Б.Одбаяртай хамт Солонгост "өгзөг базсан" О.Батчулууныг Л.Мөнхбаатар МИАТ-ийн захиралд зүтгүүлж байна

Хураангуй

ҮХЦ-ийн дарга асан Б.Одбаяртай БНСУ-ын иргэнд зүй бусаар хүрч, согтуурсан үедээ "өгзөг" базсан хэрэг мандааж явсан О.Батчулуун МИАТ ТӨХК-ийн Гүйцэтгэх захирлын албан тушаалыг авахаар идэвхтэй ажиллаж эхэлжээ. О.Батчулууныг МИАТ ТӨХК-ийн Гүйцэтгэх захирлаар томилуулах лоббиг УИХ дахь МАН-ын бүлгийн дарга Л.Мөнхбаатар хийж байгаа аж.

Дэлгэрэнгүй

Нэгэн үес БНСУ-ын хэвлэлүүд ҮХЦ-ийн дарга Б.Одбаярыг Korean air-ийн онгоцны үйлчлэгчийн өгзгийг базсан, хамт явагсдын хамтаар согтуурхаж, шар айраг нэхсэн, зүй бус харилцаа үүсгэсэн хэмээн мэдээлж, монголд дуулиан дэгдэж байв.

Тухайн үед ҮХЦ-ийн дарга асан явж байхдаа хэрэг мандаасан эрхмийг БНСУ-ын хэвлэлүүд "42 настай А" хэмээн мэдээлж, цагдаа нар нь эрэн хайж талаар онцолсоор байв. Уг 42 настай А нь Сөүлд газардсан даруйдаа Сингапур ниссэн тул түүнийг интерполоор эрэн сурвалжлахыг шаардаж, Солонгосын хилээр орж ирэнгүүт нь саатуулахаар яригдталаа асуудал өндрөө авч байсан удаатай.

Харин хэргийн эзэн Б.Одбаяр ойрын хүндээ “Өөрөө үйлчлэгчийн биед хүрээгүй, харин тухайн онгоцонд суусан О.Батчулуун гэх иргэн ийм үйлдэл гаргасан, түүнийг нь өмөөрсөн” гэж тайлбарласан талаар монголын хэвлэлүүд онцолж гэгдэж байв.

Ингэж нэгэн үес монголын болоод БНСУ-ын хэвлэлийн анхааралд өртөж, Б.Одбаяртай хамт хэрэг өдүүлж явсан О.Батчулуун эдүгээ МИАТ ТӨХК-ийн Гүйцэтгэх захирлаар томилогдохоор төрийн ордноор намын томчуудаа хормойдон гүйж яваа аж. Уг томилгоог УИХ дахь МАН-ын бүлгийн дарга Л.Мөнхбаатар мөн идэвхийлэн хөөцөлдөж байгаа гэх мэдээлэл байна.

Л.Мөнхбаатар, О.Батчулуун нар нь багын сайн найзууд бөгөөд Хөвсгөл аймгаас гаралтай. О.Батчулуун нь Л.Мөнхбаатарын тэргүүлдэг “Хөвсгөл хөгжил” сангийн УЗ-ийн гишүүнээр ажилладаг.  Мөнхүү "Эрдэнэс Монгол"-ын Гүйцэтгэх захирал асан Ц.Ганхүүтэй найз нөхдийн ойрын холбоотой нэгэн билээ.

Тэрбээр “Монголын цахилгаан холбоо” ХК, “УИХ”, “Хууль зүй дотоод хэргийн яам”, “Банкны өр барагдуулах алба”, “Цемент шохой” ХК, “Санхүүгийн зохицуулах хороо”, “Эрдэнэс Монгол” ХК, “Хөтөл цемент кобинат” зэрэг төрийн байгууллагад ажилладаг байв. Харин “Сайн дур”, “Солид инвестинг” ХХК, “Файнаншил транс” ББСБ зэрэг хувийн байгууллагад ажилладаг байжээ.

Харин МИАТ ТӨХК-ийн тухайд нэгэн үес дампуурлаа зарлах хэмжээнд санхүүгийн байдал нь хүндэрч, Гүйцэтгэх удирдлагыг нь солиход хүрч байв. Одоогийн үзүүлэлтээр уг компани 2024 онд 1 их наядын орлого олж, арилжааны банкнууд дахь өрөө ирэх жил бүрэн төлж дуусахаар байгаа юм.

Улс төр, бизнест нөлөө бүхий эрхмүүдийн мөнгө хийдэг газар болтлоо засаглал нь эвдрээд байсан МИАТ ТӨХК сүүлийн жилүүдэд Ц.Анандбазарын шатахууны нийлүүлэлтийн монополчлол, Д.Чойжамц хамбын нөлөөлөлтэй хоолны катеринг үйлчилгээний 10 гаруй жил үргэлжилсэн гэрээг зогсоож, зах зээлээ эрүүлжүүлсээр байгаа юм.

Одоогоор 10 онгоцтой МИАТ ТӨХК энэ сарын эхээр 1 сая дахь тээвэрлэгчээ авах бөгөөд цаашид IPO гаргах, АНУ-ын шууд нислэгийг албажуулах зэрэг томоохон ажлууд нь хүлээгдэж буй.

Г.ИТГЭЛ

Энэ мэдээнд өгөх таны үнэлгээ

Хуваалцаарай Жиргээрэй