Dyrbergkern: Цөөн тоогоор үйлдвэрлэсэн зүүлтийг манайх ОНЦГОЙ үнээр худалдаалсан

Данийн гоёл чимэглэлийн “Dyrberg kern” брэндийн нэгэн зүүлт өчигдрөөс /2019.12.13/ олон нийтийн дунд шүүмжлэл дагуулаад буй. Тодруулбал, “Тус брэндийн нэгэн зүүлтийг Монгол мөнгөөр 120 мянган төгрөгөөр аваад Монголд 7 сая 500 мянгаас хямдруулаад 3 сая 500 мянган төгрөгөөр зарж байна” гэх мэдээлэл тархсан юм.

“Супер рубин” компани тус брэндийг Монголд албан ёсны эрхтэйгээр оруулж ирж худалдаалдаг юм. Түүнчлэн Япон дахь салбарын эрхийг эзэмшиж буй билээ.

Монголд хэд дахин өндөр үнээр зарагдаж буй зүүлтний талаарх мэдээллийн дагуу Ерөнхий менежер Дорждуламаас зарим зүйлийг тодрууллаа.

-Танайхыг “Dyrberg kern” брэндийн гоёл чимэглэлийг хэд дахин өндөр үнээр оруулж ирж зардаг гэх мэдээлэл цахим орчинд тархсантай холбогдуулан мэдээлэл өгөхгүй юу?

-Манайх “Dyrberg kern” брэндийн бүтээгдэхүүний 99 хувийг албан ёсны сайт дээрх үнээр нь оруулж ирж зардаг. Үлдсэн ганцхан хувийг тодорхой шалтгаанаар өсгөж зардаг. Үүнд ихэвчлэн дахиж үйлдвэрлэгдэхээ больсон бараа бүтээгдэхүүн хамаардаг.

Олон нийтийн авах бололцоо боломжид тааруулан DYRBERG/KERN компани маш хямд хэн ч худалдан авах боломжтой байдлаар таримал чулуу шигтгээнүүдийг ашиглан 2018 онд дахин үйлдвэрлэж дэлхий дахинд борлуулж байна. Заавал үнэтэйг бус хүмүүст боломжийн үнэ бүхий гоёлууд гаргасанд бид ч баяртай байдаг. Жинхэнэ DESIGNER'S LIMITED болон сүүлд хийсэн энгийн загваруудын ялгааг манай хэрэглэгчид өөрсдөө мэднэ. DESIGNER’S LIMIITED коллекц бол манай нийт бүтээгдэхүүний 1% хэн хувийг эзэлдэг бөгөөд бусад 99% ийн бүтээгдэхүүн дэлхий нийтийн үнийн жишгийн дагуу Mонгол улс харин ч ханшийн зөрүүг үл харгалзан үнийн бодлогоо тогтмол барьдаг гэдгийг онцолмоор байна.

-Тус брэндийн нэгэн зүүлтийг “Монгол мөнгөөр 120 мянган төгрөгөөр аваад Монголд 7 сая 500 мянгаас хямдруулаад 3 сая 500 мянган төгрөгөөр зарж байна” гэх мэдээлэл бий. Энэ үнэн үү?

-Цахим орчинд нэг зүүлт тэнгэрт тулчихсан үнэтэй байна гэх шүүмжлэл гараад байгаа. Скрийншот хийж түгээгээд байгаа зүүлт нь өмнөх оны загвар юм. Тухайн зүүлт нь Дизайнер лимит зүүлт буюу 2013 онд онцгойлон, цөөн тоогоор гарсан. Загварын үнэтэй андуурч ойлгоод байгаа юм энэхүү коллекц нь бусад бүтээгдэхүүнээсээ өөр өөр байдаг. Ахиж хийгдэхээ больчихсон загвар гэсэн үг. Тухайн үед худалдаалагдаж байсан үнэ ханшаар нь манайх авч байсан юм л даа. Улмаар төв сайтынх нь албан ёсны зөвшөөрлийн дагуу ОНЦГОЙ үнээр худалдаалсан. Энэ зүүлтийн тухайд бид брэндийн бодлогын хүрээнд үнэ цэнийг тогтоох зорилготой. Мөн шигтээ, материал нь дахин давтагдашгүй бүтээгдэхүүн.

Бид цахим хуудсан дээрээ албан ёсны тайлбар мэдээллээ оруулсан. Ганцхан зүүлтнээс болж манай бүх бүтээгдэхүүнийг үнэтэй зарж байна гэж гуйвуулах хандлагатай мэдээлэл цацагдаад байгаа. Тайлбар мэдээлэл оруулснаас хойш хүмүүсийн ойлголт эерэг, зөв тал руу эргэсэн. Тиймээс та бүхнийг ч үнэн зөв мэдээлэл түгээгээсэй гэж хүсэж байна.

-Тээвэрлэлтийн зардалд хэр өндөр өртөгтэй вэ. Тээвэрлэлтийн зардлаас үүдэж үнэ харьцангуй нэмэгдэх тохиолдол гардаг уу?

-Тээвэрлэлтийн зардалд мэдээж тодорхой мөнгө нэмэгддэг. Бид тээвэрлэлтийн зардлаа оруулж нэмсэн ч үндсэн сайтан дээрх үнээсээ хямд байх тохиолдол ч гардаг.

-Танайх хичнээн нэр төрлийн гоёл чимэглэл худалдаалж байна вэ?

-Манайд 2000 гаруй нэр төрлийн ээмэг, цаг, зүүлт, бугуйвч, бөгж худалдаалагдаж байна.

-Мэдээлэл өгсөнд баярлалаа.

У.УЯН

Энэ мэдээнд өгөх таны үнэлгээ

Хуваалцаарай Жиргээрэй