Гааль дээр дугаар авах боломжгүй машинууд овоорч эхэллээ

Энэ сарын 8-аас эхлэн Улаанбаатарт дахин шинээр автомашины улсын дугаар олгохгүй гэсэн журам хэрэгжиж эхэлсэн билээ. Уг шийдвэртэй холбоотойгоор импортоор машин оруулж ирж буй хувь хүн, аж ахуй нэгжүүдэд хүндрэл үүсээд байна. Шинэ дугаар олгохтой холбоотой асуудлыг Авто тээврийн үндэсний төв  хариуцаж байсныг Замын хөдөлгөөний удирдлагын төв рүү шилжүүлж, улмаар шинээр агентлаг байгуулж хариуцлуулахаар болсон. Нэгээс нөгөө рүү харъяалуулаад байгаа нь гааль дээрх машины бүрдүүлэлтээ хийж буй иргэд, хувиараа бизнес эрхлэгчдийн хувьд хүндрэлтэй байгааг эх сурвалжууд хэлж байлаа.

Хувиараа бизнес эрхлэгчид өмгөөлөгч авахаас аргагүйд хүрч байна гэв

Гэвч яг өнөөдрийн байдлаар тулгамдаад буй асуудал бол гааль дээр ирсэн машинуудыг хэрхэх вэ гэдэг асуудал. Аж ахуй нэгж, иргэдийн зүгээс импортоор орж ирж буй машинууд нь гааль дээр буухаас өмнө өөр машинд дугаарч авч, буусных нь дараа дугаараа шилжүүлэх байдлаар зохицуулж байна. Үүнээс болоод дугаар дамлах бизнес цэцэглэж, юу юугүй гааль дээрээс машинаа авахаас аргагүй болсон иргэд хэлсэн үнээр нь дугаар худалдаж авахаас аргагүй нөхцөл үүсчээ. Нийслэлд яг одоо байгаа 730 мянган автомашиныг цааш нэмэгдүүлэхгүй, нэмэгдүүлэхдээ зөвхөн шинэ эсвэл дараах  буюу “Тээврийн хэрэгслийн өмчлөгч, эзэмшигч нь нийслэлийн оршин суугч иргэн, нийслэлд бүртгэлтэй хуулийн этгээд байх,

• Өмчлөгч, эзэмшигч нь Авто замын тухай хуульд заасан төлбөр, Зөрчлийн тухай хуулийн 14 дүгээр бүлгийн 14.7 дугаар зүйл дэх зөрчил болон төлбөрөө барагдуулсан байх.
• Жолоочийн даатгалын тухай хуульд заасны дагуу даатгуулсан байх
• Тээврийн хэрэгслийн хөдөлгүүрийн экологийн ангилал нь “евро-4” эсвэл түүнтэй дүйцэхүйц буюу түүнээс дээш байх
• Сүүлийн 10 жилийн дотор үйлдвэрлэгдсэн тээврийн хэрэгсэл байх
• Экспортын өмнөх техникийн хяналтын үзлэгт орсон байх зэрэг шал хангасан машинуудыг л хотод унахыг зөвшөөрнө гэдэг шаардлагаа ажил хэрэг болгохдоо иргэд, аж ахуй нэгжид тулгарах хүндрэл, хохиролыг тооцож үзээгүй нь нэг алдаа байлаа. Нэг талдаа түгжрэлийг бууруулах сонгодог арга гэж байгаа ч нөгөө талдаа дараагийн үр дагаваруудаа бүрэн тооцоолоогүй шийдвэр хэмээн хувиараа машин борлуулагч, импортлогчид шүүмжилж буй.

Гааль дээр импортоор оруулж ирсэн машинууд ачаалал үүсгэж, хувиараа автомашин борлуулагчдын зүгээс дугаараа авч амжаагүй бол үндсэндээ санхүүгээрээ бүрэн хохирох дүр зураг үүсээд байгаа учир зарим эх сурвалжийн хэлснээр өмгөөлөгч авч холбогдох газруудтай хуулийн дагуу ажиллахаас өөр аргагүй нөхцөл үүссэн талаар хэллээ. Нэг борлуулагч багадаа 5-10 машин гаалиар хүлээн авахаар хүлээгдэж байхад журам хэрэгжиж эхлэхээс өмнө амжиж дугаар авахын тулд дамлагчдын хэлсэн үнээр авбал борлуулалтын ашиг гэх зүйл гарахгүй нь, хэдийгээр цаашид нийслэлд хэрэгтэй шийдвэр гэж байгаа ч аль ч улсад 10 жил дотор гэсэн шалгуур босго тавьдаггүй. Амьдралаас хол журам гаргалаа хэмээн шүүмжилж байлаа.

Автомашины үнийн хөөсрөл бий болж байна

10 жил болон түүнээс дээш хугацаанд үйлдвэрлэгдсэн автомашины "үнэ боломжийн" гэсэн нөхцлөөр худалдаж аваад оруулаад ирчихсэн байтал одоо дугаар авах боломжгүйгээс гааль дээрх машинаа хэрхэхээ мэдэхгүй, ар араасаа овоорч эхлээд байна. Гааль дээр байгаа машинууддаа дугаар авч чадахгүйд хүрвэл буцаах ямар ч боломжгүйн дээр, иргэд машинаа даатгуулахгүй байх, хуурамч дугаар ашиглах зэрэг асуудал ар араасаа хөвөрч эхэлнэ. Автомашин борлуулагчдын зүгээс цаашид машины үнэ тэнгэрт хадна гэдгийг хэлж байлаа.

Монголд өнөөдөр жилд Япон улсаас гэхэд 67 мянган суудлын автомашин импортоор оруулж ирсний хэд нь дээрх шаардлагыг хангах вэ. Иргэд цаашид нийслэлд шинэ машин худалдаж авч, унана гэвэл

Нэгдүгээрт, албан ёсны борлуулагч, дилерээс худалдан авах арга зам. Гэтэл автомашины худалдаа борлуулалтын хамгийн том зах болох “Да хүрээ” дээр гэхэд иргэдийн нийт худалдан авалтын гол үзүүлэлт нь үнэ ханш дээр тулгуурладаг бөгөөд 10 болон түүнээс дээш жилд үйлдвэрлэгдсэн машины үнэ боломжийн, техник үзүүлэлт сайтай нь борлуулалт өндөр байдаг. Тэгэхээр 10 жил доторх гэмэгц ерөнхийдөө илүү өндөр өртөгтэй автомашин худалдан авахаас өөр сонголтгүй.

Хоёрдугаарт, шинээр дугаар олгохгүй журамд эко ангиллын машиныг тодотгож оруулж өгсөн нь цаашид хятадын цахилгаан автомашины импортыг нэмэгдүүлэхэд гол түлхэц болох нь ээ.

Т.БАТСҮРЭН

Энэ мэдээнд өгөх таны үнэлгээ

Хуваалцаарай Жиргээрэй