч намайг 5-6 хүн зодож байсан. Тэдгээр найзууд нь чи миний найзыг ингэлээ, тэглээ гэж өмөөрч намайг барьчхаад ойртуулахгүй байсан. Миний хувьд нүдээ дараад доош харчихсан байсан учраас хэнд яаж цохиулж байгаагаа мэдэх боломж байгаагүй. 

-Таныг ингэж зодуулж байх үед цагдаа ирэхээс өмнө хэн ч болиулаагүй юу. Өөртэй чинь хэн нэгэн хүн хамт яваагүй, ганцаараа байсан гэж ойлгож болох уу? 

-Би тэр орой хоёр найзтайгаа явж байсан. “CU” орохынхоо өмнө та хоёр наанаа байж бай би орчхоод ирье гээд явж байхдаа тэдгээр хүмүүстэй таарч энэ үйл явдал болсон. Манай найзууд удалгүй мэдэж ирээд салгах гэтэл хоёр найзыг маань бас зодсон. Тэр хоёрыг зодохдоо ах нь нүүр рүү чинь цохихгүй гээд хөл, элэг рүү нь өшиглөж, боосон. Намайг зодож байхад давхар хоёр найзыг маань зодсон гэхээр 5, 6-аас ч олуулаа байх магадлалтай. Гэхдээ харж чадаагүй болохоор тодорхой мэдэхгүй байгаа юм. 

-Тэр өдрөөс хойш би ажилдаа очоогүй. Биеийн байдал ажлаа хийх боломжгүй болсон-

• 

• 

• 

• 

-Шөнийн хоёр цагийн орчимд эл үйл явдал болсон гэдгийг ярианы эхэнд дурдсан. Энэ үед та болон тэдгээр хүмүүс согтууруулах ундааны зүйл хэрэглэсэн байсан уу?

-Миний хувьд машинаа унаад явж байсан. Өөрөөр хэлбэл би цоо эрүүл байсан. Харин тэднээс архи үнэртэж байсан. Ямартай ч эрүүл ухаантай хүн байгаагүй. Бүгд согтуу байсан гэж бодож байгаа. 

-Эргүүлийн цагдаа ирээд ямар арга хэмжээ авсан юм бол, тухайн үед?

-Бид хэдийг салгаад дахиад цагдаа дуудсан. Энэ дуудлагын дагуу хоёр цагдаа ирсэн. Нийтдээ дөрвөн цагдаа тухайн үйл явдал болох үед газар дээр нь ирж ажилласан. Тухайн үед найзууд нь хэн гэж ямар хүмүүс байсныг мэдээгүй. Гэхдээ царайг нь харвал гадарлана, танина. 

-Энэ дунд өөр олны танил гэж хэлж болох хүн байсан уу? 

-Сексцагаанбогдоос өөр тийм хүн байгаагүй. 

-Та биеийнхээ аль, аль хэсэгт ямар гэмтлүүд авсан бэ. Тэр орой аль эмнэлэгт үзүүлж, эхний байдлаар ямар хариу гарав?

-Гэмтлийн эмнэлэгт очсон. Зүүн нүд хавдаж, хөхөрсөн. Одоог хүртэл хөхрөлттэй байгаа. Хамар хоёр хугарч хойшоогоо чихэгдсэн, таславч гэмтэлтэй. Үүдэн хоёр шүд хөдөлсөн. Тохойны зөөлөн эд гэмтсэн. Өөрөөр ноцтой гэмтэл аваагүй. Голчлох зүйл нь хамар. Амьсгалахад маш хүндрэлтэй байгаа. Энэ дагуу би хоёр хагалгаанд орох заалттай. Нэг нь гоо сайхны хагалгаа. Нөгөө нь хамрын таславчаа янзлуулах буюу цаашид асуудалгүй амьсгалах ийм хагалгаанд орно. Гол нь энэ хоёр хагалгаанд ороод миний хамар өмнөх шигээ хэвийн, эрүүл болох боломжгүй гэдгийг эмч хэлсэн. Тиймээс би үүн дээр гомдолтой байна. 

-Одоогоор зовуурь ихтэй байна уу?

-Би тэр шөнөөс хойш долоо хоног яах учраа олохгүй гэртээ эм ууж байсан. Түүнийхээ дараа цагдаад очиж өөрөө өөрийгөө л эмчлүүлэхгүй бол болохгүй юм байна гэж ойлгож аваад "ЭмЖиЖи" гэдэг хамар, чих хоолойн эмнэлэгт очиж үзүүлсэн. Ингээд яг тодорхой онош буюу хамар хойшоогоо цөмөрснийг мэдсэн. Энэ хэвээр хагалгаандаа орохгүй удаан явбал зүрхний хэм алдагдах, толгой өвддөг болох эрсдээлтэй. Тиймээс эхний хагалгаа нь энэ зовуурийг арилгана. Харин хоёр дахь нь хамар тэгшхэн болгох хагалгаа. 3-6 сарын дараа эхний хагалгаандаа орно. Эхний ээлжид мэс ажилбартай л орчхоод байж байна.

-Долоо хоног эмнэлэгт очоогүй таны шалтгаан юу байв?

-Өмнө нь ийм зүйл тохиолдож байгаа учраас яахаа мэдэхгүй байсан. Шүүх шинжилгээнийх нь хариу гарсны дараа үзүүлдэг ч юм болов уу гэж бодсон. 

-Энэ хугацаанд ямар зовуурьтай байсан бэ?

-Шөнө унтаж чадахгүй маш их цус гардаг байсан. Өвдөлттэй, хамар битүү дандаа амаараа амьсгалж байсан учраас гэрээсээ гарч чадаагүй. Өдийг хүртэл ажлаа хийгээгүй. Хийх боломжгүй болсон. 

-Хэд хоног ажилдаа яваагүй гэсэн үг вэ?

-Долоодугаар сарын 27-нд хамгийн сүүлд ажлаа хийснээс хойш ахиж очоогүй. Учир нь намайг хүнд юм өргөж, амьсгаадаж, спортоор хичээллэж болохгүй гэсэн. Шатаар ч алхаж болохгүй, тайван байгаарай гэж зөвлөөд байгаа. 

-Эрүүл мэнд, санхүү мөнгө гээд аль аль талаараа хохирчээ гэж ойлгогдож байна. Санхүүгийн тал дээр бэрхшээлүүдтэй хэрхэн тулж байна, ажлаа ч хийх боломжгүй болсон гэлээ?

-Улаанбаатар өртөг өндөртэй шүү дээ. Нэг эмнэлгээс нөгөө эмнэлэг орохын тулд урт хугацаа зарцуулна. Зарим өдөр бүрэн үзүүлж амждаггүй гэдэг ч юм уу. Үүнийг дагаад цаг хугацаа, бензин тос, хоол унд, эм гэх мэт зардлууд байнга гарч байгаа. Би өмнө нь зүгээр л ажлаа хийгээд эрүүл саруул явж байсан хүн шүү дээ. 

-Бүгд надаас ах хүмүүс байсан. Гэсэн ч дундаа хийгээд мишок шиг л зодсон. Одоог хүртэл хэн нь ч хүн ёсоор хандаж, уучлалт гуйгаагүй-

-Энэ хэргийг цагдаад анх хэзээ бүртгүүлсэн бэ?

-Тэр шөнөө бүртгүүлсэн. Хэрэг одоогийн байдлаар шалгагдаад прокурор дээр байгаа. Энэ тухайд нарийн мэдээлэл өгөх боломжгүй. 

-Хэрэг явдлаас хойш сарын хугацаа өнгөрсөн байна. Энэ хугацаанд Ерөнхий сайдын зөвлөх Б.Гантулга гэж хүн тантай холбогдсон уу, та хоёр дахин биечилж уулзсан тохиолдол гарав уу?

-Эргэж уулзсан тохиолдол гараагүй. Ганц, хоёр удаа утсаар тухайн үеийн нөхцөл байдлаа ярьсан. Энэ үед би ийм гэмтэлтэй болсон, эмчлүүлэх шаардлагатай байгаагаа тайлбарлаад хэлсэн. Тэрний зүгээс тухайн үед алдаа гаргасан, уучлаарай гэх зүйлийг хэлсэн. Түүнээс хойш надтай огт холбоо бариагүй. Цагдаа дээр ч хамт очоогүй. Юу болж байгааг сайн мэдэхгүй л байна. Шүүх шинжилгээний хариу гарсан. Надад таалагдаагүй. 

-Тодруулбал?

-Хоёр хагалгааны заалттай байхад шүүх шинжилгээний хариугаа гэмтлийн зэрэг бага гэж гаргасан. Тиймээс би дахин тогтоолгох хүсэлтэй, гомдолтой байгаа. 

-Энэ нэг сарын хугацаанд огт уулзахгүй, холбоо барихгүй байгааг нь та хэрхэн харж, хүлээж авч байна?

-Эхний ээлжид энэ хэргийг хүндрүүлье гэж миний зүгээс огт бодоогүй. Тийм санаа ч анхнаасаа байгаагүй. Тухайн үед алддаггүй залуу хүн гэж хаа байх вэ, гоё ажлынн байртай ч болж байгаа юм  байна гээд хүндрүүлэх зорилгоор би яриагүй. Миний гомдлын дагуу намайг эрүүл, саруул болгоод өгчих. Би мөнгө төгрөг нэхэхгүй. Өөр асуудал надад байхгүй. Хэрэв чи намайг ганцаараа ингэж зодсон бол би гомдол гаргахгүй байсан. Харин олуулаа нийлж зодсон болохоор би гомдолтой байна гэдгээ хэлсэн. Үнэхээр тэр хүн ганцаараа намайг зодчихсон бол би энд ийм яриа өгөөд сууж байхаасаа ичих байлаа. 

Хамгийн наад зах нь хүн гэмтээчхээд яаж байна, үзүүлсэн үү, яах гэж байна, яахаар байна гээд нэг хүн байна даа асуух ёстой биз дээ. Харин тийм зүйл байгаагүй. Би өөрөө л 2, 3 удаа залгаж ярьсан. 

-Тиймээс таны одоогийн байр суурь? 

-Нэг ч удаа хүн ёсоор над руу холбогдоогүйд нь гомдолтой байгаа. Тэнд байсан хүмүүс бүгд насаар ах. Тэгсэн хэрнэ дундаа хийгээд зодсон. Би ямар мишок байгаа биш дээ. Арай ч тэгж зодож болохгүй байх. Тэр хугацаанд хэн нь ч хэнийгээ болиулаагүй. 

-Надаас хэдийг хүсээд байгаа юм гуйлгачин минь, хоёулаа ярилцчихъя. Би чамаас үнэтэй пиджак өмссөн байна гэсэн-

-Тухайн үеийн процессоос деталь зүйлүүдийг санаж байна уу. Жишээлбэл доромж бүхий агуулгаар харьцаж, ярьсан гэдэг ч юм уу?

-Намайг доромжиллоо гэж над руу дайрахад нь би доромжлоогүй гэдгээ хэлсэн. Хэрэв тэгж бодож байгаа бол цагдаа, шүүхээр яваад шийдүүлчхэж болно. Би заавал энд та нартай маргаад байх шалтгаан алга гэхэд  би мөнгөтэй болчихсон, чамайг ална гээд дайраад байсан. Нүүр рүү ботинкоороо өшиглөсөн. Нүүр тухайн үедээ битүү хөхөрсөн. Найзууд нь хүртэл ёс бус үг хэллэгээр доромжилж мөн л дайрсан. Тэгээд нийлж зодож зодчихоод одоо хоёулаа нэглэх үү арчаагүй гуйлгачин минь гэх зэргээр заналхийлсэн. 

-Та ямар нэг хариу үйлдэл үзүүлсэн үү. Зөрүүлээд цохих ч юм уу?

-Би огт хариу үйлдэл үзүүлээгүй. Үзүүлье гэсэн ч надад боломж байгаагүй. Бүгд тал талаас зодоод байсан болохоор хөл, гараа ч хаана байгааг мэдэхгүй. Хүн нүүрээ дарахаа л боддог юм байна лээ. 

-Хэрэгт оролцсон найзуудыг нь хамт шалгаж байгаа юу?

-Энэ тухайд цагдаа тодорхой мэдээлэл өгөөгүй. Би бүгдэд нь гомдолтой гэдгээ илэрхийлсэн. Хэрэг прокурор дээр байгаа. Тэнд асуудал тодорхой болох байх гээд хариугаа хүлээж байна, шалгагдаад явж байгаа. 

-Гэр бүлийнхнийх нь зүгээс энэ асуудалд хэрхэн хандаж байна?

-Би өөрөө гэм буруутай зүйл хийгээд ийм болчихсон бол манайхан янз бүрийн юм яриад байх хүмүүс биш л дээ. Ганцаараа явж байгаад бүлэг хүмүүст ийм болтлоо зодуулчихсан учраас ихээхэн бухимдалтай байгаа. Энэ чинь хүний эрүүл мэндээс гадна гадаад үзэмж, харагдах байдалд хамаатай зүйл шүү дээ. 

-Тухайн орой  ирсэн эргүүлийн хоёр цагдаа та хоёрыг машинд нүүрэлдүүлж, уулзуулсан гэх мэдээлэл бий. Үүнийг дэлгэрүүлэх боломжтой юу. Тухайлбал та хоёрын дунд ямар харилцаа өрнөсөн бол зөрчилдсөн үү?

-Товч л тайлбарлая. Цагдаа нар ирээд салгасан. Машиныхаа дэргэд дуудсан. Надаас өмнө Гантулга очоод уулзчихсан зогсож байсан. Би машин руу нь суухгүй, эрүүл учраас өөрөө машинаа унаад явчихъя гэж хэлсэн. Гэтэл цагдаа суухыг шаардсан. Дахиад үгүй гэдгээ хэлтэл чи ямар хүүхэн шиг шалчиганасан юм бэ гээд суухыг шаардаж суулгасан. Миний араас Гантулга машинд суусан. Суумагцаа намайг үсдээд дахиад нүүр рүү цохисон. Ингээд цагдаа болиултал чи гуйлгачин минь надаас хэдэн төгрөг хүсээд байгаа юм, тэрийгээ хэлчих. Хоёулаа одоо ярилцчихъя гэсэн. Би хариуд нь мөнгө төгрөг авахгүй шүүх, цагдаагаар шийдүүлнэ гэдгээ хэлэхэд би чамаас үнэтэй костюм пиджак өмсчихсөн байна, надаас хол бай гэх зэргээр харьцсан. Ер нь хүнээс үнэтэй пиджак гэж юу байх вэ дээ. Тэгээд л бид хоёр цагдаагийн хэлтэс рүү явсан даа. Тэр хугацаанд барих, базах үйлдлийг  гаргасаар л байсан. 

-Танд нотлох баримтууд хангалттай байгаа юу. Тухайн үеийн бичлэг, зураг гэрч гэх мэт?

-Надад нотлох баримт хангалттай байгаа. Зураг, бичлэг, тухайн байршлын камерийн бичлэг ч цагдаад бий. Тиймээс бүх зүйл нотлох баримттай гэсэн үг. Мэдээж гэрчүүд ч мөн байгаа. 

-Гомдол гаргахдаа бүлэг хэрэг гэж гаргасан уу. Ганц хүн дээр гаргасан уу?

-Бүлэглэж танхайрсан гэдгээр нь гомдол гаргасан. 

-Хоёр найзыг нь мөн зодсон гэж та яриандаа дурдсан. Найзуудынх нь биеийн байдал ямар байгаа вэ?

-Нэг нь хөлийн зөөлөн эдийн гэмтэлтэй гээд 3, 4 өдөр доголсон. Эм уугаад зүгээр болсон. Цагдаа дээр очоод мөн хэлсэн байдаг. Харин шүүх шинжилгээн дээр очоод хүнд бэртээгүй юм чинь гээд орхисон. Харин би тэгэх боломжгүй нөхцөл байдалтай болсон учраас орхиж чадаагүй юм.

Түүнтэй холбоотой нийгэмд өрнөөд байгаа асуудлууд дээр манай редакцын зүгээс дэвшүүлсэн агуулгыг доорх линкээр уншаарай.

Сексцагаанбогдоос Ерөнхий сайдын зөвлөх байхаа болихыг шаардъя