Хотын дарга Х.Нямбаатар, УИХ-ын гишүүн Ч.Лодойсамбуу нар "муудалцав"

Хотын дарга Х.Нямбаатар, УИХ дахь АН-ын бүлгийн дэд дарга Ч.Лодойсамбуу нар твиттерт "муудалцав".

Тэд хотын дугаар олгохгүй хязгаарлаж байгаа асуудлаас эхэлж маргажээ. Ингэхдээ нэгнийхээ жиргэсэн зүйлд хариулт өгөх замаар харилцан жиргэсэн аж.

УИХ-ын гишүүн Ч.Лодойсамбуу, "Хүн нь байхгүй бол асуудал байхгүй гэдэг шиг шинээр машин оруулахаа больчихвол түгжрэхгүй юм байна гэдэг бол шийдэл биш залхуурал, мунаглал. Түгжрэлээс салчихсан том хот гэж байхгүй. Яаж багасгаж зохицуулсан бэ гэхээр жишээ нь, 1.Нийтийн тээврийг төрөлжүүлсэн. 2.Нийтийн тээврийг хүртээмжтэй, тохь тухтай болгосон. 3.Боломжтой улиралд дугуй унах, алхах нөхцлийг бүрдүүлсэн. 4.Хотын төвд үнэгүй зогсоолгүй болгосон. Үнэтэй зогсоолд үнэгүй зогсвол торгууль маш өндөр. 5.Торгуулиа төрөөс авах үйлчилгээтэй нь холбох замаар заавал авч шийтгэж байна. 6.Сургууль, цэцэрлэгийн үйлчилгээг иргэддээ ойртуулсан байна" гэжээ.

• Хотын дарга Х.Нямбаатар хариуд нь "Машин импортлохыг хориглосон, эсвэл өмчлөх эрхэнд халдсан, хязгаарласан ямар нэгэн хууль дүрэм, журам Монгол Улсад байхгүй. Шинээр машин худалдаж авах, өөрийн эзэмшлийн дугаарыг хадгалах, шилжүүлэх бүрэн боломжтой зохицуулалт хийсэн. Бээжин, Шанхай, Сингапур гэх мэт томоохон хотууд тухайн хотод зорчих нийт авто машины квот тогтоодог болоод 30 жил болж байна. Улаанбаатар хот 80 мянган машины багтаамжтай байхаар анх төлөвлөгдсөн хэдий ч өнөөдөр 800 мянган машинтай болсон. УИХ-ын гишүүн энэ сэдвээр олон нийтэд мушгин гуйвуулсан ташаа мэдээлэл тарааж, попорч байгаад харамсаж байна. Хуулиа унш.

УИХ-ын гишүүн Ч.Лодойсамбуу, "1.Танай Бээжин, Шанхай, Сингапур машины тоог хязгаарлахын өмнө нийтийн тээвэр, хувийн машин ашиглахгүйгээр хүн хүссэн цэгтээ тээргүй очих нөхцлийг хэрхэн бүрдүүлсэнийг харсан уу? Гудамжаар нь алхаж, нийтийн тээвэрт нь сууж үзсэн үү? Дуураймар аядаж байгаа бол дарааллыг нь зөв тооцож мэдэхгүй бол асууж байгаач очсон газраасаа. 2.Таны санаачилж өмнөх Их хурлаар батлуулсан, авлигыг тувт өөгшүүлэх “Нийслэл Улаанбаатар хотын замын түгжрэлийг бууруулах, гэр хорооллыг орон сууцжуулах тухай” хуулийн 9.1-д “Нийслэлийн тээврийн хэрэгслийн өсөлт, авто замын сүлжээний нягтрал, замын хөдөлгөөний түгжрэлийг харгалзан нийслэл хотод олгох ТЭЭВРИЙН ХЭРЭГСЛИЙН УЛСЫН БҮРТГЭЛИЙН ДУГААРТ ХЯЗГААРЛАЛТ ТОГТООНО” гэсэн нь шууд бусаар импортыг хориглосон, хүний оршин суугаа нутагтаа тээврийн хэрэгсэл өмчлөх эрхэд халдаж, хязгаарласан заалт, оролдлого биш үү? Биш бол энэ хязгаарлалт чинь түгжрэлд ямар ч сайн нөлөөгүй юм биш үү? Худлаа ярихаа боль!

• Хотын дарга Х.нямбаатар, "Жил бүр 100 , 100 мянгаар машин багтаах зам хаана бна. Эзнийхээ машины бизнест санаа зовоод байгаа бол шийдлээ хэл. Шийдэлгүй поп зөндөө үзлээ.

УИХ-ын гишүүн Ч.Лодойсамбуу, "Дахиад л бичье дээ. Нэг хоёр гурав гээд тогтоод уншаарай. 1.Нийтийн тээврээ төрөлжүүл. 2.Нийтийн тээврээ хүртээмжтэй, тохь тухтай болго. Ядаж маршрутаа бие даагаад аятайхан зохио! 3.Боломжтой улиралд дугуй унах, алхах нөхцлийг бүрдүүл. Хүн байтугай дөрвөн хөлтөн ч аятайхан алхах зам алга. Өөрсдөө нэмж эвдээд орхисноо зассан уу? 4.Хотын төвийг үнэгүй зогсоолгүй болго. Үнэтэй зогсоолд үнэгүй зогсвол торгуулийг маш өндөр байлга. 5.Торгуулиа төрөөс авах үйлчилгээтэй нь холбох замаар заавал авч шийтгэж бай. 6.Торгуулийг өршөөлд хамруулдагаа боль. Жинхэнэ хорон поп чинь тэр. 7.Сургууль, цэцэрлэгийн үйлчилгээг иргэддээ ойртуул. Энэ түгжрэл машины тооноос биш хамгийн хүйтэн нийслэлийнхэн хүүхдээ сургууль цэцэрлэгт машинаар хол зөөдгөөс болж байна. Судла! Наад эзний тухай яриаг чинь олны нүдэн дээр ажиллаж эхэлсэн цагаасаа л сонсож ирлээ. Шалчганаад байлгүй санаа аваад хэрэгжүүл!

• Хотын дарга Х.Нямбаатар, "Миний хийж эхлүүлсэн, хийж байгаа, хийхээр төлөвлөж байгаа ажлуудыг дахин дахин хуулж бичиж, будаа идээд суухаас өөр хийх ажил алга уу чамд?"

УИХ-ын гишүүн Ч.Лодойсамбуу, "За сайн байна. Хийх юм байна. Эхлүүлчихсэн юм бол харагдахгүй байгаа шүү. Эдгээр ажлыг хийхэд шаардлагатай хуулийн төсөл дээр дэмжинэ. Байхгүй бол санаачилж оруулъя. Нэрэлхэлгүй хэлээрэй. Харин нодлин батлуулсан хуулийг чинь эргэж харна. Ухаантай байгаарай. Бас энд цахим орчинд хурдтай байгаа шигээ явуулсан албан бичгийг бүтэн сар дарж хэвтчихээд нэхэхээр томроод байхаа болиорой. Төрийн ажлыг төрийн ажил явдаг журмаар нь хийдэг бай" хэмээжээ.

У.УЯН

Энэ мэдээнд өгөх таны үнэлгээ

Хуваалцаарай Жиргээрэй