АНУ-ын ерөнхийлөгчийн сонгуульд өрсөлдөж буй Доналд Трампыг хөнөөх гэсэн дахин нэг оролдлого ням гарагт /2024.09.15/ гарсан байна. Тус улсын Холбооны мөрдөн байцаах алба мэдээлснээр Трамп Флорида мужид гольф тоглож байхад нь ийм явдал гарсан гэж мэдэгджээ.
Хууль сахиулах албаныхан мэдэгдэл хийхдээ Нууц албаны ажилтнууд бутанд нуугдаж байсан хэрэгтэн рүү хэд хэдэн удаа гал нээсэн гэсэн юм. Үүний дараа сэжигтэн AK-47 загварын галт зэвсгээ орхин зугтсан байна.
Хэрэг гарсан Палм Бич хошууны шериф Рик Брэдшоу хэвлэлийн бага хурал хийхдээ ням гарагийн 13:30 минутийн орчим, 370-460 метрийн зайнд байсан сэжигтэн рүү дөрвөн удаа буудсан гэжээ. “New York Times” болон “Fox News” агентлаг нэрээ нууцалсан албаны хүнийг иш татаж сэжигтнийг Хавай мужийн оршин суугч, 58 настай Райан Уэсли Рут гэж мэдээлсэн юм.
Харин Холбооны мөрдөх товчоо сэжигтний талаар мэдээлэл өгөхөөс татгалзжээ. Хэрэг гарсны дараа Трамп өөрт нь хандив өгсөн хүмүүс рүү “Миний ойролцоо гал нээсэн, цуу яриа явахаас өмнө өөрийгөө аюулгүй, сайн байгаа гэдгийг мэдэгдмээр байна” гэж мэйл илгээсэн байна.
Долоодугаар сарын 13-нд Трамп Пенсильвани мужид сонгуулийн кампанит ажил хийж явахдаа буудуулж шархадсан. Үүний дараа сонгуульд нэр дэвшигчдийн хамгаалалт хангалтгүй байгаа эсэх асуудал сөхөгдсөн юм.
Эх сурвалж: Reuters
АНХААРУУЛГА: Уншигчдын бичсэн сэтгэгдэлд Eguur.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.
Сайхан шаах юмаа. Машиндаа суугаад зугтахад нь араас нь буудсан. Бас холбооний мөрдөх товчооноос мэдээлэл өгсөн
За даа, энэ ч шоу л бна доо !