Variety: “Баавгай болохсон” гунигт автсан драм биш. Энэ кино гунигийг өөртөө хүлээн зөвшөөрөөгүй

АНУ-ын “Variety” сэтгүүл Монгол Улс Оскарын Гадаад хэл дээрх шилдэг кино төрөлд өрсөлдүүлэхээр илгээсэн “Баавгай болохсон” киноны рэвью бичжээ. Тус рэвьюгийн хэсгээс орчуулж хүргэе.

Монголын Оскарт өрсөлдүүлэхээр илгээсэн бүтээл гайхамшигтай. Өөрийнхөө болон гэр бүлийнхээ төлөө илүү ихийг хүсдэг айлын том ахын сэтгэлийг харуулсан зураглал.

Мөрөөдөл бидний нөхцөл байдалтай нягт холбоотой байдаг. Амбицтай байх гэдэг нь одоо байгаа байдлаасаа гарах гарцыг бодон төсөөлөх чадвар шаардана. Гэхдээ амьдралаа тухайн өдрийг аргацаахад зориулж байвал амбицтай байх хэцүү.

“Баавгай болохсон” хэмээх П.Золжаргалын гайхалтай бүтээлийн гол дүр Өлзийд (Ү.Батцоожийн бүтээсэн дүр) ийм сорилтууд тулгардаг. Түүнд дүү нараа халамжлан өсгөх, гэрээ галлах, нүүрсний мөнгө олох шаардлага бий. Томоор мөрөөдөх зүрх зориг гаргах нь заримдаа хэт их ачаа мэт санагдаж мэднэ гэдгийг энэ кино үзэсгэлэнтэйгээр мөн сэтгэл хөдөлгөм байдлаар харуулдаг.

Бусад айлын том ах нарын адил Өлзий өөрийн гэрийн тэргүүний үүргийг хүлээж авна. Аав нь тэднийг орхин одож, ээж нь архины хамааралтайгаа тэмцэж байгаа тул гэр бүлээ "тэжээх" үүрэг Өлзийд ирдэг. Тэрбээр хичээлдээ чармайхын зэрэгцээ дүү нараа хооллох, хувцаслах, анхаарч халамжлах үүрэгтэй. Мөн ээжийнхээ үрсэн мөнгийг олонхын тулд Өлзий өөрийн эд зүйлсийг хүртэл зарах нь хүртэл олонтоо.

Гэвч энэ бүхнийг хийх нь өдөр ирэх тутам хэцүү болж, хотын амьдрал өртөг өндөр, бэрх санагдаж эхэлдэг. Ээж нь хөдөө ажил хийхээр шийдэх үед Өлзийгийн багш түүнд физикийн олимпиадад оролцож тэтгэлэг авах боломжийг зөвлөдөг. Ингэснээр Өлзий туйлдаа хүртэл шахалтад ордог байна.

“Баавгай болохсон" киноны тухай уншихад өмнө нь олон удаа таарсан зохиол мэт санагдаж болно. Буурай амьдралтай ч ихээхэн хичээдэг өсвөр насны хүү гэр бүлдээ туслахыг оролдохын хажуугаар өөртөө бүтээж чадах амьдралаа олж атгахын тулд хичээж буй "өсөлт"-ийн тухай өгүүлэл. Гэхдээ Өлзийн түүх дэлгэц дээр гайхалтай амилдаг. Энэ нь П.Золжаргал Улаанбаатар хотын захын хороололд өрнөж буй тодорхой орчныг гайхалтай гаргаж өгснөөр улам тодорхой болно.

Энэ бол хотын захын амьдралыг харуулсан, хэзээ ч тэндээс гарч чадахгүй гэх мэдрэмжтэй явдаг хүмүүсийн тухай кино. Англи нэрээс нь харахад (Зүгээр л баавгай шиг ичээд өвлийг бүхэлд нь алгасчхаж болдогсон бол ямар амар байх талаар) энэ нь өвлийн хатуу ширүүн нөхцөлтэй тэмцэж байгаа тухай драм юм. Киног үзэж байхад хүйтэн салхи нүүр лүү чинь үлээж буй мэт мэдрэмж төрөх вий.

Гэхдээ энэ кино нь гунигт автсан бүрхэг драм биш юм. Киноны туршид хөгжилтэй хошигнолууд гардаг. П.Золжаргал жижигхэн мөчүүдээс ч гэсэн аз жаргал гаргаж ирсэн. Жишээлбэл хүүхдүүд дэлгүүрийн эзнээс хэрэггүй картон цаас байгаа эсэхийг хэн асуухаа шийдэж байгаа хэсэг гэх мэт. Өлзийн болон түүний дүү нарын хувьд нөхцөл байдал хэдий хүнд байгаа ч гэсэн “Баавгай болохсон” кино уй гашууд автахыг өөртөө зөвшөөрөөгүй.

“Баавгай болохсон” кино Өнгөрсөн жил Каннын наадмын албан ёсны шалгаруулалтад оролцсон анхны Монгол кино болж түүх бүтээсэн. Тус кино “Un Certain Regard” хэсэгт өрсөлдсөн юм. Одоо П.Золжаргалын Монгол Улсын Оскарт төлөөлөн оролцоно.

Эх сурвалж: Variety

Энэ мэдээнд өгөх таны үнэлгээ

Хуваалцаарай Жиргээрэй