Лос-Анжелесийн түймрийн нөхцөл байдлыг хүчтэй салхи хүндрүүлэх эрсдэлтэй байна

Лос Анжелесийн эргэн тойронд сүүлийн найман өдрийн турш гарч буй олон түймрийн нөхцөл байдлыг хүчтэй, хуурай салхи улам дордуулах эрсдэлтэй байгаа бөгөөд галыг унтраахаар ажиллаж буй гал сөнөөгчид хүнд байдалтай тулгараад байна. Албаныхан иргэдийг сонор сэрэмжтэй байж, өнөөдрийн /2025.01.16/ үдээс хойш хүчтэй салхитай байх тул яаралтай нүүн шилжихэд бэлэн байхыг анхааруулжээ.
Одоогийн байдлаар галын аюултай бүсэд 6.5 сая орчим хүн оршин сууж буй. Албаныхан түймрүүдийн шалтгааныг тогтоохоор ажиллаж байна. Үүнээс гадна Лос Анжелесийн галын цоргонууд яагаад усгүй болсныг илрүүлэхээр шалгалтын ажил явуулж буй.
Албаныхан түймрүүдийн шалтгааныг илрүүлээгүй ч шүүхийн хэд хэдэн зарга, цахилгааны компани мэдэгдэл хийснээр гал гарсан шалтгаан нөхцлийн тухай таамаглалууд дэвшээд байгаа юм.
Палисадын түймэр

Лос Анжелесийн Палисад хороололд түймэр гарсан тухай өнгөрсөн долоо хоногийн мягмар гарагт /2025.01.07/ анх мэдээллүүд гарсан. Тэрхүү түймрийн хүчийг Санта Ана хотоос ирсэн салхи нэмж, одоогийн байдлаар 23,713 акр талбайг хамраад байгаа. Гал сөнөөгчид тус түймрийг ердөө 19 хувь л хяналтдаа авчээ. Палисадын түймрийн улмаас найман хүн амь үрэгдээд байгаа юм.
Түймэр гарсан шалтгаан тодорхойгүй байгаа ч Палисадын гал Лос Анжелесийн баруун хэсэгт оршдог уул хяраас эхтэй байж магадгүй гэж үзэж буй. Тэрхүү бүсээр нь аялагчид болон ууланд авирагчид их явдаг юм. Үүнээс үзвэл Палисадын түймэр хүний буруутай үйлдлээс дэгдсэн байх магадлалтай.
АНУ-ын архи, тамхи, галт зэвсэг, дэлбэрэх бодисын товчоо даваа гарагт /2025.01.13/ мэдэгдэл хийхдээ Палисадын түймрийн шалтгааныг тогтоохоор тусгай баг илгээсэн байгаа гэсэн юм.
Итоны түймэр
Итоны түймэр өнгөрсөн долоо хоногийн мягмар гарагт гарснаасаа хойш 14 мянган акр талбайг цөлмөөд байгаа. Тус түймрийн улмаас 17 хүн амь үрэгджээ. Гал сөнөөгчид Итоны түймрийг 45 хувь хяналтдаа авсан.
Одоогийн байдлаар албаныхан галын шалтгааныг тодорхойлоогүй байгаа. Гэхдээ Өмнөд Калифорнийн хамгийн том эрчим хүчний компани болох “Southern California Edison”-ий тоног төхөөрөмжөөс түймэр эхэлсэн гэх хэд хэдэн зарга шүүх дээр үүсжээ.
Шүүх дээр үүссэн заргуудын нэгд нь тус компанийн цахилгааны цамхгийн ойролцоо гал гарч байхыг харсан гэрчийн мэдүүлэг байгаа аж. Үүнээс гадна тус заргад түймэр гарахаас өмнө цахилгааны сүлжээнд доголдол гарсныг илтгэх мэдээллийг багтаасан гэгдэж буй.
“Southern California Edison” компани мэдэгдэл хийхдээ “Гал түймэртэй тэмцэх ямар ч алба SCE-ийн цахилгаан байгууламж түймрийн үүсэлтэй холбоотой байж магадгүй гэх мэдээлэл хийгээгүй” гэсэн байна.
Хурстийн түймэр
Хурстийн түймэр мөн өнгөрсөн долоо хоногийн мягмар гарагт дэгдсэн. Тус түймрийг гал сөнөөгчид 99 хувь хяналтдаа авсан байгаа. Хурстийн түймэрт 800 акр талбай өртсөн юм. Калифорни мужийн гал түймрийн алба тус түймрийн шалтгааныг тодорхойлоогүй байгаа.
Гэхдээ “Southern California Edison” компани мэдэгдэл хийхдээ Хурстийн түймэр гарахад тус компанийн тоног төхөөрөмж нөлөө үзүүлсэн эсэхийг шалгаж байгаа хэмээжээ. Түймэр эхэлсэн бүсийн ойролцоо цахилгааны шугам унасан байсан нь илэрсэн юм. Одоогийн байдлаар тус шугам түймрийн өмнө эсвэл дараа унасан эсэх нь тодорхойгүй байна.
Эх сурвалж: Reuters, USA Today
АНХААРУУЛГА: Уншигчдын бичсэн сэтгэгдэлд Eguur.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.
Ертөнцийн *нүгэл*-ийн төв Бурханы гэсгээлийг сайн хүртэж байна,,,,,,Америк өөрөө бусад Улс орнуудыг бөмбөгдөж_ Улс орныг нь сүйрүүлж, Ард иргэдийн нь Алж хядаж, уй гашуу, үхэл зовлонд унагааж, Улс орноосоо хичнээн Улсын иргэд нутаг орноо орхин дүрвэв дээ, Америктай дайсан байх хэцүү, Найз байх бүүр аюултай гэдэг шдээ
Үнэн