Х.Нямбаатар: Надад нэг тэрбумын хөрөнгө байхгүй. Шүүгчийн шийдвэрт гомдол гаргасан

Хотын дарга Х.Нямбаатарын эд хөрөнгөөс нэг тэрбум төгрөгийг битүүмжлэх арга хэмжээ авах шүүгчийн захирамж өчигдөр /2025.03.11/ гарсан.

Тэгвэл үүнтэй холбоотойгоор Хотын дарга Х.Нямбаатар дараах тайлбарыг өглөө.

Тэрбээр “Шүүхийн ямар ч тогтоол гараагүй. Эко автомашин импортлогчдын холбоо “Бидний нэр төрд халдсан” гэдэн үндэслэлээр шүүхэд нэхэмжлэл гаргасан юм байна лээ. Улмаар СХД, ХУД, ЧД-ийн иргэний хэргийн анхан шатны шүүхийн шүүгч нэхэмжлэлийн дагуу иргэний хэрэг үүсгэсэн захирамж гаргасан. Түүнтэй холбоотойгоор шүүхийн урьдаас гарах шийдвэрийн биелэлтийг баталгаажуулах зорилгоор миний эд хөрөнгөтэй холбоотой битүүмжлэл гаргах захирамж гаргаад байна.

Надад нэг тэрбум төгрөг байхгүй. Нэг тэрбумын эд хөрөнгө байхгүй. Шүүгчийн гаргасан шийдвэрт би гомдол гаргасан. Үүний дагуу маргааш 14:00 цагаас гомдол хэлэлцэнэ.

Бас хэн нэг хүнээс уучлал гуйхгүй. Манайд жилдээ 130-140 мянган машин импортоор орж ирж байгаа. Улмаар 80 мянган машин зорчих боломжтой хотын зам дээр 10 дахин их машин зорчиж байна. Бас машин импортлогчид татвар төлдөггүй. Чанар стандартгүй, нүүрсэн яндангүй тээврийн хэрэгсэл оруулж ирдэг. Сүүлд арваннэгдүгээр сард дугаарын олголт зогссоноос хойш улсын дугаарын бизнес цэцэглэж байгаа.

Би сая бас АТГ-т үзлэг, оношилгоонд ороогүй автомашинуудын дугаар хаанаас гарч ирснийг шалгуулах бичиг өгчхөөд явж байна. Энэ асуудал дээр Авто тээврийн үндэсний төв болон Авто тээврийн оношилгооны төвүүдийг хүчингүй болсон дугааруудыг сэргээж дугаарын шагийн бизнес хийж байна уу гэсэн хардлага байгаа. Бас тодорхой баримт байгаа учир эдгээр байгууллагуудыг шалгаж өгөөч гэж АТГ-т хандаж байгаа” гэв.

Д.ЖАРГАЛМАА

Энэ мэдээнд өгөх таны үнэлгээ

Хуваалцаарай Жиргээрэй