Ногоон автобусны хэрэгт холбогдон өөрийгөө хутгалсан С.Жавхлантбаатар: Дарамт их ирж, сэтгэл зүй тогтворгүй болсон байсан

Ногоон автобусны хэргийн онцлох дүр нь нэгжлэгийн үеэр өөрийгөө хутгалж гэмтээж байсан С.Жавхлантбаатар мөн.

С.Жавхлантбаатар нь Сонгино хайрхан дүүргийн цагдаагийн тасгийг олон жил удирдсан. Тээврийн цагдаагийн албаны дэд даргын албан тушаалыг 2018 оноос хойш хашсан цагдаагийн хурандаа цолтой нэгэн. Түүнийг тэтгэвэрт гарсны дараа 2022 онд Нийслэлийн нийтийн тээврийн газрын даргаар томилсон.

-С.Жавхлантбаатарыг Н.Ууганбаяр санал болгож, Д.Сумьяабазар томилсон-

Томилгоог хурандаа Н.Ууганбаяр Д.Сумъяабазарт санал болгосон байдаг.

Дэлгэрүүлбэл, Гадаадын иргэн, харьяатын газрын даргаар ажиллаж буй Н.Ууганбаяр хотын дарга асан Д.Сумъяабазарт нийслэлийн С.Жавхлантбаатарыг анх танилцуулж байжээ. С.Жавхлантбаатарыг цагдаагийн байгууллагад олон жил ажилласан Н.Ууганбаярын бүлэглэлийн хүн гэж ярьдаг. Тиймдээ ч С.Жавхлантбаатарыг нийслэлд байхад хамгаалдаг байсан хүн нь Н.Ууганбаяр аж.

Д.Сумъяабазар, С.Жавхлантбаатарыг ногоон автобусны хэргийн гол буруутнаар нэрлэж, Ж.Сүхбаатарт хамаатуулсан нь

Гэвч С.Жавхлантбаатарыг ННТГ-ын даргаар ажиллаж байх хугацаанд ногоон автобусны хэрэг гарсан. Асуудалтай автобус хүлээн авч, ажлын албаныхнаараа гарын үсэг зуруулсан гэх үндэслэлээр С.Жавхлантбаатар хэрэгт холбогдож эхэлсэн.

Гал дээр тос нэмж энэ үймээн дээр тухайн үед Хотын даргаас ажиллаж байсан Д.Сумъяабазар ННТГ-ын даргаар ажиллаж байсан С.Жавхлантбаатарын хэргийн буруутнаар нэрлэж, түүнийг Ж.Сүхбаатар руу чиглүүлж өөрөө хэргээс мултарсан байдаг.

Ингээд ногоон автобусны хэрэгт холбогдуулан С.Жавхлантбаатарыг Эрүүгийн хуулийн 22.1 дүгээр зүйлийн 1.3 залилан буюу 17.3 хамтран гэх зүйчлэлээр хоёр жилээс найман жил хүртэл хугацаагаар хорих ялаар яллах дүгнэлт үйлдсэн.

Мөн гарцаагүй буруутан болсон С.Жавхлантбаатар мөрдөн байцаалтын үед мэдүүлгээ өөрчилж, Ж.Сүхбаатарт бүх бурууг өгснөөр Түгжрэлийн сайд асан Ж.Сүхбаатар ногоон автобусны хэргийн бас нэг буруутнаар нэрлэгдсэн юм.

Улмаар Ж.Сүхбаатарыг С.Жавхлантбаатарт хууль бус үүрэг чиглэл өгч, нөлөөлсний улмаас Тэнүүн огоо ХК-д давуу байдал бий болгосон гэмт хэрэгт хатгагчаар хамтран оролцсон хэмээн буруутгаж Эрүүгийн хуулийн тухай хуулийн 22.3-т заасан яллах дүгнэлт үйлдээд байгаа юм.

С.Жавхлантбаатарын мэдүүлэг мөрдөн байцаалтын явцад хэрхэн өөрчлөгдсөнийг дэлгэрүүлбэл,

С.Жавхлантбаатар нь 2023 оны аравдугаар сарын 19-ны өдрөөс эхлэн хоёр хоногийн сайтай дөрвөн удаа мэдүүлэг өгсөн. Ингэхдээ эхний гурван мэдүүлэгт мөрдөн байцаагчдад, "Ж.Сүхбаатар сайд юу ч мэдээгүй. Эхлээд ирсэн 20 автобус техникийн шаардлага хангахгүй байгаа талаар түүнд хэлээгүй гэж мэдүүлсэн байдаг.

Харин дөрөв дахь мэдүүлэг дээрээ би бодож үзээд мэдүүлгээ өөрчилж, үнэнээр өгөхөөр шийдлээ. "Ж.Сүхбаатар сайд автобус техникийн шаардлага ханаагүйг мэдэж байсан. Тэр эхний ээлжид ирэх 20 автобусны зарим зүйлс нь дутуу. Гэхдээ тэдгээр нь өөр газар хийгдэж байгаа. Тиймээс автобуснуудыг хүлээж ав. Автобустай холбоотой асуудал гаргаж санхүүжилт зогсоож болохгүй гэж хэлсэн. Ийм байдлаар надад байнга шахалт үзүүлж байсан. Шахалт үзүүлж байгааг нь би хэнд ч хэлээгүй" гэж мэдүүлсэн байгаа юм.

Иймд түүний мэдүүлэгт үндэслэн Ж.Сүхбаатарыг хэргийн буруутан болгож, шүүгдэж эхэлээд буй. Харин өөрт нь үнэн ч явсан С.Жавхлантбаатарын мэдүүлэг гэнэт ингэж өөрчлөгдсөнийг Ж.Сүхбаатар "цагдан хорино" гэсэн сүрдүүлэгт авсан байх гэж тайлбарлажээ.

-С.Жавхлантбаатарын өөрийгөө хутгаар гэмтээсэн талаарх мэдүүлэг мөн өөрчлөгдөв-

Мөн С.Жавхлантбаатар ногоон автобусны хэргийн үеэр өөрийгөө хутгалж гэмтээсэн үйлдлээ өмнө нь мөрдөн байцаагчдад, "Би Д.Сумъяабазар дарга, Ж.Сүхбаатар сайд нарыг огцорч байгааг хараад миний ажлын алдаанаас болж ингэж байна гэж бодоод их цочирдсон. Тиймээс цочролоосоо болж ийм үйлдэл хийсэн гэж мэдүүлж байжээ.

Харин энэ хэргийн талаар огт ам нээдэггүй, мэдүүлгүүдээ байнга өөрчилсөөр ирсэн түүнийг шүүх хуралдаанд оролцохоор ирэх үед нь дараах тодруулгыг авлаа.

-Ногоон автобусны хэрэгт шалгагдаж байх үедээ та өөрийгөө хүнд гэмтээж байсан. Тухайн үед хэрэгтээ холбоотой дарамт байв уу. Яагаад ингэх болсон юм бэ?

-Тэр үед сэтгэл санаа, сэтгэл зүйн маш их дарамт байсан. Шүүх дээр ирчихсэн бүх үнэн бодит зүйлсээ ярьж байгаа учраас энэ талаар цаашид ярих байх. Харин хэргийн хувьд энэ нь хууль хяналтын байгууллагаар шалгагдад дуусчихсан асуудал. Шаардлага үүсэхгүй бол шүүхээс тусдаа асуудал учир энэ талаар ярихгүй. Ямартай ч одоо миний биеийн байдал хэвийн.

-Мөрдөн байцаалтын үед таны мэдүүлэг өөрчлөгдсөн байсан. Шууд Ж.Сүхбаатар луу чиглээд эхэлсэн байна лээ?

-Анх мэдүүлж байсан мэдүүлгээ өөрчилсөн зүйл бий. Гэхдээ өнөөдрийн шүүх дээр нотлох баримтын хэмжээнд үнэн бодит мэдүүлэг өгч байгаа.

-Шуух хурлын үеэр таны байгуулсан автобус худалдан хүлээн авах ажлын хэсгийнхэн мэдүүлэгтээ шууд таныг буруутгаж байгаа харагдсан. Гэтэл та би хууль бус тушаал өгөөгүй гээд ам зөрж байгаа байдал их анзаарагдлаа?

-Та зарим ажилтны мэдүүлгийг ярьж байх шиг байна. Тухайлбал зөвхөн ажлын хэсгийн даргын мэдүүлж байгаа мэдүүлгийн тухай ярилаа. Мэдүүлж байгаа аливаа мэдүүлэг өөрөө нотлох баримтын түвшинтэй. Тэр нь үнэн бодит байна уу гэдгээр нотлогддог. Одоо дөнгөж хурал явагдаж байна. Хурал нээлттэй явагдаж байгаа учраас бодитой дүгнэлтүүд нь харагдах байх.

-Таныг ННТГ-ын даргаар томилоход голлон нөлөөлсөн хүнийг Ж.Сүхбаатар сайд гэгддэг. Сайд та хоёр эртнээс танил байсан нь үнэн үү?  

-Түгжрэлийг бууруулах үндэсний хорооны дарга Ж.Сүхбаатар намайг Нийслэлийн нийтийн тээврийн даргын албан тушаалд томилохын тулд надтай уулзаж байсан. Тэгэхдээ миний ажил мэргэжлийн туршлага дээр тулгуурлаж энэ саналыг тавьж байсан. Нийтийн тээврийн салбарт таныг ажиллуулах нөхцөл үүссэн гэдэг талаар л ярьдаг байсан. Энэ талаар мэдүүлгүүд дээрээ хэлсэн байдаг.

-Та анхны мэдүүлгүүддээ “Ж.Сүхбаатар сайд юу ч мэдээгүй. Би ажлаа тайлагнаагүй” сүүлд бүх зүйлийг мэдэж байсан болгож өөрчилсөн?

-Би ажлаа Д.Сумъяабазар, Ж.Сүхбаатар хоёрт хоёуланд нь тайлагнадаг байсан. Хэлээгүй өнгөрсөн зүйл байхгүй. Миний тушаалаар батлагдсан ажлын хэсэг надад мэдээллээ өгч бид дээш мэдэгддэг байсан.

Энэ мэдээнд өгөх таны үнэлгээ

Хуваалцаарай Жиргээрэй