П.Орхон, М.Анхцэцэг нартаа төрсөн өдрийн мэнд хүргэе

Монгол түмний бахархал болсон, хайртай тамирчид болох чөлөөт бөхийн дэлхийн аварга, Гавьяат тамирчин П.Орхон, ОУХМ М.Анхцэцэг нарын төрсөн өдөр өнөөдөр тохиож байна.

Өвөрхангай аймгийн Зүүнбаян-Улаан сумын харьяат, Гавьяат дасгалжуулагч Ц.Хосбаяр, Ц.Цогтбаяр нарын шавь П.Орхон 1993 онд төрсөн. 2016 онд Иван Ярыгиний нэрэмжит “Алтан гран при”-д түрүүлэхдээ олимп, дэлхийн аварга Каори Ичог ялж, шуугиулсан.

Түүнээс хойш оролцсон тэмцээн бүхэндээ амжилт гаргасаар дэлхийн аварга болж, Гавьяат тамирчин цол хүртэн, монгол түмнээ баярлуулсан юм.

Монголын хүндийг өргөлтийн спортын түүхэнд анхны тодотгол бүхий олон амжилтын эзэн болж яваа ОУХМ М.Анхцэцэг 23 нас хүрлээ. Үндэсний шигшээ багийн дасгалжуулагч Ц.Хосбаяр багшийн шавь тэрбээр өнгөрсөн жил үрийн зурай үнэрлэн, төрөөд гуравхан сарын дараа бэлтгэлдээ эргэн оржээ.

Улмаар найман сартай үрээ гэртээ үлдээн, дэлхийн дэвжээнд нялх биетэй хүч сориод ДАШТ-ээс хоёр дахь хүрэл медалиа хүртсэн нь яах аргагүй бахдам амжилт. Тэгэхдээ Монгол Улсын дээд амжилтыг гурван удаа шинэчилсэн.

Улмаар 2019 оны “Бөртэ чоно” наадмын шилдгийн шилдэг эмэгтэй тамирчнаар тодорч, “Бөртэ чоно”-ыг дөрөв дэх удаагаа өргөсөн юм.

М.Анхцэцэгийн хань нь УДЭТ-ийн залуу жүжигчин Б.Золжаргал юм. Тэд манай сайтад өгсөн ярилцлагыг ЭНД дарж уншина уу.

Энэ мэдээнд өгөх таны үнэлгээ

Хуваалцаарай Жиргээрэй